ନୂଆଦିଲ୍ଲୀ: ଡ୍ରିମ ଗର୍ଲ ତଥା ରାଜନେତା ହେମାମାଳିନୀଙ୍କ ସମ୍ପର୍କରେ ଅରୁଚିକର ଟିପ୍ପଣୀ ଦେଇ ଅଡୁଆରେ ମହାରାଷ୍ଟ୍ର ମନ୍ତ୍ରୀ ତଥା ଶିବସେନା ନେତା ଗୁଲାବରାଓ ପାଟିଲ । ଏକ ସଭାରେ ନିଜ ବିଧାନସଭା କ୍ଷେତ୍ର ଜଲଗାଓଁର ରାସ୍ତାଗୁଡିକ ହେମାମାଳିନୀଙ୍କ ଗାଲ ପରି ଚିକ୍କଣ ଦିଶୁଥିବା କହିଥିଲେ ପାଟିଲ । ଗୁଲାବ ଏପରି କହି ତାଙ୍କ ନିର୍ବାଚନ ମଣ୍ଡଳୀର ରାସ୍ତା କିପରି ବିକାଶ ହୋଇଛି କହିବାକୁ ଚାହୁଁଥିଲେ । ରାଜ୍ୟ ଜଳଯୋଗାଣ ଓ ପରିମଳ ମନ୍ତ୍ରୀଙ୍କ ଏହି ମନ୍ତବ୍ୟକୁ ନେଇ ତେଜିବାରେ ଲାଗିଛି ରାଜନୀତି । କଥା ରାଜ୍ୟ ମହିଳା କମିଶନଙ୍କ ନିକଟରେ ପହଞ୍ଚିଛି । ଏନେଇ କ୍ଷମାପ୍ରାର୍ଥନା କରିବା ଲାଗି ମନ୍ତ୍ରୀଙ୍କୁ ନିର୍ଦ୍ଦେଶ ଦେଇଛନ୍ତି କମିଶନ । ଏପରି ଅରୁଚିକର ମନ୍ତବ୍ୟ ଦେଇ ସମାଲୋଚନାର ଶିକାର ହେବା ପରେ କ୍ଷମା ମାଗିଛନ୍ତି ଗୁଲାବରାଓ ପାଟିଲ।

ଭାଷଣ ଦେବା ଅବସରରେ ନିଜ ନିର୍ବାଚନ ମଣ୍ଡଳୀର ସମସ୍ତ ରାସ୍ତାକୁ ଦେଖିବା ଲାଗି ବିରୋଧୀ ଦଳଗୁଡିକୁ ଆହ୍ବାନ ଦେଇଥିଲେ ମନ୍ତ୍ରୀ ପାଟିଲ । ଏହାସହ ତାଙ୍କ ନିର୍ବାଚନ ମଣ୍ଡଳୀର ସମସ୍ତ ରାସ୍ତା ହେମାମାଳିନୀଙ୍କ ଗାଲ ପରି ଚିକ୍କଣ ବୋଲି କହିଥିଲେ । ପରୋକ୍ଷରେ ଏହି ନିର୍ବାଚନ ମଣ୍ଡଳୀରୁ ପୂର୍ବରୁ ବହୁ ଥର ପ୍ରତିନିଧିତ୍ବ କରିଥିବା ବିଜେପିର ପୂର୍ବତନ ବିଧାୟକଙ୍କୁ ସେ ଟାର୍ଗେଟ କରିଥିଲେ । ତିନି ସପ୍ତାହ ତଳେ ରାଜସ୍ଥାନର ମନ୍ତ୍ରୀ ରାଜେନ୍ଦ୍ର ସିଂ ଗୁଧା କହିଥିଲେ ତାଙ୍କ ନିର୍ବାଚନ ମଣ୍ଡଳୀର ରାସ୍ତାଗୁଡିକ ଏପରି ଭାବେ ତିଆରି କରିବେ ତାହା କାଟ୍ରିନା କୈଫଙ୍କ ଗାଲ ପରି ଚିକ୍କଣ ହେବ । ୨୦୧୯ ରେ ମଧ୍ୟପ୍ରଦେଶର ଜଣେ ପୂର୍ବତନ ମନ୍ତ୍ରୀ ପି.ସି. ଶର୍ମା ମଧ୍ୟ ସମଧରଣର ମନ୍ତବ୍ୟ ଦେଇଥିଲେ । ଗତ ଜାନୁଆରୀ ୨୦୧୯ ରେ ବିହାରର ଜଣେ କ୍ୟାବିନେଟ ମନ୍ତ୍ରୀ ବିନୋଦ ନାରାୟଣ ଝା କହିଥିଲେ ପ୍ରିୟଙ୍କା ଗାନ୍ଧି ଭଦ୍ରା ଦେଖିବାକୁ ସୁନ୍ଦର ବୋଲି ତାଙ୍କୁ କଂଗ୍ରେସରେ ସାମିଲ କରାଯାଇଛି । ତେବେ ଶିବସେନା ନେତାଙ୍କ ଏଭଳି ମନ୍ତବ୍ୟକୁ ନିନ୍ଦା କରିଛନ୍ତି ଏମପି ତଥା ଅଭିନେତ୍ରୀ ହେମାମାଳିନୀ । ତେବେ ବିବାଦ ବଢୁଥିବା ଦେଖି ମହାରାଷ୍ଟ୍ର ମହିଳା ଆୟୋଗର ଅଧ୍ୟକ୍ଷ ରୁପାଲି ଚାକନାକର ମନ୍ତ୍ରୀଙ୍କୁ ଜବାବ ତଲବ କରିଛନ୍ତି । ଆଉ ନିଜ ମନ୍ତବ୍ୟ ପାଇଁ ନିଜେ କ୍ଷମା ମାଗିଛନ୍ତି ମନ୍ତ୍ରା ଗୁଲାବ ରାଓ ।