ସାମ୍ବିଧାନିକ ଅଧିକାରର ଉଲ୍ଲଂଘନ ହେଲେ କୋର୍ଟ କରିବେ ହସ୍ତକ୍ଷେପ: ସିଜେଆଇ ସୂର୍ଯ୍ୟ କାନ୍ତ

ଦେଶରେ ଯେତେବେଳେ ବି ସାମ୍ବିଧାନିକ ଅଧିକାରର ଉଲ୍ଲଂଘନ ହେବ, ସେତେବେଳେ କୋର୍ଟ ନିଶ୍ଚିତ ଭାବେ ହସ୍ତକ୍ଷେପ କରିବେ। ନୂଆଦିଲ୍ଲୀଠାରେ ଆୟୋଜିତ ଜାତୀୟ ମାନବିକ ଅଧିକାର କମିଶନ (NHRC) ର ୩୩ତମ ପ୍ରତିଷ୍ଠା ଦିବସରେ ଯୋଗଦେଇ ଏଭଳି ଗୁରୁତ୍ୱପୂର୍ଣ୍ଣ ମନ୍ତବ୍ୟ ଦେଇଛନ୍ତି ଭାରତର ପ୍ରଧାନ ବିଚାରପତି (CJI) ଜଷ୍ଟିସ୍ ସୂର୍ଯ୍ୟ କାନ୍ତ। ଏହି ଅବସରରେ ସେ ମାନବିକ ଅଧିକାର ଏବଂ ସାମ୍ବିଧାନିକ ଅଧିକାର ସମ୍ପର୍କରେ ବିସ୍ତୃତ ଆଲୋଚନା କରିଥିଲେ।

ସିଜେଆଇ କହିଥିଲେ ଯେ, ସମ୍ବିଧାନ ପ୍ରତ୍ୟେକ ନାଗରିକଙ୍କୁ ସମ୍ମାନ, ସମାନତା, ସ୍ୱାଧୀନତା ଏବଂ ନ୍ୟାୟର ପ୍ରତିଶ୍ରୁତି ଦେଇଥାଏ। ତେଣୁ ମାନବିକ ଅଧିକାର କମିଶନଗୁଡ଼ିକ ଅଭିଯୋଗର ତଦନ୍ତ କରିବା, ବ୍ୟବସ୍ଥାଗତ ତ୍ରୁଟିଗୁଡ଼ିକୁ ଚିହ୍ନଟ କରିବା ଏବଂ ସମାଜର ନିଷ୍ପେସିତ ବର୍ଗର ଲୋକଙ୍କ ସମସ୍ୟା ଉପରେ ସାଂସ୍ଥାନିକ ଦୃଷ୍ଟି ଆକର୍ଷଣ କରିବା ଉଚିତ୍। କମିଶନର ନୈତିକ କ୍ଷମତାକୁ ଏକ 'ବ୍ୟାଙ୍କ ବାଲାନ୍ସ' ସହ ତୁଳନା କରି ସେ କହିଥିଲେ ଯେ, ଏହା ଧୀରେ ଧୀରେ ଅର୍ଜନ କରାଯାଏ କିନ୍ତୁ ଅତି ଶୀଘ୍ର ହରାଇବାର ଭୟ ଥାଏ। ତେଣୁ ସଂଖ୍ୟାତ୍ମକ ସଫଳତା ଅପେକ୍ଷା କ୍ଷମତାହୀନ ଲୋକଙ୍କୁ ସୁରକ୍ଷା ଦେବା ଉପରେ ଏନଏଚଆରସିର ବିଶ୍ୱସନୀୟତା ନିର୍ଭର କରେ।

ବିଶୁଦ୍ଧ ଜଳ ସମସ୍ତଙ୍କ ଅଧିକାର

ଏହି କାର୍ଯ୍ୟକ୍ରମରେ 'ୱାଟର - ଦି ଏଲିକ୍ସିର ଅଫ୍ ଲାଇଫ୍' ଶୀର୍ଷକ ଏକ ସମ୍ମିଳନୀ ମଧ୍ୟ ଆୟୋଜିତ ହୋଇଥିଲା। ଏଥିରେ ଜଳ ଯୋଗାଣ ଓ ମାନବିକ ଅଧିକାର ଉପରେ ଆଲୋକପାତ କରି ସିଜେଆଇ ସୂର୍ଯ୍ୟ କାନ୍ତ କହିଥିଲେ ଯେ, ସମ୍ବିଧାନର ଧାରା ୨୧ ଅନୁଯାୟୀ କେବଳ ପାଇପ୍ ସଂଯୋଗ ଦେଇଦେଲେ ଅଧିକାର ମିଳିଗଲା ବୋଲି ଭାବିବା ଭୁଲ୍। ପାଣି ନଥିବା ଶୁଖିଲା ପାଇପ୍ କଦାପି ପ୍ରତିଶ୍ରୁତି ପୂରଣ କରିପାରିବ ନାହିଁ। ଆର୍ସେନିକ୍ ବା ଫ୍ଲୋରାଇଡ୍ ଭଳି କ୍ଷତିକାରକ ପଦାର୍ଥ ଥିବା ଦୂଷିତ ଜଳ ସେବା ନୁହେଁ, ବରଂ ଜୀବନ ଓ ସ୍ୱାସ୍ଥ୍ୟ ପ୍ରତି ଏକ ବିପଦ। ତେଣୁ ଲୋକଙ୍କ ନିକଟରେ କିପରି ବିଶୁଦ୍ଧ ଓ ନିରାପଦ ପାନୀୟ ଜଳ ପହଞ୍ଚିପାରିବ, ସେନେଇ ସରକାର ଦୃଢ଼ ବ୍ୟବସ୍ଥା ଗ୍ରହଣ କରିବା ଆବଶ୍ୟକ।

ଏନଏଚଆରସିର ସଫଳତା ଓ ନୂଆ ମୋବାଇଲ୍ ଆପ୍

ନିଜର ୩୩ ବର୍ଷର ଯାତ୍ରା ମଧ୍ୟରେ ଏନଏଚଆରସିର ସଫଳତାକୁ ସିଜେଆଇ ପ୍ରଶଂସା କରିଥିଲେ। ସେ ସୂଚନା ଦେଇଥିଲେ ଯେ, ଏପର୍ଯ୍ୟନ୍ତ କମିଶନରେ ୨୪ ଲକ୍ଷରୁ ଅଧିକ ମାମଲା ରୁଜୁ ହୋଇଥିବା ବେଳେ ୨୩ ଲକ୍ଷରୁ ଅଧିକ ମାମଲାର ସମାଧାନ କରାଯାଇଛି, ଯାହାର ହାର ୯୮ ପ୍ରତିଶତରୁ ଅଧିକ ରହିଛି। ଏହାସହ ନାଗରିକମାନଙ୍କ ସୁବିଧା ପାଇଁ ଆରମ୍ଭ କରାଯାଇଥିବା 'ଏନଏଚଆରସି ଇଣ୍ଡିଆ' (NHRC India) ମୋବାଇଲ୍ ଆପ୍‌କୁ ସେ ସ୍ୱାଗତ କରିଥିଲେ। ଏହି ଆପ୍ ମାଧ୍ୟମରେ ଲୋକେ ସହଜରେ ଅଭିଯୋଗ ଦାଖଲ କରିବା ସହ ନିଜ ମାମଲାର ସ୍ଥିତି ଜାଣିପାରିବେ। ହାଜତ ମୃତ୍ୟୁ, ଶ୍ରମ ଶୋଷଣ ଏବଂ ପଛୁଆ ବର୍ଗଙ୍କ ଅଧିକାର ସୁରକ୍ଷା କ୍ଷେତ୍ରରେ କମିଶନଙ୍କ ପଦକ୍ଷେପକୁ ପ୍ରଧାନ ବିଚାରପତି ବିଶେଷ ଭାବେ ପ୍ରଶଂସା କରିଥିଲେ।