ଜମ୍ମୁ -କାଶ୍ମୀରରେ ବଢିବ ଆଉ ୭ଟି ବିଧାନସଭା ସିଟ୍, ଅନୁସୂଚିତ ଜନଜାତିଙ୍କ ପାଇଁ ସଂରକ୍ଷଣ ରହିବ ଆସନ

ଜମ୍ମୁ -କାଶ୍ମୀରରେ ସୀମା ପୁନଃନିର୍ଦ୍ଧାରଣ ପରେ ୭ଟି ବିଧାନସଭା ଆସନ ବୃଦ୍ଧି ପାଇବ। ଏହା ପରେ ବିଧାନସଭାରେ ୮୩ଟି ସିଟ୍ ବଦଳରେ ୯୦ଟି ସିଟ୍ ରହିବ। ମାର୍ଚ୍ଚ ୨୦୨୨ ସୁଦ୍ଧା ଏହି ସମ୍ପୂର୍ଣ୍ଣ ପ୍ରକ୍ରିୟା ସମାପ୍ତ ହେବ। ଏ ନେଇ ସୀମା ନିର୍ଦ୍ଧାରଣ ଆୟୋଗ ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି। ଏହି ସାମ୍ବାଦିକ ସମ୍ମିଳନୀରେ ମୁଖ୍ୟ ନିର୍ବାଚନ କମିଶନର ସୁଶୀଲ ଚନ୍ଦ୍ରା ମଧ୍ଯ ଉପସ୍ଥିତ ଥିଲେ। ୨୦୧୧ ଜନଗଣନା ଆଧାରରେ ଏହି ସୀମା ନିର୍ଦ୍ଧାରଣ କରାଯିବ ବୋଲି ସୁଶୀଲ ଚନ୍ଦ୍ରା କହିଛନ୍ତି।

ଜମ୍ମୁ-କାଶ୍ମୀରରେ ସୀମା ପୁନଃନିର୍ଦ୍ଧାରଣ ନେଇ ପ୍ରସ୍ତୁତି ଚାଲିଛି । ସୀମା ପୁନଃନିର୍ଦ୍ଧାରଣ ଆୟୋଗ ଏବେ ଜମ୍ମୁ-କାଶ୍ମୀରରେ ଅଛନ୍ତି । ଶୁକ୍ରବାର ଦିନ ସୀମା ପୁନଃନିର୍ଦ୍ଧାରଣ ଆୟୋଗ ଜମ୍ମୁ ଗସ୍ତ କରିଛନ୍ତି ।  ସେ କହିଛନ୍ତି କି ପ୍ରଥମଥର ପାଇଁ ଜମ୍ମୁ-କାଶ୍ମୀରରେ ଅନୁସୂଚିତ ଜନଜାତିଙ୍କ ପାଇଁ ଆସନ ସଂରକ୍ଷଣ କରାଯିବ ।

ସାମ୍ବାଦିକ ସମ୍ମିଳନୀରେ ସୁଶିଲ ଚନ୍ଦ୍ରା କହିଛନ୍ତି ଯେ,  ୧୯୯୫ ମସିହାରେ ଜମ୍ମୁ-କାଶ୍ମୀରରେ ମୋଟ ୧୨ ଟି ଜିଲ୍ଲା ଥିବା ବେଳେ ଏବେ ଜିଲ୍ଲା ସଂଖ୍ୟା ୨୦ କୁ ବୃଦ୍ଧି ପାଇଛି । ଏହାସହ ତହସିଲ ସଂଖ୍ୟା ବି ବଢିଛି । ଏହାସହ ୨୦୧୧ ଜନସଂଖ୍ୟା ତୁଳନାରେ ସୀମା ପୁନଃନିର୍ଦ୍ଧାରଣ କରାଯାଉଥିବା କଥା ସେ କହିଛନ୍ତି ।

ଏହାସହ ଜମ୍ମୁ-କାଶ୍ମୀରରେ ଥିବା ମୋଟ ବିଧାନସଭା ଆସନ ସହିତ ଏବେ ୭ ଟି ଆସନ ଯୋଡିବାକୁ ପ୍ରକ୍ରିୟା ଚାଲିଛି ଓ ଏସ.ଟି କାଟାଗୋରୀ ପାଇଁ ବି ଆସନ ସଂରକ୍ଷିତ କରାଯିବା ଉପରେ ବିଚାର କରୁଛି ସୀମା ପୁନଃନିର୍ଦ୍ଧାରଣ ଆୟୋଗ । ଏହାସହ ପାକ୍ ଅଧିକୃତ କାଶ୍ମୀର (ପିଓକେ) ପାଇଁ ଅଲଗା ୨୪ ଟି ଆସନ ରହିବ ବୋଲି ମୁଖ୍ୟ ନିର୍ବାଚନ କମିଶନର ସୂଚନା ଦେଇଛନ୍ତି ।