କର୍ଣ୍ଣାଟକ: ବ୍ଲାକ୍ ଫଙ୍ଗସ ରୋଗରେ ଚାଲିଗଲା ପତ୍ନୀଙ୍କ ଜୀବନ । ପତ୍ନୀଙ୍କ ମୃତ୍ୟୁର ଦୁଃଖକୁ ସହିପାରିଲେନି ପୂର୍ବତନ ସେନାଧିକାରୀ । ଶେଷରେ ମାନସିକ ଭାରସାମ୍ୟ ହରାଇ ନିଜ ୪ ପିଲାଙ୍କ ସହ ନିଜେ ଆତ୍ମହତ୍ୟା କରିଥିବା ଖବର ସ୍ଥାନୀୟ ଅଂଚଳରେ ଚାଞ୍ଚଲ୍ୟ ସୃଷ୍ଟି କରିଛି । ଏଭଳି ଏକ ଅଭାବନୀୟ ଘଟଣା ଘଟିଛି କର୍ଣ୍ଣାଟକର ବେଲଗାଭି ଜିଲ୍ଲାର ହୁବେଇ ଅଞ୍ଚଳରେ।

ସୂଚନା ଅନୁସାରେ, ୪୬ ବର୍ଷୀୟ ପୂର୍ବତନ ସେନାଧିକାରୀ ଗୋପାଳ ହାଦିମାନି ଏବଂ ତାଙ୍କର ଚାରି ପିଲା- ସୌମ୍ୟା, ଶ୍ୱେତା, ସାକ୍ଷୀ ଏବଂ ଶ୍ରୀଜନ ଶୁକ୍ରବାର ରାତିରେ ବିଷ ପିଇ ଆତ୍ମହତ୍ୟା କରିଥିବା ପୁଲିସ କହିଛି। ଶନିବାର ଦିନ ପରିବାର ପକ୍ଷରୁ ଡେରି ଯାଏଁ କୌଣସି ଗତିବିଧି ନଥିବା ବେଳେ ପଡୋଶୀମାନେ ପୋଲିସ ଓ ସମ୍ପର୍କୀୟଙ୍କୁ ଏ ସମ୍ପର୍କରେ ସୂଚନା ଦେଇଥିଲେ । ପୁଲିସ ପହଞ୍ଚି ୫ଜଣଙ୍କ ମୃତଦେହ ଉଦ୍ଧାର କରିଛି।

ପୋଲିସର ସୂଚନାନୁସାରେ, ଚଳିତ ବର୍ଷ ଜୁଲାଇ ୬ କୋଭିଡ ସମୟରେ ବ୍ଲାକ ଫଙ୍ଗସ୍ ରୋଗରେ ତାଙ୍କ ପତ୍ନୀଙ୍କ ମୃତ୍ୟୁ ପରେ ଏହି ବ୍ୟକ୍ତି ଅବସାଦଗ୍ରସ୍ତ ହୋଇଥିଲେ । ସେବେଠୋରୁ ପରିବାରର ଅନ୍ୟ ସଦସ୍ୟମାନେ ଭାଙ୍ଗିପଡିଥିଲେ। ପ୍ରତିଦିନ ସେନାଧିକାରୀ ତାଙ୍କ ପତ୍ନୀଙ୍କୁ ମାନେ ପକାଉଥିଲେ। ପିଲାମାନେ ମଧ୍ୟ ମା’କୁ ମନେ ପକାଇ କାନ୍ଦୁଥିଲେ। ଶେଷରେ ଅସହ୍ୟ ହେବାରୁ ସେମାନେ ମାନସିକ ଭାରସାମ୍ୟ ହରାଇ ଏପରି ଚରମ ନିଷ୍ପତି ନେଇଥିବା ଚର୍ଚ୍ଚା ହେଉଛି।