ହରିୟାଣାର ଫରିଦାବାଦରୁ ୩୫୦ କିଲୋ RDX ଜବତ, ଦୁଇ ସନ୍ଦିଗ୍ଧ ଡାକ୍ତର ଗିରଫ

ନୂଆଦିଲ୍ଲୀ: ବଡ଼ ଆତଙ୍କୀ ଯୋଜନାକୁ ପଣ୍ଡ କଲା ଜମ୍ମୁକାଶ୍ମୀର ପୋଲିସ । ହରିୟାଣାର ଫରିଦାବାଦରୁ ୩୫୦ କିଲୋ RDX ଜବତ ।ବିପୁଳ ପରିମାଣର RDX ସହ AK-୪୭ ମଧ୍ୟ ଜବତ । ଟେରର୍‌ ଲିଙ୍କ୍‌ରେ ଗିରଫ ଡାକ୍ତର ଆଦିଲ ଅହମ୍ମଦ ସୂଚନା ଆଧାରରେ ରେଡ୍‌ ବେଳେ ଏତେ ପରିମାଣର ଆମୋନିୟମ ନାଇଟ୍ରେଟ ସହ ଗୋଟିଏ ଆସଲ୍ଟ ରାଇଫଲ ଜବତ ହୋଇଛି । ଜମ୍ମୁ ଏବଂ କାଶ୍ମୀର ପୋଲିସର ଏକ ସ୍ୱତନ୍ତ୍ର ଦଳ ସ୍ଥାନୀୟ ପୋଲିସ ସହିତ ମିଶି  ହରିୟାଣାର ଫରିଦାବାଦରେ ଜଣେ ଡାକ୍ତରଙ୍କ ଘରୁ ଏସବୁ ଜବତ କରିଛି । ତେବେ ପୂର୍ବରୁ, ପୋଲିସ କାଶ୍ମୀର ଭ୍ୟାଲିରେ ଡାକ୍ତର ଆଦିଲ ଅହମ୍ମଦଙ୍କ ଏକ ଲକରରୁ ଏକ AK-47 ରାଇଫଲ ଓ ଗୁଳି ଜବତ କରିଥିଲା।

ଆଦିଲଙ୍କ ଗିରଫଦାରି ପରେ ଆଉ ଜଣେ ଡାକ୍ତରଙ୍କୁ ମଧ୍ୟ ଅଟକ ରଖାଯାଇଛି । ଏହି ଦୁଇଜଣଙ୍କ ସହାୟତାରେ ଜୈସ୍-ଏ-ମହମ୍ମଦ ଆତଙ୍କୀ ସଂଗଠନ ଦେଶରେ ବଡ଼ ଧରଣର ଆତଙ୍କୀ ହମଲା କରିବାକୁ ଯୋଜନା କରିଥିଲା ବୋଲି କୁହାଯାଉଛି । ଏହାକୁ ପଣ୍ଡ କରିଛି ଜମ୍ମୁ- କାଶ୍ମୀର ପୁଲିସ୍ ।

ସୂତ୍ର ଅନୁସାରେ, ଏହି ଅପରେସନ ଆତଙ୍କବାଦୀ ସଂଗଠନ ଅନସାର ଘଜୱାତ-ଉଲ-ହିନ୍ଦ (AGH) ର ତଦନ୍ତର ଏକ ଅଂଶ । ତଦନ୍ତରୁ ଜଣାପଡିଛି ଯେ ତିନି ଜଣ ଡାକ୍ତର ଏହି ସଂଗଠନ ସହିତ ଜଡିତ ଥିଲେ। ଏହି ଡାକ୍ତରମାନଙ୍କ ମଧ୍ୟରୁ ଦୁଇଜଣ, ଆଦିଲ ଅହମ୍ମଦ ରାଥେର (ଅନନ୍ତନାଗର ବାସିନ୍ଦା) ଏବଂ ମୁଜାମ୍ମିଲ ଶକିଲ (ପୁଲୱାମାର ବାସିନ୍ଦା)ଙ୍କୁ ସାହାରାନପୁର ଏବଂ ଫରିଦାବାଦରୁ ଗିରଫ କରାଯାଇଇଛି ।