ବାରିପଦା : ବାରିପଦା ସହରସ୍ଥିତ ଏକ ନିଶା ନିବାରଣ କେନ୍ଦ୍ରର ଦିବ୍ୟାଙ୍ଗ ଅନ୍ତେବାସୀଙ୍କୁ ଅକଥନୀୟ ନିର୍ଯ୍ୟାତନାର ଭିଡିଓ ସୋସିଆଲ ମିଡିଆରେ ଭାଇରଲ ହେବାରେ ଲାଗିଛି । ମ୍ୟୁଜିକର ତାଳେତାଳେ ନାଚିନାଚି ମାଡ ମାରି ଭୟଭୀତ କରାଇବା ସହିତ ପାଦ ଚଟାଇଲେ ନିଶା ନିବାରଣ କେନ୍ଦ୍ରର ମାଲିକ ଓ କର୍ମଚାରୀ। ପାଦ ନଚାଟିଲେ ପ୍ଲାଷ୍ଟିକ୍ ପାଇପରେ ନିସ୍ତୁକ ମାଡ । ଜବରଦସ୍ତ ପାଦ ଚଟାଇବା ସହ ମାଲିକ ମାଡମାରୁଛନ୍ତି । ବାରିପଦାର ଜଣାଶୁଣା  ନିଶା ନିବାରଣ କେନ୍ଦ୍ରରେ ଘଟିଛି ଏଭଳି ଘଟଣା।

କିଛି ମାସ ପୂର୍ବରୁ ଏହି ନିଶା ନିବାରଣ କେନ୍ଦ୍ରର ମାଲିକ ଓ ତାଙ୍କ କିଛି ସହଯୋଗୀ ବାଙ୍ଗିରିପୋଷି ଅଞ୍ଚଳରେ ନିଜେ ନିଶାସେବନ କରି ପୁଲିସ ହାତରେ ଧରା ପଡିଥିଲେ। ତେବେ ଭିଡିଓଟି ବର୍ଷକ ତଳର । ଯାହାକୁ ଚପାଇ ଦିଆଯାଇଥିଲା । ଏନେଇ ଥାନାରେ ଅଭିଯୋଗ ନଥିବାରୁ କୌଣସି ମାମଲା ରୁଜୁ ହୋଇନାହିଁ । ଅତୀତରେ ଉକ୍ତ କେନ୍ଦ୍ରର ମାଲିକଙ୍କ ନାମରେ ଏକାଧିକ ଅଭିଯୋଗ ଥିବା ବେଳେ ସେ ଜଣେ ବିବାଦୀୟ ବ୍ୟକ୍ତି ।

ଅନ୍ୟପଟେ ଭିଡିଓଟି ଭାଇରାଲ ହେବା ପରେ ନିଶା ନିବାରଣ କେନ୍ଦ୍ରରେ ନିର୍ଯାତନା ଘଟଣାରେ ବାରିପଦା ଟାଉନ ପୁଲିସର ତଦନ୍ତ ଆରମ୍ଭ ହୋଇଛି। ବାରିପଦା ଟାଉନ ଥାନଧିକାରୀ ବିରେନ୍ଦ୍ର କୁମାର ସେନାପତିଙ୍କ ନେତୃତ୍ବରେ ନିଶା ନିବାରଣ କେନ୍ଦ୍ରରେ ପୁଲିସ ପହଞ୍ଚି ନିଶା ନିବାରଣ କେନ୍ଦ୍ରର ମାଲିକଙ୍କ ସହ ଅନ୍ତେବାସୀଙ୍କୁ ପଚରା ଉଚରା କରିଛି । ଅଧିକ ତଦନ୍ତ ପାଇଁ ନିଶା ନିବାରଣ କେନ୍ଦ୍ରର ମାଲିକ ଅବନୀ ପତୀଙ୍କୁ ଉଠାଇ ନେଇଛି ଟାଉନ ଥାନା ପୁଲିସ।