ଓଡ଼ିଶା ଡିଜିପି ନିଯୁକ୍ତି ମାମଲା: ସୁପ୍ରିମକୋର୍ଟଙ୍କ ରାଜ୍ୟ ସରକାରଙ୍କୁ ପ୍ରଶ୍ନ- ସିବିଆଇ ଏତଲା ବାବଦରେ ଅବଗତ ଥିଲେ କି?

ଓଡ଼ିଶା ପୋଲିସ ମହାନିର୍ଦ୍ଦେଶକ (ଡିଜିପି) ନିଯୁକ୍ତି ମାମଲାକୁ ନେଇ ସୁପ୍ରିମକୋର୍ଟରେ ହୋଇଥିବା ଶୁଣାଣି ବେଳେ ରାଜ୍ୟ ସରକାରଙ୍କୁ କଡ଼ା ପ୍ରଶ୍ନର ସମ୍ମୁଖୀନ ହେବାକୁ ପଡ଼ିଛି। ଡିଜିପି ପଦ ପାଇଁ ବରିଷ୍ଠ ଆଇପିଏସ୍ ଅଧିକାରୀ ସୁଶାନ୍ତ କୁମାର ନାଥଙ୍କ ନାମ ୟୁପିଏସସିକୁ (UPSC) ପଠାଇବା ପୂର୍ବରୁ ଏସଆଇ (SI) ପରୀକ୍ଷା ଦୁର୍ନୀତି ମାମଲାରେ ରୁଜୁ ହୋଇଥିବା ସିବିଆଇ ଏତଲା ବାବଦରେ ରାଜ୍ୟ ସରକାର ଅବଗତ ଥିଲେ କି ନାହିଁ, ସେନେଇ ସର୍ବୋଚ୍ଚ ନ୍ୟାୟାଳୟ ପ୍ରଶ୍ନ କରିଛନ୍ତି।

ସୁପ୍ରିମକୋର୍ଟଙ୍କ ଖଣ୍ଡପୀଠଙ୍କ ପ୍ରଶ୍ନ

ବୁଧବାର ପ୍ରଧାନ ବିଚାରପତି (CJI) ସୂର୍ଯ୍ୟକାନ୍ତ, ବିଚାରପତି ଜୟମାଲ୍ୟ ବାଗଚୀ ଏବଂ ବିଚାରପତି ଭି. ମୋହନାଙ୍କୁ ନେଇ ଗଠିତ ତିନି ଜଣିଆ ଖଣ୍ଡପୀଠ ଏହି ମାମଲାର ଶୁଣାଣି କରିଥିଲେ। ଶୁଣାଣି ସମୟରେ ବିଚାରପତି ବାଗଚୀ ପ୍ରଶ୍ନ କରିଥିଲେ ଯେ, ଯଦି ନଭେମ୍ବର ୨୦୨୫ରେ ସିବିଆଇ ଏଫଆଇଆର (FIR) ରୁଜୁ କରିସାରିଥିଲା, ତେବେ ରାଜ୍ୟ ସରକାର ମେ' ୨୦୨୬ରେ କାହିଁକି ଶ୍ରୀ ନାଥଙ୍କ ନାମ ୟୁପିଏସସିକୁ ପଠାଇଥିଲେ? ଯଦି ଏଫଆଇଆର ପୂର୍ବରୁ ପଞ୍ଜୀକୃତ ହୋଇସାରିଥିଲା, ତେବେ କମିଶନଙ୍କୁ ଏ ବିଷୟରେ ଅବଗତ କରାଇବା ରାଜ୍ୟ ସରକାରଙ୍କ କର୍ତ୍ତବ୍ୟ ନଥିଲା କି ବୋଲି ସେ ପଚାରିଥିଲେ।

କ'ଣ ଥିଲା ପୂରା ଘଟଣା?

ସୂଚନାଯୋଗ୍ୟ ଯେ, ପୋଲିସ ଏସଆଇ (SI) ପରୀକ୍ଷା ଅନିୟମିତତା ମାମଲାରେ ସିବିଆଇ ୧୨ ନଭେମ୍ବର ୨୦୨୫ରେ ଏକ ଏତଲା ଦାୟର କରିଥିଲା। ପ୍ରାଥମିକ ପର୍ଯ୍ୟାୟରେ ଏଥିରେ ଆଇପିଏସ୍ ଅଧିକାରୀ ଶ୍ରୀ ନାଥଙ୍କ ନାମ ନଥିଲା ଏବଂ ମେ' ୨୦୨୬ରେ ତାଙ୍କ ନାମ ଡିଜିପି ପ୍ୟାନେଲ ପାଇଁ ୟୁପିଏସସିକୁ ପଠାଯାଇଥିଲା। ତେବେ ପରବର୍ତ୍ତୀ ସମୟରେ ସିବିଆଇର ଏକ ଚିଠିକୁ ଆଧାର କରି ରାଜ୍ୟ ସରକାର ତାଙ୍କୁ ପ୍ରଦାନ କରିଥିବା 'ସାଧୁତା ପ୍ରମାଣପତ୍ର' (Integrity Certificate) ପ୍ରତ୍ୟାହାର କରିନେଇଥିଲେ ଏବଂ ୟୁପିଏସସିକୁ ଏକ ନୂତନ ତାଲିକା ପଠାଇଥିଲେ। ଏହାକୁ ନେଇ ସୁପ୍ରିମକୋର୍ଟରେ ଏକ ଜନସ୍ୱାର୍ଥ ମାମଲା (PIL) ଦାୟର କରାଯାଇଥିଲା।

ଅଦାଲତରେ ଯୁକ୍ତିଆଗତ

ଶ୍ରୀ ନାଥଙ୍କ ପକ୍ଷରୁ ଲଢ଼ୁଥିବା ବରିଷ୍ଠ ଆଇନଜୀବୀ କରୁଣା ନନ୍ଦୀ ଯୁକ୍ତି ବାଢ଼ିଥିଲେ ଯେ, ସିବିଆଇ ପକ୍ଷରୁ ଶ୍ରୀ ନାଥଙ୍କୁ ପଚରାଉଚରା କରିବା ପାଇଁ କୌଣସି ଅନୁମତି ମଗାଯାଇ ନାହିଁ କିମ୍ବା ସେ ଚାର୍ଜସିଟରେ ନାମିତ ନୁହଁନ୍ତି। ସେହିପରି ପୂର୍ବତନ ଡିଜିପି ପ୍ରକାଶ ସିଂହଙ୍କ ପକ୍ଷରୁ ଓକିଲ ପ୍ରଶାନ୍ତ ଭୂଷଣ ଏବଂ ଆବେଦନକାରୀଙ୍କ ପକ୍ଷରୁ ବରିଷ୍ଠ ଆଇନଜୀବୀ ପି. ଚିଦାମ୍ବରମ ଉପସ୍ଥିତ ରହି ରାଜ୍ୟ ସରକାର ଓ କେନ୍ଦ୍ର ମଧ୍ୟରେ 'ପୂର୍ବ ନିର୍ଦ୍ଧାରିତ ମିଳିମତ' ଥିବା ଅଭିଯୋଗ କରିଥିଲେ, ଯାହା ଦ୍ୱାରା ଜଣେ କନିଷ୍ଠ ଅଧିକାରୀଙ୍କୁ ଡିଜିପି ପଦ ପାଇଁ ସୁଯୋଗ ଦିଆଯାଇପାରିବ। ଅନ୍ୟପଟେ ରାଜ୍ୟ ସରକାରଙ୍କ ପକ୍ଷରୁ ଆଡଭୋକେଟ୍ ଜେନେରାଲ ପିତାମ୍ବର ଆଚାର୍ଯ୍ୟ ଖଣ୍ଡପୀଠଙ୍କୁ ଜଣାଇଥିଲେ ଯେ ସେ ଆସନ୍ତା ଶୁଣାଣିରେ ଏହି ସମସ୍ତ ପ୍ରଶ୍ନର ବିସ୍ତୃତ ଉତ୍ତର ରଖିବେ ା