ଗାଡ଼ି ମାଲିକଙ୍କୁ ବଡ଼ ଆଶ୍ୱସ୍ତି: ପିୟୁସିସି (PUCC) ନିୟମ ଉଲ୍ଲଂଘନ ପାଇଁ କମିଲା ଜରିମାନା

ଭୁବନେଶ୍ୱର: କମିଲା PUCC ଫାଇନ୍ । ୧୦ ହଜାରରୁ ୬ ହଜାର ହେଲା PUCC ଜରିମାନା ଟଙ୍କା । ବାଣିଜ୍ୟ ଓ ପରିବହନ ମନ୍ତ୍ରୀ ବିଭୂତି ଭୂଷଣ ଜେନାଙ୍କ ବଡ଼ ଘୋଷଣା । ପ୍ରଦୂଷଣ ଅଣ୍ଡର କଣ୍ଟ୍ରୋଲ୍ ସାର୍ଟିଫିକେଟ୍ (PUCC) ନିୟମ ଉଲ୍ଲଂଘନ ଉପରେ ଓଡ଼ିଶା ସରକାର ଜରିମାନା ହ୍ରାସ କରିଛନ୍ତି। ଏହାଦ୍ୱାରା ରାଜ୍ୟର ଗାଡ଼ି ମାଲିକମାନଙ୍କୁ ଏକ ବଡ଼ ଆଶ୍ୱସ୍ତି ମିଳିଛି। ତେବେ ମୋଟର ଯାନ ଓ ସଡ଼କ ସୁରକ୍ଷା ନିୟମ କଡ଼ାକଡ଼ି ପାଳନ କରାଯିବ ବୋଲି ସରକାର ସ୍ପଷ୍ଟ କରିଛନ୍ତି।

ବାଣିଜ୍ୟ ଏବଂ ପରିବହନ ମନ୍ତ୍ରୀ ବିଭୁତି ଭୂଷଣ ଜେନା କହିଛନ୍ତି ଯେ, ୨୦୧୯ ମସିହାରୁ ଏହି ଜରିମାନା ରାଶି ୧୦,୦୦୦ ଟଙ୍କା ସ୍ଥିର କରାଯାଇଥିଲା, ଯାହାକୁ ଏବେ ସଂଶୋଧିତ ନିୟମ ଅଧୀନରେ ଯଥେଷ୍ଟ ହ୍ରାସ କରାଯାଇଛି। ନୂତନ ଜରିମାନା ଗାଡ଼ିର ବର୍ଗ ଏବଂ ଉଲ୍ଲଂଘନର ସଂଖ୍ୟା (ପ୍ରଥମ ନା ବାରମ୍ବାର) ଉପରେ ନିର୍ଭର କରିବ।

ମୋଟରସାଇକେଲ୍, ବାଇକ୍ ଏବଂ ଯାତ୍ରୀ କିମ୍ବା ସାମଗ୍ରୀ ପରିବହନ ପାଇଁ ବ୍ୟବହୃତ ତିନି ଚକିଆ ଯାନ ପାଇଁ ପ୍ରଥମ ଉଲ୍ଲଂଘନ ନିମନ୍ତେ ଜରିମାନା ୧,୦୦୦ ଟଙ୍କା ଏବଂ ଦ୍ୱିତୀୟ କିମ୍ବା ପରବର୍ତ୍ତୀ ଉଲ୍ଲଂଘନ ପାଇଁ ୨,୦୦୦ ଟଙ୍କା ସ୍ଥିର କରାଯାଇଛି। ସେହିପରି ମୋଟର କ୍ୟାବ୍, କାର୍ କିମ୍ବା ଜିପ୍ ପାଇଁ ପ୍ରଥମ ଉଲ୍ଲଂଘନ ଉପରେ ୨,୦୦୦ ଟଙ୍କା ଏବଂ ପରବର୍ତ୍ତୀ ଉଲ୍ଲଂଘନ ଉପରେ ୫,୦୦୦ ଟଙ୍କା ଜରିମାନା ଆଦାୟ କରାଯିବ। ଟ୍ରାକ୍ଟର ଏବଂ ଟ୍ରେଲରଗୁଡ଼ିକ ପାଇଁ ମଧ୍ୟ ଏହି ସମାନ ନିୟମ ଲାଗୁ ହେବ। ଏହି ବର୍ଗରେ ଆସୁନଥିବା ଅନ୍ୟାନ୍ୟ ଯାନଗୁଡ଼ିକ ପାଇଁ ପ୍ରଥମ ଉଲ୍ଲଂଘନ ନିମନ୍ତେ ୩,୦୦୦ ଟଙ୍କା ଓ ପରବର୍ତ୍ତୀ ଉଲ୍ଲଂଘନ ପାଇଁ ୬,୦୦୦ ଟଙ୍କା ଜରିମାନା ଧାର୍ଯ୍ୟ କରାଯାଇଛି।

ଗାଡ଼ି ମାଲିକ, ବିଭିନ୍ନ ସଙ୍ଗଠନ ଏବଂ ଗଣମାଧ୍ୟମ ପକ୍ଷରୁ ପ୍ରଦୂଷଣ ପରୀକ୍ଷା କେନ୍ଦ୍ରର ଉପଲବ୍ଧତା ଏବଂ କଠୋର ନିୟମକୁ ନେଇ ଉଦ୍ବେଗ ପ୍ରକାଶ ପାଇବା ପରେ ଏହି ନିଷ୍ପତ୍ତି ନିଆଯାଇଥିବା ମନ୍ତ୍ରୀ ଶ୍ରୀ ଜେନା ପ୍ରକାଶ କରିଛନ୍ତି। ସେ କହିଛନ୍ତି ଯେ, ଆମ ସରକାର ଲୋକଙ୍କ ସରକାର ଏବଂ ଆମେ କେବେବି ଲୋକଙ୍କ ସମସ୍ୟାକୁ ଅଣଦେଖା କରିନାହୁଁ। ଲୋକଙ୍କ ଦାବିକୁ ସମ୍ମାନ ଜଣାଇ ସରକାର ଏହି ବଡ଼ ନିଷ୍ପତ୍ତି ନେଇଛନ୍ତି। ଜରିମାନା କମିଥିଲେ ମଧ୍ୟ ସଡ଼କ ସୁରକ୍ଷା ଓ ମୋଟର ଯାନ ଆଇନର କଡ଼ା ଅନୁପାଳନ ଉପରେ ମନ୍ତ୍ରୀ ଜୋର ଦେଇଛନ୍ତି।