ଆଇଆଇଟି ଭୁବନେଶ୍ୱରରେ ଓଡିଆପ୍ରେନ୍ୟୁର୍ ୩.୦ ରାଜ୍ୟସ୍ତରୀୟ ହ୍ୟାକାଥନ୍ ଉଦ୍‌ଘାଟିତ

ଭୁବନେଶ୍ୱର: ଆଇଆଇଟି ଭୁବନେଶ୍ୱର କ୍ୟାମ୍ପସ୍‌ରେ ରାଜ୍ୟସ୍ତରୀୟ ହ୍ୟାକାଥନ୍ ୩.୦ - ‘ଓଡିଆପ୍ରେନ୍ୟୁର୍’ର ଉଦ୍‌ଘାଟନ ହୋଇଛି। ଓଡ଼ିଶାର ୧୦୧ଟି ବିଦ୍ୟାଳୟରୁ ୧୯୨ ଜଣ ଛାତ୍ରଛାତ୍ରୀ ଏଥିରେ ଯୋଗଦେଇ ବାସ୍ତବ ଜୀବନର ସମସ୍ୟାଗୁଡ଼ିକର ନବସୃଜନଶୀଳ ସମାଧାନ ପ୍ରଦର୍ଶନ କରୁଛନ୍ତି।

ଏହି କାର୍ଯ୍ୟକ୍ରମରେ ଡିଏଚ୍‌ଏସ୍‌ଇର ନିର୍ଦ୍ଦେଶିକା ଶ୍ରୀମତୀ ନିୟତି ପଟ୍ଟନାୟକ, ଆଇଏଏସ୍‌; ଡିଏଚ୍‌ଏସ୍‌ଇର ଯୁଗ୍ମ ନିର୍ଦ୍ଦେଶିକା ଶ୍ରୀମତୀ ସସ୍ମିତା ମଲି; ଡିଏଚ୍‌ଏସ୍‌ଇର ଉପନିର୍ଦ୍ଦେଶିକା ଶ୍ରୀମତୀ ସିଏଚ. ବିଜୟ ଲକ୍ଷ୍ମୀ; ୟୁନିସେଫ୍ ଓଡ଼ିଶାର ରାଜ୍ୟ ମୁଖ୍ୟ ଶ୍ରୀମତୀ ଲଳିତା ପଟ୍ଟନାୟକ; ଆଇଆଇଟି ଭୁବନେଶ୍ୱର ରିସର୍ଚ୍ଚ ଆଣ୍ଡ ଏଣ୍ଟରପ୍ରେନ୍ୟୁରସିପ୍ ପାର୍କର ସିଇଓ ଶ୍ରୀ ଶୁଭଙ୍କର ପତି; ଏବଂ ଆଇଆଇଟି ଭୁବନେଶ୍ୱରର ଡିନ୍, ଫ୍ୟାକଲ୍ଟି ଆଫେୟାର୍ସ ପ୍ରଫେସର ଉମାପ୍ରସନ୍ନ ଓଝା ପ୍ରମୁଖ ଯୋଗଦେଇ କାର୍ଯ୍ୟକ୍ରମକୁ ଗରିମାମୟ କରିଥିଲେ।

ଓଡ଼ିଶା ସରକାରଙ୍କ ଡିଏଚ୍‌ଏସ୍‌ଇ, ୟୁନିସେଫ୍ ଓଡ଼ିଶା ଏବଂ ଆଇଆଇଟି ଭୁବନେଶ୍ୱର ରିସର୍ଚ୍ଚ ଆଣ୍ଡ ଏଣ୍ଟରପ୍ରେନ୍ୟୁରସିପ୍ ପାର୍କର ମିଳିତ ପଦକ୍ଷେପ ‘ଓଡିଆପ୍ରେନ୍ୟୁର୍’ର ଲକ୍ଷ୍ୟ ହେଉଛି ଉଚ୍ଚ ମାଧ୍ୟମିକ ଛାତ୍ରଛାତ୍ରୀଙ୍କ ମଧ୍ୟରେ ସୃଜନଶୀଳତା, ନବସୃଜନ, ସମସ୍ୟା ସମାଧାନ ଦକ୍ଷତା ଏବଂ ଉଦ୍ୟୋଗୀ ମନୋଭାବର ବିକାଶ କରିବା

ଏହି ପଦକ୍ଷେପରେ ଯୁବ ଶିକ୍ଷାର୍ଥୀମାନଙ୍କଠାରୁ ୯୬୯ଟି ଚିନ୍ତାଧାରା ମିଳିଥିଲା। ସେଥିମଧ୍ୟରୁ ୭୪୯ଟିକୁ ଜିଲ୍ଲାସ୍ତରୀୟ କାର୍ଯ୍ୟକ୍ରମ ପାଇଁ ଚୟନ କରାଯାଇଥିଲା। ରାଜ୍ୟସ୍ତରୀୟ କାର୍ଯ୍ୟକ୍ରମରେ ୧୦୧ଟି ବିଦ୍ୟାଳୟର ୧୯୨ ଜଣ ଛାତ୍ରଛାତ୍ରୀ ଅଂଶଗ୍ରହଣ କରିଛନ୍ତି ଏବଂ ସେମାନଙ୍କୁ ପ୍ରାୟ ୧୦୦ ଜଣ ମେଣ୍ଟରଙ୍କ ସହଯୋଗ ମିଳୁଛି।

ଓଡିଆପ୍ରେନ୍ୟୁର୍ ଛାତ୍ରଛାତ୍ରୀମାନଙ୍କୁ ନିଜ ସମୁଦାୟର ସମସ୍ୟାଗୁଡ଼ିକୁ ଚିହ୍ନଟ କରି ସେଗୁଡ଼ିକର ନବସୃଜନଶୀଳ ବ୍ୟବହାରିକ ଏବଂ ପ୍ରଯୁକ୍ତିଭିତ୍ତିକ ସମାଧାନ ବିକଶିତ କରିବାକୁ ଉତ୍ସାହିତ କରେ। ରାଜ୍ୟସ୍ତରୀୟ ହ୍ୟାକାଥନ୍‌କୁ ଏହି ଯାତ୍ରାର ଶେଷ ନୁହେଁ ବରଂ ଏକ ନୂତନ ଆରମ୍ଭ ଭାବେ ପରିକଳ୍ପନା କରାଯାଇଛି। ଏହା ମାଧ୍ୟମରେ ପ୍ରତିଶ୍ରୁତିଶୀଳ ଚିନ୍ତାଧାରାଗୁଡ଼ିକୁ ଆଗକୁ ବଢ଼ାଇବା ପାଇଁ ଅଧିକ ମେଣ୍ଟରିଂ ପ୍ରୋଟୋଟାଇପ୍ ବିକାଶ, ଇନ୍‌କ୍ୟୁବେସନ୍ ଏବଂ ବୈଷୟିକ ସହାୟତାର ସୁଯୋଗ ପ୍ରଦାନ କରାଯିବ।

ଏହି ପଦକ୍ଷେପ ଏକ ଦୃଢ଼ ବାର୍ତ୍ତାକୁ ପୁନଃ ସ୍ପଷ୍ଟ କରେ:

ଯେତେବେଳେ ଯୁବପିଢ଼ିଙ୍କୁ ଏକ ମଞ୍ଚ, ମାର୍ଗଦର୍ଶନ ଏବଂ ବାସ୍ତବ ସମସ୍ୟାର ସମାଧାନ କରିବାର ସୁଯୋଗ ଦିଆଯାଏ, ସେତେବେଳେ ସେମାନଙ୍କ ଚିନ୍ତାଧାରା ଅର୍ଥପୂର୍ଣ୍ଣ ପରିବର୍ତ୍ତନର ଆରମ୍ଭ ବିନ୍ଦୁ ହୋଇପାରେ।”
- ଶ୍ରୀମତୀ ନିୟତି ପଟ୍ଟନାୟକ, ଆଇଏଏସ୍‌, ନିର୍ଦ୍ଦେଶିକା, ଡିଏଚ୍‌ଏସ୍‌ଇ