ଭୁବନେଶ୍ୱର: ୫ ବର୍ଷ ହୋଇଥିବା ସମୟରେ ସଡ଼କ ଦୁର୍ଘଟଣାରେ ଗୋଟିଏ ଗୋଡ଼ ଚାଲିଗଲା। ଆଶ୍ରାବାଡ଼ି ହିଁ ଜୀବନର ସାହାରା ବନିଲା। ସେହି ବାଡ଼ି ସହାୟତାରେ ୧୪ ବର୍ଷ କଟିଗଲା। ଏହି ଯୁବକ ଜଣକ ହେଉଛନ୍ତି କେନ୍ଦୁଝର ଜିଲ୍ଲା ଝୁମ୍ପୁରା ବ୍ଲକ ଅନ୍ତର୍ଗତ ବାଲିବନ୍ଧ ନିବାସୀ ଅଭିଷେକ ପ୍ରଧାନ। ତେବେ ଦୀର୍ଘ ୧୪ ବର୍ଷର ନିରବ ସଂଘର୍ଷ ପରେ ଅଭିଷେକଙ୍କ ଜୀବନରେ ନୂଆ ଆଶା ସଞ୍ଚାର କରିଥିଲା ଓଡ଼ିଶା ମୋ ପରିବାର। ଅନୁଷ୍ଠାନ ସହାୟତାରେ ଅଭିଷେକ ନା କେବଳ ନୂଆ ଗୋଡ଼ ପାଇଲେ ବରଂ ଜୀବନ ବଞ୍ଚିବା ପାଇଁ ତାଙ୍କୁ ମିଳିଲା ନୂଆ ପ୍ରେରଣା। ଅଭିଷେକ ଆଜି ନିଜ ସାଙ୍ଗ ସାଥୀଙ୍କ ସହ ସାଧାରଣ ଜୀବନ ବିତାଇବାକୁ ସମର୍ଥ ହୋଇଛନ୍ତି।

ସୂଚନା ଅନୁସାରେ, ଅଭିଷେକ ସମ୍ପ୍ରତି କେନ୍ଦୁଝରର ଧରଣୀଧର ସ୍ୱୟଂଶାସିତ ମହାବିଦ୍ୟାଳୟରେ ଯୁକ୍ତ ତିନିର କମ୍ପ୍ୟୁଟର ବିଜ୍ଞାନ ବିଭାଗରେ ଅଧ୍ୟୟନରତ। ଆଶ୍ରାବାଡ଼ି ବିନା ଗୋଟିଏ ପାଦ ଚାଲିବା ତାଙ୍କ ପକ୍ଷରେ ସମ୍ଭବ ନୁହେଁ। ଶାରୀରିକ ଅକ୍ଷମତା ଠାରୁ ବଳିଯାଉଥିଲା ଅନ୍ୟମାନଙ୍କ ଟାହି ଟାପରା ଆଉ ତାଙ୍କ ଅକ୍ଷମତାକୁ ନେଇ ଅଯାଚିତ ଆଲୋଚନା। ଶେଷ ନିଃଶ୍ୱାସ ପର୍ଯ୍ୟନ୍ତ ଅକ୍ଷମତା ଓ ଅସହାୟତା ତାଙ୍କ ସହଚର ହେବ ବୋଲି ଅଭିଷେକ ନିଶ୍ଚିତ ହୋଇଯାଇଥିଲେ। କିନ୍ତୁ ଏହି ସମୟରେ ତାଙ୍କୁ ପାଇଁ ନୂଆ ସମ୍ଭାବନା ଆଣିଥିଲା ବିଜୁ ଜନତା ଦଳ। କିଛି ଦିନ ତଳେ କୌଣସି କାମରେ ଧରଣୀଧର ମହାବିଦ୍ୟାଳୟ ଆସିଥିବା ଜିଲ୍ଲା ଛାତ୍ର ବିଜେଡି ସଭାପତି ଅବିନାଶ ପଟ୍ଟନାୟକ ଅଭିଷେକଙ୍କୁ ଭେଟି ଥିଲେ। ତାଙ୍କ ଠାରୁ ସବୁ ଘଟଣା ଜାଣିବା ପରେ ଓଡ଼ିଶା ମୋ ପରିବାରର ଜିଲ୍ଳା ସଂଯୋଜକ ପ୍ରଦୀପ ସାହୁଙ୍କ ସହଯୋଗ ନିଆଯାଇଥିଲା। ଓଡ଼ିଶା ମୋ ପରିବାରର ଆବାହକ ଅରୂପ ପଟ୍ଟନାୟକଙ୍କ ନିକଟରେ କଥା ପହଞ୍ଚିଥିଲା। ଯେମିତି ବି ହେଉ ଅଭିଷେକଙ୍କ ପାଇଁ ଏକ କୃତ୍ରିମ ଅଙ୍ଗ ଯୋଗାଡ଼ କରିବା ପାଇଁ ଶ୍ରୀ ପଟ୍ଟନାୟକ ନିର୍ଦ୍ଦେଶ ଦେଇଥିଲେ। ଏହା ପରେ ଅଭିଷେକଙ୍କୁ କେନ୍ଦୁଝରରୁ ଭୁବନେଶ୍ୱର କ୍ୟାପିଟାଲ ହସ୍ପିଟାଲ ପରିସରରେ ଥିବା ଅତ୍ୟାଧୁନିକ ଥଇଥାନ କେନ୍ଦ୍ରକୁ ଅଣାଯାଇ କୃତ୍ରିମ ଗୋଡ଼ ପ୍ରସ୍ତୁତି ପାଇଁ ଉଦ୍ୟମ ଆରମ୍ଭ ହୋଇଥିଲା। ପ୍ରଥମ ଥର ପାଇଁ ଜଣେ ଭିନ୍ନକ୍ଷମ ପିଲାଙ୍କୁ ସ୍ୱାବଲମ୍ବି କରିବା ନିମନ୍ତେ ଓଡ଼ିଶା ମୋ ପରିବାର ଦୁଇ ଲକ୍ଷ ଟଙ୍କା ବ୍ୟୟରେ କୃତ୍ରିମ ଅଙ୍ଗ ପ୍ରସ୍ତୁତ କରାଯାଇଥିଲା। ଓଡ଼ିଶା ମୋ ପରିବାରର ବଦାନ୍ୟତା ଫଳରେ ଅଭିଷେକ ଆଜି ସ୍ୱାଭାବିକ ଜୀବନ ବଞ୍ଚିବା ପାଇଁ ସମର୍ଥ ହୋଇଛନ୍ତି। ଅଭିଷେକ କହିଛନ୍ତି, ଗୋଟିଏ ଗୋଡ଼ ହରାଇବା ପରେ ବର୍ଷ ବର୍ଷ ଧରି ଅକ୍ଷମ ଜୀବନ ବଞ୍ଚିବାକୁ ବାଧ୍ୟ ହୋଇଥିଲି। ଏତେ ଟଙ୍କା ଖର୍ଚ୍ଚ କରି କୃତ୍ରିମ ଗୋଡ଼ ଲଗାଇବା ମୋ ପରିବାର ପକ୍ଷରେ ସମ୍ଭବ ନଥିଲା। କିନ୍ତୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟଙ୍କ ନିର୍ଦ୍ଦେଶକ୍ରମେ ଗଢ଼ା ଯାଇଥିବା ସାମାଜିକ ଅନୁଷ୍ଠାନ ଓଡ଼ିଶା ମୋ ପରିବାର ପାଇଁ ମୁଁ ଆଜି ବିନା ଆଶ୍ରାବାଡ଼ିରେ ଚାଲିବା ପାଇଁ ସକ୍ଷମ ହୋଇଛି। ଅନ୍ୟମାନଙ୍କ ଭଳି ମୁଁ ମଧ୍ୟ ଜୀବନରେ କିଛି କରିବା ପାଇଁ ଆତ୍ମବିଶ୍ୱାସ ହାସଲ କରିଛି। ଏଥିପାଇଁ ଅନୁଷ୍ଠାନର ମୁଖ୍ୟ ଅରୂପ ପଟ୍ଟନାୟକଙ୍କୁ ଯେତେ ଧନ୍ୟବାଦ ଦେଲେ ମଧ୍ୟ କମ୍‍ ହେବ ବୋଲି ସେ କହିଛନ୍ତି।