କେଦାରନାଥରେ ଫସିଥିବା କେନ୍ଦୁଝର ଜିଲ୍ଲାର ୪ କାଉଡିଆଙ୍କୁ ସୁରକ୍ଷିତ ଉଦ୍ଧାର କଲେ ଭାରତୀୟ ସେନା

କେନ୍ଦୁଝର: କେଦାରନାଥରୁ ସୁରକ୍ଷିତ ଉଦ୍ଧାର ହେଲେ କେନ୍ଦୁଝର ଜିଲ୍ଲାର ୪ ଜଣ କାଉଡିଆ । ଫସିଥିବା କେନ୍ଦୁଝର ଜିଲ୍ଲାର ୪ ଜଣ କାଉଡିଆ ଆଜି ସୁରକ୍ଷିତ ସ୍ଥାନରେ ପହଞ୍ଚି ମଧ୍ୟାହ୍ନଭୋଜନ କରିଛନ୍ତି । ଏହି ୪ ଜଣ ଶିବଭକ୍ତଙ୍କୁ ଭୀମତାଲରୁ ହେଲିକପ୍ଟର ଯୋଗେ ସେନାର ଯବାନମାନେ ଉଦ୍ଧାର କରିଛନ୍ତି। ଉଦ୍ଧାର ବ୍ୟକ୍ତିମାନେ ହେଲେ କାର୍ତ୍ତିକେଶ୍ବର ଖିଲାର, ସଦାନନ୍ଦ ସାହୁ, ମହେଶ୍ୱର ପ୍ରଧାନ ଓ ଋଷିନାଥ ମହାନ୍ତ। ସେମାନେ ଟାକ୍ସି ମାଧ୍ୟମରେ ହରିଦ୍ୱାର ରେଳଷ୍ଟେସନ ଯାଇ ନିଜ ମୂଳ ଯୋଜନା ଅନୁଯାୟୀ ନିଜର ଯାତ୍ରା ଜାରି ରଖିବେ। ଜିଲ୍ଲାପାଳ ଏବଂ ଜିଲ୍ଲା ଶ୍ରମ ଅଧିକାରୀ ସେମାନଙ୍କ ସହ ନିରନ୍ତର ଯୋଗାଯୋଗରେ ରହିଥିବା ଜିଲ୍ଲା ପ୍ରଶାସନର ସୂଚନା ।

ସୂଚନାଯୋଗ୍ୟ, କେନ୍ଦୁଝର ଜିଲ୍ଲାରୁ କାଉଡ଼ିଯାତ୍ରାରେ କେଦାରନାଥ ଯାଇଥିବା ୪ ଜଣ ଲୋକ ଭୁ ସ୍କଳନ ଫଳରେ ବାଟରେ ତିନିଚାରିଦିନ ହେବ ଫସି ରହିଥିଲେ । ଶନିବାର ଏବାଦରେ ପରିବାର ଲୋକଙ୍କୁ ସେମାନେ ଜଣାଇବାପରେ ଜିଲ୍ଲା ପ୍ରଶାସନଙ୍କୁ ଅବଗତ କରାଯାଇଥିଲା । ନିଜେ କେନ୍ଦୁଝର ଜିଲ୍ଲାପାଳ ରୁଦ୍ର ପ୍ରୟାଗ ଜିଲ୍ଲାର ଜିଲ୍ଲାପାଙ୍କ ସହିତ କଥା ହୋଇ ସେମାନଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତରରେ ସହଯୋଗ କରିବାକୁ ନିବେଦନ କରିଥିଲେ । ସେମାନେ ସୋମବାରଦିନ ଜଙ୍ଗଲଦେଇ କିଛିବାଟ ଚାଲିଚାଲି ଆସିବାପରେ ତାଙ୍କୁ ରବିବାର ସେନାର ଯବାନମାନେ ହେଲିକପଟର ଯୋଗେ ଗୁପ୍ତେଶ୍ୱର ପର୍ଯ୍ୟନ୍ତ ସୁରକ୍ଷିତ ସ୍ଥାନକୁ ପହଞ୍ଚାଇ ଦେଇଥିବା ସୂଚନା ମିଳିଛି । ସେଠାରେ ଭଲରେ ଖାଦ୍ୟପେୟ ନେଲାପରେ ସେଠାରୁ ଟ୍ୟାକ୍ସି ଯୋଗେ ସେମାନେ ଋଷିକେଶ ଆସି ସେଠାରୁ ଟ୍ରେନରେ ଆସି ପୁରୀରେ ୮ ତାରିଖରେ ପହଁଚିବେବୋଲି ଜଣାପଡିଛି ।

ସେମାନେ ୨୭ ତାରିଖରୁ କେନ୍ଦୁଝରରୁ ବସରେ ଯାଇ ରାଉରକେଲାରୁ ଟ୍ରେନରେ କେଦାରନାଥ ଯାତ୍ରା କରିଥିଲେ। ସେଠାରେ ବଡ଼ ଧରଣର ଭୁ ସ୍କଳନ ହେବା ଫଳରେ ଫେରିବା ବାଟରେ ୪ଦିନ ହେବ ଫସି ରହିଥିଲେ । କଥା ଜଣା ପଡିବାପରେ ଚିନ୍ତା ପ୍ରକଟ କରିବା ସହିତ ପ୍ରଶାସନର ସହଯୋଗ ଲୋଡ଼ିଥିଲେ । ଜିଲ୍ଲା ପ୍ରଶାସନ ସେମାନଙ୍କ ସହିତ ଯୋଗାଯୋଗରେ ରହିଥିବାବେଳେ ସେମାନେ ସୁରକ୍ଷିତ ସ୍ଥାନରେ ପହଁଚି ସାରିଥିବାରୁ ପରିବାର ଲୋକେ ଖୁସି ପ୍ରକଟ କରିଛନ୍ତି ।