ଜଳବନ୍ଦୀ ସମସ୍ୟାର ମୁକାବିଲା ପାଇଁ ଟୋଲ୍‌‌ ଫ୍ରି ନମ୍ବର ଜାରି କଲା ବିଏମସି

ଭୁବନେଶ୍ୱର: ବର୍ଷା ଯୋଗୁଁ ରାଜଧାନୀରେ ଜଳବନ୍ଦୀ ଜନିତ ସମସ୍ୟା ଦେଖାଗଲେ ଏଥିରେ ଭୟଭୀତ ନହୋଇ ବିଏମ୍‌‌ସିକୁ ସୂଚନା ଦେବା ପାଇଁ ମେୟର ସୁଲୋଚନା ଦାସ ଅନୁରୋଧ କରିଛନ୍ତି। ଏହାସହିତ ବର୍ଷା ବିତ୍ପାତ ଓ ଜଳବନ୍ଦୀ ଜନିତ ସମସ୍ୟା ସୂଚନା ଦେବାକୁ ଦୃଷ୍ଟିରେ ରଖି ନାଗରିକମାନଙ୍କ ପାଇଁ ୨୪ ଘଣ୍ଟିଆ ସ୍ୱତନ୍ତ୍ର କଣ୍ଟ୍ରୋଲ ରୁମ୍‌‌ ଖୋଲାଯାଇଛି। ଏଥିସହିତ ୧୯୨୯ ଓ ୭୦୦୮୪୭୫୪୫୫ ଦୁଇଟି ଟୋଲ୍‌‌ ଫ୍ରି ନମ୍ବର ଜାରି କରାଯାଇଛି। ମୌସୁମୀ ଜନିତ ବର୍ଷାରେ ଯେପରି କୌଣସି ଜଳବନ୍ଦୀ ଅବସ୍ଥା ସୃଷ୍ଟି ନହୁଏ ସେଥିପ୍ରତି ସତର୍କ ରହିବାକୁ ଉପ ବିଭାଗୀୟ ଅଧିକାରୀ ଓ କର୍ମଚାରୀମାନଙ୍କୁ ମେୟର ସୁଲୋଚନା ଦାସ ନିର୍ଦ୍ଦେଶ ଦେଇଛନ୍ତି। ଏଥିସହିତ ମୌସୁମୀ ସମୟରେ ଅଧିକାରୀ ଓ କର୍ମଚାରୀଙ୍କୁ ନେଇ ଜୋନ୍‌‌ ସ୍ତରୀୟ ଟିମ୍‌‌ ଗଠନ କରିବା ସହିତ ନିୟମିତ ଡ୍ରେନ କାର୍ଯ୍ୟ ପାଇଁ ଅଧିକ କର୍ମଚାରୀ ମହଜୁଦ ରଖିବାକୁ ଶୁକ୍ରବାର ବିଏମ୍‌‌ସି କଣ୍ଟ୍ରାକ୍ଟସ ଷ୍ଟାଣ୍ଡିଂ କମିଟି ବୈଠକରେ ଏହି ନିଷ୍ପତ୍ତି ହୋଇଛି।

ଶୁକ୍ରବାର ଭୁବନେଶ୍ୱର ମହାନଗର ନିଗମର କଣ୍ଟ୍ରାକ୍ଟସ ଷ୍ଟାଣ୍ଡିଂ କମିଟି ବୈଠକ ଅନୁଷ୍ଠିତ ହୋଇଥିଲା। ଏହି ବୈଠକରେ ମୌସୁମୀ ମୁକାବିଲା ସମେତ ମହାନଗର ନିଗମ ଅଧିନସ୍ଥ ବିଭିନ୍ନ ୱାର୍ଡରେ ହେବାକୁ ଥିବା ୬ଟି ଡ୍ରେନ୍‌‌ ଓ ୫ଟି ରାସ୍ତାକୁ ଅନୁମୋଦନ ମିଳିଛି। ଏଥିସହିତ କଞ୍ଜରଭେନସି ଲେନରେ ପେଭର ବ୍ଲକ କାମକୁ ଅନୁମୋଦନ କରାଯାଇଛି। ବିବେକାନନ୍ଦ ମାର୍ଗସ୍ଥିତ ଆର୍‌‌ ଆଣ୍ଡ ବି ରାସ୍ତା ବାମ ପାର୍ଶ୍ବ ଡ୍ରେନକୁ ୫୫ ନଂ ୱାର୍ଡରେ ଥିବା ୭ ନଂ ମୁଖ୍ୟ ଡ୍ରେନ ପର୍ଯ୍ୟନ୍ତ ସିମେଣ୍ଟ କଂକ୍ରିଟ ଡ୍ରେନ୍‌‌ ନିର୍ମାଣ, ୩୨ ନଂ ୱାର୍ଡର ମହାଦେବ ନଗର ଛକରୁ ଗଙ୍ଗୁଆ ବ୍ରିଜ ଯାଏଁ ବକ୍ସ ଡ୍ରେନ ନିର୍ମାଣ, ୱାର୍ଡ ନଂ ୫ ସତ୍ୟ ବିହାର ଭିତରେ ଥିବା ଶାଖା ଡ୍ରେନ ଗୁଡିକୁ ମୁଖ୍ୟ ଡ୍ରେନ ସହିତ ସଂଯୋଗ କରିବା ସହିତ ସ୍ଲାବ ପକାଇବା, ୩୮ ନଂ ୱାର୍ଡର କ୍ରିଷ୍ଣା ଟାୱାରରୁ ଭୋଇ ସାହି ସର୍ଭିସ୍‌‌ ରାସ୍ତା ପର୍ଯ୍ୟନ୍ତ ଆର୍‌‌ସିସି ଡ୍ରେନ ଓ ସ୍ଲାବ ନିର୍ମାଣ, ଦୟା ୱେଷ୍ଟ କେନାଲ ଠାରୁ ଲକ୍ଷ୍ମୀସାଗର ମୁଖ୍ୟ ରାସ୍ତା ଓସ୍କାର ସିଟି ଦେଇ ଗଙ୍ଗୁଆ ନାଳ ଯାଏଁ ଆରସିସି ଡ୍ରେନ ଓ ସ୍ଲାବ ନିର୍ମାଣ, ୱାର୍ଡ ନଂ ୪୩ ଅଧିନସ୍ଥ ଲକ୍ଷ୍ମୀସାଗର ଫିସେରୀ ଟ୍ୟାଙ୍କ ଆଖପାଖରେ ଆରସିସି ବକ୍ସ ସେଲ୍‌ଫ ଡ୍ରେନ ନିର୍ମାଣ କାମକୁ ଅନୁମୋଦନ କରାଯାଇଛି।

ସେହିପରି ୪ ନଂ ୱାର୍ଡର ପୁରୁଣା ଜେନା ଢାବା ଠାରୁ ଝାଲିଆଗଡ଼ ଆଡ଼କୁ ହରିଦାସପୁର ପର୍ଯ୍ୟନ୍ତ ରାସ୍ତା ନିର୍ମାଣ, ପୁରୀ ମୁଖ୍ୟ କେନାଲ ଝାଲିଆଗଡ଼ ଠାରୁ ୟୁଏନ ରଥ ଘର ଏବଂ ବାସୁଦେବ ଛକ ଦେଇ ମହାରଥା ବିଦ୍ୟାପୀଠ ଯାଏଁ ରାସ୍ତା ନିର୍ମାଣ, ୪ ନଂ ୱାର୍ଡ ଅନ୍ତର୍ଗତ ପୁରୀ ମୁଖ୍ୟ କେନାଲରୁ ଜୟଦେବ କଲେଜ ପର୍ଯ୍ୟନ୍ତ ରାସ୍ତା ନିର୍ମାଣ, ରୁଦ୍ରପୁର କେନାଲ ବ୍ରିଜ ଠାରୁ ମୁସଲିମ ସାହି ଛକ ପର୍ଯ୍ୟନ୍ତ ରାସ୍ତା ନିର୍ମାଣ ଓ ୱାର୍ଡ ନଂ ୩୨ ର ମହାଦେବ ନଗର ଛକରୁ ଗଙ୍ଗୁଆ ବ୍ରିଜ ଯାଏଁ ରାସ୍ତା ନିର୍ମାଣ ପ୍ରକଳ୍ପକୁ ଅନୁମୋଦନ ମିଳିଛି। ଏଥିସହିତ ୩୫ ନଂ ୱାର୍ଡର ୟୁନିଟ ୩ ଖାରବେଳ ନଗର ଲେବର କଲୋନୀ କଞ୍ଜରଭେନସି ଲେନରେ ପେଭର ବ୍ଲକ ପକାଇବା କାମକୁ ଅନୁମୋଦନ କରାଯାଇଛି।