ରାଜ୍ୟରେ SIR ପାଇଁ 'ଭୋଟର ତାଲିକା ପର୍ଯ୍ୟବେକ୍ଷକ' ଭାବେ ୧୦ IAS ଅଧିକାରୀ ନିଯୁକ୍ତ

ଭୁବନେଶ୍ୱର: ଭାରତର ନିର୍ବାଚନ କମିଶନ (ECI) ଓଡ଼ିଶାରେ ସ୍ୱତନ୍ତ୍ର ଭୋଟର ତାଲିକା ସଂଶୋଧନ ପାଇଁ ୧୦ ଜଣ ବରିଷ୍ଠ ଆଇଏଏସ୍ (IAS) ଅଧିକାରୀଙ୍କୁ ଇଲେକ୍ଟୋରାଲ୍ ରୋଲ୍ ଅବଜରଭର୍ ବା 'ଭୋଟର ତାଲିକା ପର୍ଯ୍ୟବେକ୍ଷକ' ଭାବେ ନିଯୁକ୍ତ କରିଛନ୍ତି। ୧ ଜୁଲାଇ ୨୦୨୬ କୁ ଯୋଗ୍ୟତା ତାରିଖ ଭାବେ ଗ୍ରହଣ କରାଯାଇ ଏହି ସ୍ୱତନ୍ତ୍ର ଏବଂ ବ୍ୟାପକ ଭୋଟର ତାଲିକା ସଂଶୋଧନ ପ୍ରକ୍ରିୟା ଅନୁଷ୍ଠିତ ହେବ ବୋଲି ଅତିରିକ୍ତ ମୁଖ୍ୟ ନିର୍ବାଚନ ଅଧିକାରୀ ସୁଶାନ୍ତ କୁମାର ମିଶ୍ର ସୂଚନା ଦେଇଛନ୍ତି।

ଏହି ବରିଷ୍ଠ ଅଧିକାରୀମାନଙ୍କୁ ରାଜ୍ୟର ବିଭିନ୍ନ ଜିଲ୍ଲାର ଦାୟିତ୍ୱ ଦିଆଯାଇଛି। ସେମାନଙ୍କର ଦାୟିତ୍ୱ ନିମ୍ନଲିଖିତ ଅଟେ:
* ରାଜେଶ ପ୍ରଭାକର ପାଟିଲ: ଜଗତସିଂହପୁର, କେନ୍ଦ୍ରାପଡ଼ା ଏବଂ ଯାଜପୁର
* ଅରବିନ୍ଦ ଅଗ୍ରୱାଲ: ବାଲେଶ୍ୱର, ଭଦ୍ରକ ଏବଂ ମୟୂରଭଞ୍ଜ
* ବଳୱନ୍ତ ସିଂ: କଳାହାଣ୍ଡି, ବଲାଙ୍ଗୀର ଏବଂ ନୂଆପଡ଼ା
* ବି. ପରମେଶ୍ୱରନ: ସୁବର୍ଣ୍ଣପୁର, ବୌଦ୍ଧ ଏବଂ କନ୍ଧମାଳ
* ଡ. ବିଜୟ କେତନ ଉପାଧ୍ୟାୟ: ଦେବଗଡ଼, ସମ୍ବଲପୁର ଏବଂ ବରଗଡ଼
* ଡି. ପ୍ରସନ୍ନ କୁମାର ରେଡ୍ଡୀ: ଗଞ୍ଜାମ, ଗଜପତି ଏବଂ ରାୟଗଡ଼ା
* ସୁଧାଂଶୁ ମୋହନ ସାମଲ: କଟକ, ଢେଙ୍କାନାଳ ଏବଂ ଅନୁଗୋଳ
* ରଶ୍ମିତା ପଣ୍ଡା: ପୁରୀ, ଖୋର୍ଦ୍ଧା, ନୟାଗଡ଼ ଏବଂ ଭୁବନେଶ୍ୱର
* ମହମ୍ମଦ ସାଦିକ୍ ଆଲାମ: ନବରଙ୍ଗପୁର, କୋରାପୁଟ ଏବଂ ମାଲକାନଗିରି
* ସଂଗ୍ରାମ କେଶରୀ ମହାପାତ୍ର: କେନ୍ଦୁଝର, ସୁନ୍ଦରଗଡ଼ ଏବଂ ଝାରସୁଗୁଡ଼ା

ନିର୍ବାଚନ କମିଶନଙ୍କ ନିର୍ଦ୍ଦେଶ ଅନୁଯାୟୀ, ପର୍ଯ୍ୟବେକ୍ଷକମାନେ ସଂଶୋଧନ ପ୍ରକ୍ରିୟା ସମୟରେ ଅତିକମରେ ୩ ଥର ନିଜ ନିଜ ଦାୟିତ୍ୱରେ ଥିବା ଜିଲ୍ଲା ଗସ୍ତ କରିବେ। ସେମାନେ ବିଭିନ୍ନ ବିଧାନସଭା କ୍ଷେତ୍ରର ଭୋଟଗ୍ରହଣ କେନ୍ଦ୍ରଗୁଡ଼ିକୁ ପରିଦର୍ଶନ କରିବା ସହ ସାଂସଦ, ବିଧାୟକ ଏବଂ ରାଜନୈତିକ ଦଳର ପ୍ରତିନିଧିମାନଙ୍କ ସହ ଆଲୋଚନା କରିବେ। ସାଧାରଣ ଜନତା ମଧ୍ୟ ନିଜର ଅଭିଯୋଗ ନେଇ ସିଧାସଳଖ ପର୍ଯ୍ୟବେକ୍ଷକମାନଙ୍କୁ ଭେଟିପାରିବେ। 

ଜିଲ୍ଲା ପ୍ରଶାସନ ପକ୍ଷରୁ ପର୍ଯ୍ୟବେକ୍ଷକମାନଙ୍କ ଗସ୍ତ ସୂଚୀ ଏବଂ ଯୋଗାଯୋଗ ନମ୍ବର ବ୍ୟାପକ ଭାବେ ପ୍ରଚାର କରାଯିବ। ଯେଉଁ ଅଞ୍ଚଳରେ ନାମ ବାଦ୍ ପଡ଼ିବା କିମ୍ବା ଯୋଡ଼ିହେବା ହାର ଜିଲ୍ଲା ସ୍ତରରେ ୧% ରୁ ଅଧିକ କିମ୍ବା ବିଧାନସଭା କ୍ଷେତ୍ର ସ୍ତରରେ ୩% ରୁ ଅଧିକ ରହିବ, ସେଠାରେ ପର୍ଯ୍ୟବେକ୍ଷକମାନେ ବ୍ୟକ୍ତିଗତ ଭାବେ ରିପୋର୍ଟ ଏବଂ କାରଣର ଅନୁଧ୍ୟାନ କରିବେ। ଏହି ସମ୍ପୂର୍ଣ୍ଣ ପ୍ରକ୍ରିୟା ଶେଷ ହେବା ପରେ ଅଧିକାରୀମାନେ ଓଡ଼ିଶାର ମୁଖ୍ୟ ନିର୍ବାଚନ ଅଧିକାରୀ (CEO) ଙ୍କୁ ବିସ୍ତୃତ ରିପୋର୍ଟ ପ୍ରଦାନ କରିବେ। କୌଣସି ଯୋଗ୍ୟ ଭୋଟର ଯେପରି ବାଦ୍ ନପଡ଼ନ୍ତି ଏବଂ କୌଣସି ଅଯୋଗ୍ୟ ବ୍ୟକ୍ତିଙ୍କ ନାମ ଯେପରି ସାମିଲ ନହୁଏ, ତାହା ସୁନିଶ୍ଚିତ କରିବାକୁ ଅଧିକାରୀମାନଙ୍କୁ କଡ଼ା ନିର୍ଦ୍ଦେଶ ଦିଆଯାଇଛି।

ଖସଡ଼ା ଭୋଟର ତାଲିକା ୫ ଜୁଲାଇ ୨୦୨୬ ରେ ପ୍ରକାଶ ପାଇବ। ନାଗରିକମାନେ ନିଜର ଦାବି ଏବଂ ଆପତ୍ତି ଅଭିଯୋଗକୁ ଫର୍ମ-୬, ୭ ଏବଂ ୮ ମାଧ୍ୟମରେ ୫ ଜୁଲାଇ ରୁ ୪ ଅଗଷ୍ଟ ୨୦୨୬ ମଧ୍ୟରେ ଦାଖଲ କରିପାରିବେ।