ଆର୍ଥିକ ସଙ୍କଟରେ କୋଟିପତି ୟୁଟ୍ୟୁବର ଅନୁରାଗ: ୧୦ କୋଟିର ବାଇକ୍ ବିକ୍ରି କଲେ, ରହିବାକୁ ନାହିଁ ଘର

ଲୋକପ୍ରିୟ ୟୁଟ୍ୟୁବର ତଥା 'ବିଗ୍ ବସ୍ ୧୭' (Bigg Boss 17) ର ପ୍ରତିଯୋଗୀ ରହିସାରିଥିବା ଅନୁରାଗ ଡୋଭାଲ (Anurag Dobhal) ଏବେ ନିଜ ଜୀବନର ସବୁଠାରୁ କଠିନ ପରିସ୍ଥିତି ଦେଇ ଗତି କରୁଛନ୍ତି। ଗତ କିଛି ସମୟ ଧରି ପରିବାର ସହିତ ବିବାଦ ଏବଂ ଏକ ସଡ଼କ ଦୁର୍ଘଟଣାର ସମ୍ମୁଖୀନ ହେବା ପରେ ଏବେ ସେ ଗୁରୁତର ଆର୍ଥିକ ସଙ୍କଟରେ ପଡ଼ିଛନ୍ତି। ନିଜର ଏକ ନୂଆ ଭ୍ଲଗ୍‌ରେ ସେ ପ୍ରଶଂସକମାନଙ୍କୁ ନିଜର ଦୁର୍ଦ୍ଦଶା ବଖାଣିବା ସହ ଭାବପ୍ରବଣ ହୋଇଯାଇଛନ୍ତି।

୧୦ କୋଟି ଟଙ୍କାର ବାଇକ୍ କଲେକ୍ସନ୍ ବିକ୍ରି

ନିକଟରେ ଅନୁରାଗ ଏକ ୟୁଟ୍ୟୁବ୍ ଭ୍ଲଗ୍ ସେୟାର କରିଛନ୍ତି, ଯେଉଁଥିରେ ସେ ଡେରାଡୁନ୍ ରାସ୍ତାରେ ବୁଲୁଥିବାର ନଜର ଆସିଛନ୍ତି। ଏହି ସମୟରେ ସେ ନିଜର ଖାଲି ପଡ଼ିଥିବା ଗ୍ୟାରେଜ୍ ପ୍ରଶଂସକମାନଙ୍କୁ ଦେଖାଇଥିଲେ। ସେ କହିଛନ୍ତି ଯେ ନିଜର ଗୁଜୁରାଣ ମେଣ୍ଟାଇବା ପାଇଁ ତାଙ୍କୁ ପ୍ରାୟ ୧୦ କୋଟି ଟଙ୍କା ମୂଲ୍ୟର ଲକ୍ସଜୁରୀ ବାଇକ୍ କଲେକ୍ସନ୍ ବିକ୍ରି କରିବାକୁ ପଡ଼ିଛି। ବର୍ତ୍ତମାନ ତାଙ୍କ ପାଖରେ କେବଳ ଦୁଇଟି ବାଇକ୍ ବଳକା ରହିଛି।

ଖାଲି ପଡ଼ିଛି ବର୍ଷ ବର୍ଷର ସାମ୍ରାଜ୍ୟ

ନିଜ ଗ୍ୟାରେଜ୍‌କୁ ଖାଲି ଦେଖି ଅନୁରାଗ କାନ୍ଦି ପକାଇଥିଲେ। ସେ କହିଥିଲେ, 'ଯେଉଁ ସାମ୍ରାଜ୍ୟ ମୁଁ ଛିଡ଼ା କରିଥିଲି, ଆଜି ତାହା ସମ୍ପୂର୍ଣ୍ଣ ଖାଲି ପଡ଼ିଛି। ମୁଁ ଆର୍ଥିକ ସଙ୍କଟର ସମ୍ମୁଖୀନ ହେଉଥିଲି ଏବଂ ମୋତେ ଟଙ୍କାର ନିହାତି ଆବଶ୍ୟକତା ଥିଲା, ତେଣୁ ମୁଁ ମୋର ପ୍ରିୟ ବାଇକ୍‌ଗୁଡ଼ିକୁ ବିକ୍ରି କରିବାକୁ ବାଧ୍ୟ ହେଲି। ସେହି ସମୟରେ ମୁଁ କିପରି ବଞ୍ଚିଥିଲି, ତାହା କେବଳ ମୁଁ ହିଁ ଜାଣେ।'

ରହିବାକୁ ନାହିଁ ନିଜର ଘର

ଆର୍ଥିକ ଦୁର୍ଦ୍ଦଶା କେବଳ ବାଇକ୍ ବିକ୍ରିରେ ସୀମିତ ନାହିଁ; ତାଙ୍କର ନିଜସ୍ୱ କୌଣସି ଘର ମଧ୍ୟ ନାହିଁ ବୋଲି ସେ ପ୍ରକାଶ କରିଛନ୍ତି। ଯେଉଁ ଗ୍ୟାରେଜ୍‌ରେ ସେ ବାଇକ୍ ରଖୁଥିଲେ, ସେହି ଜାଗା ମଧ୍ୟ ତାଙ୍କ ନାମରେ ନଥିବାରୁ ଏହାର ବିଜୁଳି ସଂଯୋଗ କାଟି ଦିଆଯାଇଛି। ତେବେ ଏତେ ସବୁ ଘାତ-ପ୍ରତିଘାତ ସତ୍ତ୍ୱେ ଅନୁରାଗ ପୁଣିଥରେ ନିଜ ଜୀବନକୁ ସଜାଡ଼ିବାକୁ ଚେଷ୍ଟା କରୁଛନ୍ତି ଏବଂ ୟୁଟ୍ୟୁବ୍‌ରେ ପୁଣି ସକ୍ରିୟ ହୋଇଛନ୍ତି。