ଅନାବଶ୍ୟକ 'ଚୁମ୍ବନ ଦୃଶ୍ୟ'କୁ ମନା କରିବାରୁ ମିଳିଲାନି କାମ, ପ୍ରଯୋଜକ ଦେଲେନି ଟଙ୍କା: ବଲିଉଡର କଳା ସତ ଖୋଲିଲେ ଅଭିନେତ୍ରୀ ନୌହିଦ ସିରୁସି

ବଲିଉଡର ଚକାଚକ୍ ଦୁନିଆ ପଛରେ ଲୁଚି ରହିଛି ଅନେକ କଳା ସତ୍ୟ । ନିକଟରେ ‘ପିୟା ବସନ୍ତୀ’ ଗୀତ ଏବଂ ‘ଅନୱାର’ ଭଳି ଫିଲ୍ମରୁ ଲୋକପ୍ରିୟତା ହାସଲ କରିଥିବା ଅଭିନେତ୍ରୀ ତଥା ମଡେଲ୍ ନୌହିଦ ସିରୁସି (Nauheed Cyrusi) ବଲିଉଡକୁ ନେଇ କିଛି ଚାଞ୍ଚଲ୍ୟକର ଖୁଲାସା କରିଛନ୍ତି । ଦୀର୍ଘ ଦିନ ଧରି ବଡ଼ ପରଦାରୁ ଦୂରେଇ ରହିବାର ପ୍ରକୃତ କାରଣ ସେ ନିଜ ପ୍ରଶଂସକମାନଙ୍କୁ ଜଣାଇଛନ୍ତି । ନିଜ ଇନଷ୍ଟାଗ୍ରାମ୍ ଆକାଉଣ୍ଟରେ ଏକ ଭିଡିଓ ସେୟାର କରି ନୌହିଦ୍ କହିଛନ୍ତି ଯେ ଅନାବଶ୍ୟକ ଚୁମ୍ବନ ଦୃଶ୍ୟକୁ ମନା କରିବା ଏବଂ ପ୍ରଯୋଜକଙ୍କ ପକ୍ଷରୁ ବକେୟା ପାରିଶ୍ରମିକ ନ ମିଳିବା କାରଣରୁ ସେ ଅଭିନୟରୁ ଦୂରେଇ ଯାଇଥିଲେ ।

ଅନାବଶ୍ୟକ 'ଚୁମ୍ବନ ଦୃଶ୍ୟ' ପାଇଁ ହରାଇଲେ ପ୍ରୋଜେକ୍ଟ

ବର୍ତ୍ତମାନର ସିନେମା ଜଗତରେ ଅନ୍ତରଙ୍ଗ ଦୃଶ୍ୟକୁ କିପରି ବାଧ୍ୟତାମୂଳକ କରାଯାଉଛି, ସେ ବିଷୟରେ ନୌହିଦ କହିଛନ୍ତି ଯେ ଫିଲ୍ମ ଚୁକ୍ତିନାମାରେ ଚୁମ୍ବନ ଦୃଶ୍ୟ ପାଇଁ ରାଜି ହେବାକୁ ବାଧ୍ୟ କରାଯାଉଛି । ସେ କହିଛନ୍ତି, "ବର୍ତ୍ତମାନ ଫିଲ୍ମରେ ଅଯଥାରେ ଚୁମ୍ବନ ଦୃଶ୍ୟ ଯୋଡ଼ାଯାଉଛି । ମୁଁ ପରଦାରେ ଏଭଳି ଦୃଶ୍ୟ କରିବାକୁ ସହଜ ମଣେ ନାହିଁ" । ସେ ଆହୁରି ମଧ୍ୟ କହିଛନ୍ତି ଯେ ଏହି ଦୃଶ୍ୟଗୁଡ଼ିକ ପାଇଁ ସେ ମନା କରିଦେବାରୁ ତାଙ୍କୁ ଅନେକ ପ୍ରୋଜେକ୍ଟ ହରାଇବାକୁ ପଡ଼ିଥିଲା । କାଷ୍ଟିଂ ବେଳେ ଏହି ସର୍ତ୍ତ ପାଇଁ ତାଙ୍କୁ ସିଧାସଳଖ ରିଜେକ୍ଟ କରାଯାଉଥିଲା ବୋଲି ସେ ପ୍ରକାଶ କରିଛନ୍ତି ।

ପ୍ରଯୋଜକ ମାରିଦେଲେ ଟଙ୍କା

ଅଭିନୟ କ୍ଷେତ୍ରରେ କେବଳ ଭୂମିକା ନୁହେଁ, ବରଂ ଆର୍ଥିକ ଶୋଷଣର ମଧ୍ୟ ସେ ଶିକାର ହୋଇଥିଲେ । ନୌହିଦ ଅଭିଯୋଗ କରିଛନ୍ତି ଯେ, ସୁଟିଂ ଶେଷ ହେବା ପରେ ଅନେକ ସମୟରେ ପ୍ରଯୋଜକମାନେ ପ୍ରାୟ ୨୫ ପ୍ରତିଶତ ପାରିଶ୍ରମିକ ଅଟକାଇ ରଖନ୍ତି । ଫିଲ୍ମ ରିଲିଜ୍ ପରେ "ଫିଲ୍ମ ଭଲ ଚାଲିଲା ନାହିଁ" କିମ୍ବା "ବ୍ୟବସାୟ ହେଲାନି" ଭଳି ଅଜୁହାତ ଦେଖାଇ ତାଙ୍କ ପ୍ରାପ୍ୟ ଟଙ୍କା ଦିଆଯାଏ ନାହିଁ । ନିଜ କାମ ସାରିବା ପରେ ମଧ୍ୟ ବିନା ପାରିଶ୍ରମିକରେ ତାଙ୍କୁ ଖାଲି ହାତରେ ଫେରିବାକୁ ପଡ଼ୁଥିଲା, ଯାହା ତାଙ୍କୁ ମାନସିକ ସ୍ତରରେ ଆଘାତ ଦେଇଥିଲା ।

ଇନଷ୍ଟାଗ୍ରାମ୍ ହିଁ ମୋର ପ୍ରକୃତ ପରିଚୟ

ବଲିଉଡର ନେଟୱାର୍କିଂ ଏବଂ ପାର୍ଟି କଲଚରରୁ ନିଜକୁ ଦୂରେଇ ରଖିବା ତାଙ୍କ ପାଇଁ ମହଙ୍ଗା ପଡ଼ିଥିଲା । ନୌହିଦ କହିଛନ୍ତି ଯେ ସେ ବଡ଼ ବଡ଼ ଅଭିନେତା କିମ୍ବା ପ୍ରଯୋଜକଙ୍କ ଗୋଷ୍ଠୀରେ ବୁଲିବାକୁ ପସନ୍ଦ କରୁନଥିଲେ । ଏହି କାରଣରୁ ତାଙ୍କୁ କେବଳ ହିରୋଙ୍କ ଭଉଣୀ କିମ୍ବା ଭାଉଜ ଭଳି ଛୋଟ ଚରିତ୍ର ମିଳୁଥିଲା, ଯାହାକୁ ସେ କରିବାକୁ ଚାହୁଁନଥିଲେ । ତେବେ ପାରମ୍ପରିକ ଅଭିନୟ ଛାଡ଼ିବା ପରେ ଏବେ ସେ ଜଣେ ସୋସିଆଲ ମିଡିଆ ଇନଫ୍ଲୁଏନ୍ସର ଭାବରେ ବେଶ୍ ଖୁସି ଅଛନ୍ତି । ସେ ଗର୍ବର ସହ କହିଛନ୍ତି ଯେ, "ଇନଷ୍ଟାଗ୍ରାମ୍ ହିଁ ମୋର ପ୍ରକୃତ କଲିଂ" ଏବଂ ଏଠାରେ ସେ ନିଜ ସର୍ତ୍ତରେ କାମ କରି ବେଶ୍ ସନ୍ତୁଷ୍ଟ ଅଛନ୍ତି ।