ଡେଲିଭରୀ ବଏ, କ୍ୟାବ୍‌ ଡ୍ରାଇଭରଙ୍କୁ ମିଳିବ ବୀମା; ପଞ୍ଜୀକରଣ ପାଇଁ ୯୦ ଦିନ କାମ କରିଥିବା ଜରୁରୀ

ନୂଆଦିଲ୍ଲୀ: ଦେଶର ଦ୍ରୁତ ଗତିରେ ବଢ଼ୁଥିବା ଗିଗ୍ ଅର୍ଥନୀତିକୁ ମିଳିବ ଆଇନଗତ ସୁରକ୍ଷା। ନୂତନ ସାମାଜିକ ସୁରକ୍ଷା ସଂହିତାରେ ଗିଗ୍‌ ୱାର୍କର, ଯେପରିକି ଜୋମାଟୋ, ସ୍ୱିଗି ଏବଂ ବ୍ଲିଙ୍କିଟ୍ ସମେତ ଅନ୍ୟାନ୍ୟ କମ୍ପାନୀର ଡେଲିଭରି ବୟ ଏବଂ କ୍ୟାବ୍ ଡ୍ରାଇଭରମାନଙ୍କୁ ସାମାଜିକ ସୁରକ୍ଷା ପରିସରଭୁକ୍ତ କରାଯାଇଛି। ସେମାନଙ୍କୁ ଏଣିକି ଜୀବନ ବୀମା, ସ୍ବାସ୍ଥ୍ୟ ବୀମା ଏବଂ ଦୂର୍ଘଟଣାଜନିତ ବୀମା କଭର ମିଳିବ। ସରକାର ଏଥିପାଇଁ ଚିଠା ନିୟମ ଜାରି କରିଛନ୍ତି। ଏହି ନିୟମ ଅନୁଯାୟୀ, ସାମାଜିକ ସୁରକ୍ଷା ଲାଭ ପାଇବା ପାଇଁ ଯୋଗ୍ୟ ହେବା ନିମନ୍ତେ ଗୋଟିଏ କମ୍ପାନୀ (ଏଗ୍ରିଗେଟର) ସହିତ ଜଡିତ କର୍ମଚାରୀମାନଙ୍କୁ ସେହି କମ୍ପାନୀରେ ବର୍ଷରେ ଅତି କମ୍‌ରେ ୯୦ ଦିନ କାମ କରିଥିବା ଜରୁରୀ। ଏକାଧିକ ପ୍ଲାଟଫର୍ମରେ କାମ କରୁଥିବା ବ୍ୟକ୍ତିଙ୍କ ପାଇଁ ଏହି ସୀମା ୧୨୦ ଦିନ ରଖାଯାଇଛି। 

ଯଦି ଜଣେ ବ୍ୟକ୍ତି ଗୋଟିଏ ଦିନରେ ତିନୋଟି ଭିନ୍ନ କମ୍ପାନୀରେ କାମ କରନ୍ତି, ତେବେ ଏହାକୁ ତିନି ଦିନ ଗଣନା କରାଯିବ, ଯାହା ୧୨୦ ଦିନର କୋଟା ପୂରଣ କରିବା ସହଜ କରିବ। ଏହି ପ୍ରକ୍ରିୟାକୁ ସ୍ୱଚ୍ଛ କରିବା ପାଇଁ ସରକାର ପଞ୍ଜୀକରଣକୁ ବାଧ୍ୟତାମୂଳକ କରିଛନ୍ତି। ୧୬ ବର୍ଷରୁ ଅଧିକ ବୟସର ପ୍ରତ୍ୟେକ ଗିଗ୍‌ କର୍ମଚାରୀଙ୍କୁ ପଞ୍ଜୀକରଣ କରିବାକୁ ପଡିବ, ଯାହା ସେମାନଙ୍କର ଆଧାର କାର୍ଡ ସହିତ ଲିଙ୍କ୍ ହେବ। ଶ୍ରମିକଙ୍କ ତଥ୍ୟ ଇ-ଶ୍ରମ ପୋର୍ଟାଲରେ ରେକର୍ଡ କରାଯିବ। ଯେପରି ପିଏଫ୍ କଟୁଥିବା କର୍ମଚାରୀମାନଙ୍କର ଏକ ସ୍ଥାୟୀ ନମ୍ବର ଥାଏ, ସେହିପରି ଗିଗ୍ କର୍ମୀଚାରୀଙ୍କୁ ମଧ୍ୟ ଏକ ଅନନ୍ୟ ପରିଚୟ ନମ୍ବର ଦିଆଯିବ। ପ୍ରତ୍ୟେକ ପଞ୍ଜିକୃତ କର୍ମଚାରୀ ଏକ ଡିଜିଟାଲ୍ ପରିଚୟ ପତ୍ର ପାଇବେ, ଯାହା ସାରା ଦେଶରେ ସେମାନଙ୍କର ପରିଚୟ ଏବଂ ଯୋଗ୍ୟତା ପ୍ରମାଣିତ କରିବ।