ଭୁବନେଶ୍ୱର : ଆସନ୍ତା ଜାନୁଆରୀ ୧୨ ତାରିଖରେ ଓଡ଼ିଶା ମାଧ୍ୟମିକ ସ୍କୁଲ ଶିକ୍ଷକ ଦକ୍ଷତା ପରୀକ୍ଷା(ଓଏସଏସଟିଇଟି) ଏବଂ କେନ୍ଦ୍ରୀୟ ଶିକ୍ଷକ ଦକ୍ଷତା ପରୀକ୍ଷା(ସିଟିଇଟି) ଅନୁଷ୍ଠିତ ହେବ। ଗୋଟିଏ ଦିନରେ ଦୁଇଟି ପରୀକ୍ଷା ଥିବାରୁ ଉଭୟ ପରୀକ୍ଷା ପାଇଁ ଆବେଦନ କରିଥିବା ପିଲାଙ୍କ ଚିନ୍ତା ବଢ଼଼ିଛି। ୧୨ ତାରିଖରେ ଅନେକ ଛାତ୍ରଛାତ୍ରୀଙ୍କ ସିଟିଇଟି ଓ ଓଏସଏସଟିଇଟି ପରୀକ୍ଷା ରହିଥିବାବେଳେ ସେମାନେ କିପରି ପରୀକ୍ଷା ଦେବେ ତାହା ସେମାନଙ୍କ ଦ୍ୱନ୍ଦ୍ୱ ବଢ଼଼ାଇଛି। ତେଣୁ ପରୀକ୍ଷା ତାରିଖ ଘୁଞ୍ଚାଇବା ପାଇଁ ଛାତ୍ରଛାତ୍ରୀମାନେ ଦାବି କରିଛନ୍ତି।
ଅନ୍ତତଃପକ୍ଷେ କୌଣସି ଗୋଟିଏ ପରୀକ୍ଷାକୁ ଘୁଞ୍ଚାଇବା ଲାଗି ଆଶାୟୀମାନେ ଦାବି କରିଛନ୍ତି। ଏନେଇ ଛାତ୍ରଛାତ୍ରୀମାନେ ରାଜ୍ୟ ମାଧ୍ୟମିକ ଶିକ୍ଷା ବୋର୍ଡ଼ ନିକଟରେ ସେମାନଙ୍କ ମଧ୍ୟ ଦାବି ଉପସ୍ଥାପନ କରିଛନ୍ତି। ସୂଚନାଥାଉକି ସିଟିସଟି ପରୀକ୍ଷା ସିବିଏସଇ ବୋର୍ଡ଼ ପରିଚାଳନା କରୁଥିବାବେଳେ ଓଏସଏସଟିଇଟି ବିଏସଇ ବୋର୍ଡ଼ ପରିଚାଳନା କରୁଛି। ତେଣୁ ଯେକୌଣସି ଗୋଟିଏ ବୋର୍ଡ଼ ପରୀକ୍ଷା ତାରିଖ ପରିବର୍ତ୍ତନ କରିବାର ଆବଶ୍ୟକତା ରହିଛି ବୋଲି ସେମାନେ ମତ ପୋଷଣ କରିଛନ୍ତି।