ଗର୍ଭାବସ୍ଥାରେ ଶରୀରରେ ଆସିଥାଏ ଅନେକ ପରିବର୍ତ୍ତନ: ନିଦ୍ରାହୀନତା ଠାରୁ ହୃଦସ୍ପନ୍ଦନ ବୃଦ୍ଧି, ଜାଣନ୍ତୁ ସବିଶେଷ ତଥ୍ୟ

ଗର୍ଭାବସ୍ଥା ହେଉଛି ଜଣେ ମହିଳାଙ୍କ ଜୀବନର ଏକ ଗୁରୁତ୍ୱପୂର୍ଣ୍ଣ ସମୟ, ଯେଉଁଥିରେ ଶରୀର ଅନେକ ଶାରୀରିକ ଏବଂ ହରମୋନାଲ ପରିବର୍ତ୍ତନ ଦେଇ ଗତି କରିଥାଏ। ଏହି ସମୟରେ ମହିଳାମାନଙ୍କ ଶରୀରରେ କିଛି ଆଶ୍ଚର୍ଯ୍ୟଜନକ ପରିବର୍ତ୍ତନ ଦେଖାଦେଇଥାଏ। ଏଥିରେ ବିଶେଷ କରି ନିଦ୍ରାହୀନତା ଏବଂ ହୃଦସ୍ପନ୍ଦନ ବୃଦ୍ଧି ପରି ସମସ୍ୟା ସାଧାରଣତଃ ଦେଖିବାକୁ ମିଳେ।

ହରମୋନାଲ୍ ଏବଂ ଶାରୀରିକ ପରିବର୍ତ୍ତନ

ଗର୍ଭାବସ୍ଥାରେ ମହିଳାଙ୍କ ଶରୀରରେ ରକ୍ତ ପ୍ରବାହ (blood volume), ହାର୍ଟ ଆଉଟପୁଟ୍ ଏବଂ ମେଟାବୋଲିଜମ୍ ବୃଦ୍ଧି ପାଇଥାଏ। ଡାକ୍ତର କ୍ରିସ୍ କରି (Dr Chris Curry), ଯିଏକି ଓଉରା (Oura)ର ମହିଳା ସ୍ୱାସ୍ଥ୍ୟ ବିଭାଗର କ୍ଲିନିକାଲ୍ ଡିରେକ୍ଟର, ସେ ପ୍ରକାଶ କରିଛନ୍ତି ଯେ ଏହି ସମୟରେ ହରମୋନାଲ ପରିବର୍ତ୍ତନ ଯୋଗୁଁ ଶରୀରର ତାପମାତ୍ରା, ଶ୍ୱାସକ୍ରିୟା ହାର ଏବଂ ବିଶ୍ରାମ ନେଉଥିବା ସମୟରେ ହୃଦସ୍ପନ୍ଦନ ହାର (Resting Heart Rate) ପ୍ରଭାବିତ ହୋଇଥାଏ। ଏହା ଛଡ଼ା ହାର୍ଟ ରେଟ୍ ଭେରିଏବିଲିଟି (HRV) ମଧ୍ୟ ବଦଳିଥାଏ, ଯାହା ଶରୀରର ଶକ୍ତି ଉପରେ ପ୍ରଭାବ ପକାଇଥାଏ।

ଗର୍ଭବତୀ ମହିଳାମାନେ କ'ଣ ଜାଣିବା ଉଚିତ୍?

ଗର୍ଭବତୀ ମହିଳାମାନଙ୍କ ପାଇଁ ଏହିସବୁ ପରିବର୍ତ୍ତନ ବିଷୟରେ ଜାଣିବା ନିହାତି ଆବଶ୍ୟକ। ନିଦ ନଆସିବା ବା ରାତିରେ ବାରମ୍ବାର ନିଦ ଭାଙ୍ଗିବା ଗର୍ଭାବସ୍ଥାରେ ସାଧାରଣ କଥା। ଶରୀରର ତାପମାତ୍ରା ବୃଦ୍ଧି ପାଇବା ଯୋଗୁଁ ଅସ୍ୱସ୍ତି ଅନୁଭବ ହୋଇପାରେ। ଗର୍ଭବତୀ ମହିଳାମାନେ ଏହାକୁ ନେଇ ଭୟଭୀତ ନହୋଇ ପର୍ଯ୍ୟାପ୍ତ ବିଶ୍ରାମ ନେବା, ସଠିକ୍ ପରିମାଣରେ ପାଣି ପିଇବା ଏବଂ ସୁସ୍ଥ ଖାଦ୍ୟପେୟ ପ୍ରତି ଧ୍ୟାନ ଦେବା ଉଚିତ୍। ଡାକ୍ତରଙ୍କ ପରାମର୍ଶ କ୍ରମେ ନିଜର ସ୍ୱାସ୍ଥ୍ୟ ପ୍ରତି ଯତ୍ନବାନ ହେଲେ ଏହି ସମସ୍ୟାଗୁଡ଼ିକୁ ସହଜରେ ମୁକାବିଲା କରିହେବ।