ଗୌହାଟୀ: ଆଇପିଏଲ୍ ୨୦୨୩ର ଆଜିର ମ୍ୟାଚ ଗୌହାଟୀର ବର୍ଷାପାରା କ୍ରିକେଟ୍ ଷ୍ଟାଡିୟମ୍ରେ ରାଜସ୍ଥାନ ରୟାଲ୍ସ ଓ ପଞ୍ଜାବ କିଙ୍ଗସ୍ ମୁହାଁମୁହିଁ ହୋଇଛନ୍ତି। ଟସ୍ ଜିତି ରାଜସ୍ଥାନ ରୟାଲ୍ସ ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଛି। ଫଳରେ ପ୍ରଥମେ ବ୍ୟାଟିଂ କରିଥିଲା ପଞ୍ଜାବ କିଙ୍ଗସ୍ । ପଞ୍ଜାବ ୪ ୱିକେଟ ହରାଇ ୧୯୭ ରନ କରିଛି। ଏହି ମ୍ୟାଚକୁ ଜିତିବାକୁ ହେଲେ ରାଜସ୍ଥାନ ରୟାଲ୍ସକୁ ୧୯୮ ରନର ଆବଶ୍ୟକତା ରହିଛି।
ପଞ୍ଜାବକିଙ୍ଗସ୍ ପକ୍ଷରୁ ଧୂଆଁଦାର ବ୍ୟାଟିଂ ଦେଖିବାକୁ ମିଳିଥିଲା । ପ୍ରଭ ସିମ୍ରନ୍ ସିଂହ ୩୪ ବଲରେ ୬୦ ରନ କରି ଆଉଟ ହୋଇଥିଲେ । ପରେ ଜିତେଶ ଶର୍ମା ୧୬ ବଲରେ ୨୭ ରନ କରି ଆଉଟ ହୋଇଥିଲେ। ସିକନ୍ଦର ରାଜା ୨ ବଲରେ ୧ ରନ କରି ଆଉଟ ହୋଇଥିଲେ। ହେଲେ ଗୋଟିଏ ପଟେ ଅଧିନାୟକ ଶିଖର ଧାଓ୍ୱନ ପାରିକୁ ସମ୍ଭାଳିଥିଲେ। ପରେ ଶାହାରୁଖ୍ ଖାନ୍ ୧୦ ବଲର ୧୧ ରନ କରି ଆଉଟ ହୋଇଥିଲେ। ଶିଖର ଧାଓ୍ୱନ ୫୬ ବଲରେ ୮୬ ରନ କରି ଅପରାଜିତ ରହିଥିବା ବାଳେ ସାମ୍ କୁରାନ୍ ୨ ବଲରେ ୧ ରନ କରି ଅପରାଜିତ ରହିଥିଲେ ।
ରାଜସ୍ଥାନ ରୟାଲ୍ସ ପକ୍ଷରୁ ଜାସନ ହୋଲ୍ଡର ୨ଟି ୱିକେଟ ନେଇଥିବା ବେଳେ ୟୁଜବେନ୍ଦ୍ର ଚହଲ ଓ ଆର୍. ଅଶ୍ୱିନୀ ଗୋଟିଏ ଲେଖାଏଁ ୱିକେଟ ନେଇଥିଲେ।