ସୁପ୍ରିମକୋର୍ଟ ସୋମବାର ଦିନ ମୁଖ୍ୟ ନିର୍ବାଚନ ଆୟୁକ୍ତ (ସିଇସି) ଜ୍ଞାନେଶ କୁମାରଙ୍କୁ କାର୍ଯ୍ୟ କରିବାରୁ ବାରଣ କରିବା ବା ତାଙ୍କୁ ନିଲମ୍ବନ କରିବା ଦାବିକୁ ଅଗ୍ରାହ୍ୟ କରିଦେଇଛନ୍ତି। ପ୍ରଧାନ ବିଚାରପତି (ସିଜେଆଇ) ସୂର୍ଯ୍ୟକାନ୍ତ, ବିଚାରପତି ଜୟମାଲ୍ୟ ବାଗଚୀ ଏବଂ ବିଚାରପତି ଭି. ମୋହନାଙ୍କୁ ନେଇ ଗଠିତ ଖଣ୍ଡପୀଠ ସ୍ପଷ୍ଟ କରିଛନ୍ତି ଯେ, କେବଳ ଗଣମାଧ୍ୟମର ରିପୋର୍ଟ ଉପରେ ଭିତ୍ତି କରି ବିନା ତଥ୍ୟ ଯାଞ୍ଚରେ ଅନୁମାନ ଆଧାରରେ କୌଣସି ଆଦେଶ ଦିଆଯାଇପାରିବ ନାହିଁ।
ଆବେଦନକାରୀଙ୍କ ଅଭିଯୋଗ
ସାମାଜିକ କର୍ମୀ ରାକେଶ କୁମାର ସିଂହ ଏକ ଆବେଦନ କରି ଅଭିଯୋଗ କରିଥିଲେ ଯେ, ନିର୍ବାଚନ ଆୟୋଗରେ ଥିବା ଅନ୍ୟ ଦୁଇଜଣ ନିର୍ବାଚନ ଆୟୁକ୍ତ (ସୁଖବୀର ସିଂହ ସାନ୍ଧୁ ଏବଂ ବିବେକ ଯୋଶୀ)ଙ୍କ ଆପତ୍ତି ସତ୍ତ୍ୱେ ସିଇସି ଜ୍ଞାନେଶ କୁମାର ଭୋଟର ତାଲିକାର ସ୍ୱତନ୍ତ୍ର ସଂଶୋଧନ ସମ୍ବନ୍ଧୀୟ ଏକାଧିକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ଏକତରଫା ଭାବେ ନେଇଥିଲେ। ଏହି ମାମଲାରେ ଆବେଦନକାରୀଙ୍କ ପକ୍ଷରୁ ହାଜର ହୋଇଥିବା ବରିଷ୍ଠ ଆଇନଜୀବୀ ବିକାଶ ସିଂହ ତୁରନ୍ତ ସିଇସିଙ୍କୁ ନିଲମ୍ବିତ କରିବାକୁ କୋର୍ଟରେ ଦାବି କରିଥିଲେ। ଏହାସହ ନିର୍ବାଚନ ଆୟୋଗରେ ସମସ୍ତ ନିଷ୍ପତ୍ତି ସର୍ବସମ୍ମତି କ୍ରମେ ନେବାକୁ ସେ ଦାବି କରିଥିଲେ।
ସୁପ୍ରିମକୋର୍ଟଙ୍କ ଜବାବ ତଲବ
ବିନା ପ୍ରମାଣରେ ଏକତରଫା କାର୍ଯ୍ୟାନୁଷ୍ଠାନ ଗ୍ରହଣ କରାଯାଇପାରିବ ନାହିଁ ବୋଲି ସର୍ବୋଚ୍ଚ ନ୍ୟାୟାଳୟ କହିଛନ୍ତି। ଅଦାଲତ ଏହି ପ୍ରସଙ୍ଗରେ କେନ୍ଦ୍ର ସରକାର, ଭାରତୀୟ ନିର୍ବାଚନ ଆୟୋଗ (ଇସିଆଇ), ସିଇସି ଜ୍ଞାନେଶ କୁମାର ଏବଂ ଅନ୍ୟ ଦୁଇ ଆୟୁକ୍ତଙ୍କ ସମେତ ଡେପୁଟି ଇଲେକ୍ସନ୍ କମିଶନର ମନୀଷ ଗର୍ଗଙ୍କୁ ନୋଟିସ ଜାରି କରି ଜବାବ ମାଗିଛନ୍ତି।
ସିଇସିଙ୍କ ନିଲମ୍ବନ ଦାବି ଉପରେ ଖଣ୍ଡପୀଠ ପ୍ରଶ୍ନ କରିଥିଲେ ଯେ, ଯଦି ସିଇସିଙ୍କୁ ନିଲମ୍ବିତ କରାଯାଏ ତେବେ ଦେଶରେ ନିର୍ବାଚନ କିଏ ପରିଚାଳନା କରିବ? ତେବେ କୋର୍ଟ ଏକଥା ସ୍ପଷ୍ଟ କରିଛନ୍ତି ଯେ ନିର୍ବାଚନ ଆୟୋଗର ବୈଧାନିକ ନିୟମ ଉଲ୍ଲଂଘନ କରି ଯଦି କୌଣସି ନିଷ୍ପତ୍ତି ନିଆଯାଇଥିବା ଭବିଷ୍ୟତରେ ପ୍ରମାଣିତ ହୁଏ, ତେବେ କୋର୍ଟ ସେହି ନିଷ୍ପତ୍ତିକୁ ରଦ୍ଦ କରିଦେବେ |