ନୂଆଦିଲ୍ଲୀ: ଇରାନ ଏବଂ ଆମେରିକା ମଧ୍ୟରେ ଚାଲିଥିବା ଉତ୍ତେଜନା ମଧ୍ୟରେ ଭାରତ ସରକାର ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ନେଇଛନ୍ତି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଇରାନ ଉପରେ ସାମରିକ ଆକ୍ରମଣକୁ ଦୁଇ ସପ୍ତାହ ପାଇଁ ସ୍ଥଗିତ ରଖିବା ନେଇ ଘୋଷଣା କରିବା ପରେ, ଇରାନରେ ଅବସ୍ଥାପିତ ଭାରତୀୟ ଦୂତାବାସ ପକ୍ଷରୁ ନୂଆ ଆଡଭାଇଜରି ଜାରି କରାଯାଇଛି। ଇରାନରେ ଥିବା ଭାରତୀୟମାନଙ୍କୁ ଯଥାଶୀଘ୍ର ସୁରକ୍ଷିତ ଭାବେ ଦେଶ ଛାଡ଼ିବାକୁ ପରାମର୍ଶ ଦିଆଯାଇଛି।

ଏପ୍ରିଲ୍ ୮ ତାରିଖରେ ଏକ୍ସ (X) ହ୍ୟାଣ୍ଡେଲରେ ସେୟାର କରାଯାଇଥିବା ଏହି ଆଡଭାଇଜରିରେ କୁହାଯାଇଛି ଯେ, "ଏପ୍ରିଲ୍ ୭ର ଆଡଭାଇଜରି ଏବଂ ସାମ୍ପ୍ରତିକ ପରିସ୍ଥିତିକୁ ଦୃଷ୍ଟିରେ ରଖି ଇରାନରେ ଥିବା ଭାରତୀୟମାନଙ୍କୁ ତୁରନ୍ତ ଦେଶ ଛାଡ଼ିବାକୁ ପରାମର୍ଶ ଦିଆଯାଉଛି।" ଦୂତାବାସ ସହିତ ସମନ୍ୱୟ ରକ୍ଷା କରିବା ସହ ଦୂତାବାସ ପକ୍ଷରୁ ପ୍ରସ୍ତାବିତ ମାର୍ଗ ବ୍ୟବହାର କରିବାକୁ କୁହାଯାଇଛି। ଏହା ସହିତ ଦୂତାବାସର ବିନା ଅନୁମତି ଓ ପରାମର୍ଶରେ କୌଣସି ଅନ୍ତର୍ଜାତୀୟ ସୀମା ନିକଟକୁ ନଯିବା ପାଇଁ କଡ଼ା ଚେତାବନୀ ଦିଆଯାଇଛି।

ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଟ୍ରୁଥ୍ ସୋସିଆଲ୍ ମିଡିଆରେ ପୋଷ୍ଟ କରି ଇରାନ ବିରୋଧରେ ହେବାକୁ ଥିବା ସାମରିକ ଆକ୍ରମଣକୁ ୨ ସପ୍ତାହ ପାଇଁ ସ୍ଥଗିତ ରଖିଛନ୍ତି। ଷ୍ଟ୍ରେଟ୍ ଅଫ୍ ହରମୁଜ୍ ଖୋଲିବାକୁ ଇରାନ ରାଜି ହେବା ଏବଂ ଏକ ବୃହତ୍ତର ଶାନ୍ତି ଚୁକ୍ତି ଆଡ଼କୁ ଅଗ୍ରସର ହେବା ପରେ ଏହି ନିଷ୍ପତ୍ତି ନିଆଯାଇଛି। ଟ୍ରମ୍ପଙ୍କ ଏହି ଘୋଷଣା ପଶ୍ଚିମ ଏସିଆରେ ବଢ଼ୁଥିବା ଉତ୍ତେଜନାକୁ କିଛି ମାତ୍ରାରେ ହ୍ରାସ କରିଛି। ପୂର୍ବରୁ ଟ୍ରମ୍ପ ରାତି ୮ଟା ସୁଦ୍ଧା ଇରାନକୁ ଏକ ଚୁକ୍ତିରେ ରାଜି ହେବାକୁ କିମ୍ବା ପରିଣାମ ଭୋଗିବାକୁ କଡ଼ା ଧମକ ଦେଇଥିଲେ ଏବଂ ଆମେରିକାର ସାମରିକ ଲକ୍ଷ୍ୟ ପୂରଣ ହୋଇଛି ବୋଲି ସ୍ପଷ୍ଟ କରିଥିଲେ।

ଏହି ଅସ୍ତ୍ରବିରତି ଘୋଷଣା ପୂର୍ବରୁ ଆମେରିକା ରାଷ୍ଟ୍ରପତି ଇସ୍ରାଏଲ୍ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁଙ୍କ ସହ ଆଲୋଚନା କରିଥିଲେ। ଏକ ହ୍ୱାଇଟ୍ ହାଉସ୍ ସୂତ୍ରରୁ ଜଣାପଡ଼ିଛି ଯେ, ଦୁଇ ନେତାଙ୍କ ମଧ୍ୟରେ ଇରାନ ସହ ଏକ ବୃହତ୍ତର ଚୁକ୍ତି ଚୂଡ଼ାନ୍ତ କରିବା ଏବଂ ଶାନ୍ତି ପ୍ରତିଷ୍ଠା ନେଇ ବିସ୍ତୃତ ଆଲୋଚନା ହୋଇଥିଲା। ବର୍ତ୍ତମାନର ଏହି ଦୁଇ ସପ୍ତାହର ଅସ୍ତ୍ରବିରତି ସମୟରେ ଏକ ବଡ଼ ରାଜିନାମା ପାଇଁ କଥାବାର୍ତ୍ତା ଜାରି ରହିବ ବୋଲି ଆଶା କରାଯାଉଛି।