ଭୁବନେଶ୍ୱର: ରାଜଧାନୀ ଭୁବନେଶ୍ୱରରୁ ଯୁବକ ନିଖୋଜ । ଜନ୍ମଦିନ ପାର୍ଟିକୁ ଆସି ନିଖୋଜ ହୋଇଗଲେ ଯୁବକ । ୬ ଦିନ ହେଲା ମିଳୁନି ଯୁବକଙ୍କ ପତ୍ତା । ନିଖୋଜ ଯୁବକ ହେଲେ ସତ୍ୟଜିତ ଦାସ, ଘର ଖୋର୍ଦ୍ଧା ଟାଉନ ଅଞ୍ଚଳରେ ବୋଲି ଜଣାପଡିଛି । ମଦନପୁରର ଏକ ଘରୋଇ କଲେଜରେ ଦ୍ୱିତୀୟ ବର୍ଷର ଛାତ୍ର ହେଉଛନ୍ତି ସତ୍ୟଜିତ । ପରିବାରଲୋକଙ୍କ ଅଭିଯୋଗ ଅନୁଯାୟୀ, ଗତ ୧ତାରିଖ ଦିନ ସତ୍ୟଜିତ ତାଙ୍କର ସାଙ୍ଗମାନଙ୍କ ସହ ଭରତପୁର ଅଞ୍ଚଳରେ ଥିବା ଏକ କାଫେକୁ ଜନ୍ମଦିନ ପାଳନ କରିବାକୁ ଆସିଥିଲେ । ସେହିଦିନ ବିଳମ୍ବିତ ରାତି ପର୍ଯ୍ୟନ୍ତ ଘରକୁ ଫେରି ନଥିବାରୁ ଘର ଲୋକ ତାଙ୍କୁ ଫୋନ କରିଥିଲେ । କିଛି ଉତ୍ତର ନମିଳିବାରୁ ଭରତପୁର ଥାନାରେ ଅଭିଯୋଗ କରିଛନ୍ତି ପରିବାର ଲୋକେ । ତେବେ ଭରତ ପୁର ଥାନା ପୋଲିସ ଅଭିଯୋଗ ନରଖିବାରୁ ଖୋର୍ଦ୍ଧା ଟାଉନ ପୋଲିସରେ ଅଭିଯୋଗ କରିଛନ୍ତି । 

ସତ୍ୟଜିତଙ୍କ ବୟସ ୨୧ ବର୍ଷ ହେବ । ସେ ଯୁକ୍ତ ୩ରେ ପାଠ ପଢ଼ୁଛନ୍ତି । ଘରଲୋକ ବନ୍ଧୁବାନ୍ଧବ ଏବଂ ତାଙ୍କ ସାଙ୍ଗସାଥୀଙ୍କୁ ପଚାରି ବୁଝି ସାରିଲେଣି କିନ୍ତୁ କୌଣସି ପତ୍ତା ମିଳୁନାହିଁ । ନିଖୋଜ ପରଠାରୁ ସତ୍ୟଜିତଙ୍କ ମୋବାଇଲ ସ୍ବିଚ୍ ଅଫ୍ ରହିଛି । ପୋଲିସ ସତ୍ୟଜିତଙ୍କୁ ଖୋଜିବାକୁ ଉଦ୍ୟମ ଆରମ୍ଭ କରିଛି ।