ଭୁବନେଶ୍ୱର: କୋଭିଡ଼ ସମୟରେ ଲୋକେ ଆତଙ୍କରେ ଅଛନ୍ତି। ଆଗକୁ କଣ ହେବ? ଅନ୍ୟ ସହର ଭଳି ଏଠାରେ କର୍ଫ୍ୟୁ ଲାଗୁ ହେବ କି? ଏଭଳି ଅନେକ ପ୍ରଶ୍ନ ଲୋକଙ୍କ ମନରେ ଖାଣ୍ଟି ହେଉଛି। ଅନେକ ଲୋକେ ତ୍ୱରିତ ସୂଚନା ପାଇଁ କମିସନରେଟ ପୁଲିସର ଟ୍ୱିଟ୍କୁ ଫଲୋ କରୁଛନ୍ତି। କିନ୍ତୁ ଏଭଳି ସମୟରେ କମିସନରେଟ ପୁଲିସ ଏସ୍ଆରସିଙ୍କ ଗତବର୍ଷର ଗାଇଡ୍ଲାଇନ୍କୁ ଟ୍ୱିଟ୍ କରି ଲୋକଙ୍କୁ ଦ୍ୱନ୍ଦ୍ୱରେ ପକାଇଛି। ବିଏମ୍ସି ପୂର୍ବରୁ ଗୋଟିଏ ଗାଇଡ୍ଲାଇନ୍ ଜାରି କରିଥିବା ବେଳେ କମିସନରେଟ ପୁଲିସର ଏହି ପୁରୁଣା ଗାଇଡ୍ଲାଇନ ଟ୍ୱିଟ୍ ଲୋକଙ୍କ ସମସ୍ୟା ବଢ଼ାଇଛି। ସବୁଠୁ ବଡ଼କଥା ହେଲା କମିସନରେଟ ପୁଲିସର ଏଭଳି ପୁରୁଣା ଟ୍ୱିଟ୍କୁ ଦେଖି ଅନେକ ବୈଦ୍ୟୁତିକ ଗଣମାଧ୍ୟମ ଖବର ପରିବେଷଣ କରିଥିଲେ। ତାହାକୁ ନେଇ ମଧ୍ୟ ଲୋକେ ଦ୍ୱନ୍ଦ୍ୱରେ ପଡ଼ି ଯାଇଥିଲେ। ବିଭିନ୍ନ ସ୍ଥାନରୁ କମିସନରେଟ ପୁଲିସକୁ ଘନଘନ ଫୋନ୍ କଲ୍ ଆସିଥିଲା। ଶେଷରେ ବିଏମ୍ସିର ନୂତନ ଗାଇଡ୍ଲାଇନ୍କୁ ପୁଣିଥରେ ଟ୍ୱିଟ୍ କରି କମିସନରେଟ ପୁଲିସ ନିଜର ଭୁଲ ସୁଧାରିଥିଲା। ଏନେଇ ପୁଲିସ କମିସନରଙ୍କୁ ପଚାରିବାରୁ ସେ କହିଛନ୍ତି ଯେ, ସହରରେ କଟକଣା କରିବାର କ୍ଷମତା କେବଳ ବିଏମ୍ସି କମିସନରଙ୍କର। ତେଣୁ ପୁଲିସ ଏହା କରିପାରିବ ନାହିଁ। ଭୁଲରେ ପୁରୁଣା ଗାଇଡ୍ଲାଇନ୍ ଟ୍ୱିଟ୍ ହୋଇଯାଇଥିଲା। ଏହାକୁ ପରବର୍ତ୍ତୀ ସମୟରେ ସୁଧାରି ନିଆଯାଇଛି।