ଭୁବନେଶ୍ୱର: ନକଲି ପୋଲିସ ସାଜି ଲୋକଙ୍କୁ ଲୁଟୁଥିଲେ ଠକ ବାପା-ପୁଅ । ଉଭୟଙ୍କୁ ବାନ୍ଧିଲା କମିସନରେଟ୍ ପୋଲିସ । କେତେବେଳେ ପିସିଆର ଇନଚାର୍ଜ ତ ପୁଣି କେତେବେଳେ ଥାନା ବାବୁ । ଟ୍ରୁ କଲରରେ ପୋଲିସ ବେଶର ନକଲି ଫଟୋ ଲଗାଇ, ବାବୁ କରୁଥିଲେ ଅସଲି ଲୁଟ । ମାଳ ମାଳ ଅଭିଯୋଗ ପରେ, ସମାନାକୁ ଆସିଛି ବାପା, ପୁଅଙ୍କ ଅସଲ କାରନାମା । ଏକାଧିକ ଯୁବତୀଙ୍କୁ କ୍ରିକେଟ ଟିକେଟ କରାଇଦେବାକୁ କହି ଲୁଟି ନେଇଛନ୍ତି ଲକ୍ଷ ଲକ୍ଷ ଟଙ୍କା । ଶେଷରେ ଅସଲି ପୋଲିସ ହାତରେ ଧରାପଡ଼ିଛନ୍ତି ଠକ ବାପା-ପୁଅ । ଆଧାରକାର୍ଡ ଓ ପରିଚୟପତ୍ର ଜବତ କରି ପଚରା ଉଚରା ଜାରି ରଖିଛି ଏୟାରଫିଲ୍ଡ ଥାନା ପୋଲିସ ।

ଠକ ପୁଅ ଅମିତ କୁମାର ଓଝା ଯିଏକି ନିଜକୁ SI ଅଭିଷେକ ମିଶ୍ରର ପରିଚୟ ଦେଉଥିଲା । ଆଉ ଯୁବତୀଙ୍କୁ ପ୍ରେମ ଜାଲରେ ଫସାଇ ତାଙ୍କ ନ୍ୟୁଡ଼ ଭିଡ଼ିଓ ରଖିଥିଲା । ତେଵେ ଉଭୟ ଠକ ବାପା-ପୁଅଙ୍କୁ ଗିରଫ କରିବା ପରେ ସେମାନଙ୍କ ପାଖରୁ ଜବତ ମୋବାଇଲରୁ ଶତାଧିକ ନ୍ୟୁଡ଼ ଫଟୋ ଓ ଭିଡ଼ିଓ ମିଳିବା ଘଟଣା ପୁଲିସର ନିଦ ହଜାଇ ଦେଇଛି । ଗିରଫ ପରେ ସେମାନଙ୍କୁ ଜେରା ମଧ୍ୟ କରିଛି ପୋଲିସ । ଏହି ଜେରା ସମୟରେ ପୋଲିସକୁ ଅନେକ ତଥ୍ୟ ମିଳିଥିବା ସୂଚନା ମିଳିଛି । କିପରି ଲୁଟ୍ କରୁଥିଲେ, କିପରି ଠକେଇ କରୁଥିଲେ । ଏନେଇ ଅନେକ ତଥ୍ୟ ପୋଲିସର ହସ୍ତଗତ ହୋଇଛି ।