ରାଜ୍ୟ ଐତିହ୍ୟର ସଂରକ୍ଷଣ ପାଇଁ କେତେ ଅର୍ଥ ମଞ୍ଜୁର କରିଛ ? କେନ୍ଦ୍ର ସରକାରଙ୍କୁ ପ୍ରଶ୍ନ କଲେ ସାଂସଦ ମାନସ ମଙ୍ଗରାଜ

ନୂଆଦିଲ୍ଲୀ: ରାଜ୍ୟରେ ଶହଶହ ଐତିହାସିକ ସ୍ମାରକୀ, ଐତିହ୍ୟ ସ୍ଥାନ ରହିଛି । ଏହା ମଧ୍ୟରୁ ୮୧ଟି ସ୍ଥାନକୁ କେନ୍ଦ୍ର ସରକାର ମାନ୍ୟତା ଦେଇଛନ୍ତି ଓ ସଂରକ୍ଷଣ ଦାୟିତ୍ୱ ନେଇଛନ୍ତି। ମାତ୍ର ବିଡ଼ମ୍ବନା ହେଉଛି ଏହି ସ୍ଥାନଗୁଡ଼ିକର ସୁରକ୍ଷା ନିମନ୍ତେ ରାଜ୍ୟକୁ ଯେତିକି ସହାୟତା ମିଳିବା କଥା ସେତିକି ମିଳିପାରୁ ନାହିଁ। ଗୁରୁତ୍ୱପୂର୍ଣ୍ଣ କଥା ହେଉଛି ପୂର୍ବରୁ ଏଥିପାଇଁ କେନ୍ଦ୍ର ସରକାର ଯେତିକି ଆର୍ଥିକ ସହାୟତା ଦେଉଥିଲେ, ଏବେ ତାହାକୁ ହ୍ରାସ କରାଯାଇଛି। ସାଂସଦ ମାନସ ରଞ୍ଜନ ମଙ୍ଗରାଜ ରାଜ୍ୟସଭାରେ କରିଥିବା ପ୍ରଶ୍ନରେ କେନ୍ଦ୍ର ସଂସ୍କୃତିମନ୍ତ୍ରୀଙ୍କ ଉତ୍ତରରୁ ଏହା ସ୍ପଷ୍ଟ ହୋଇଛି।

ରାଜ୍ୟରେ ଐତିହ୍ୟ ସ୍ଥାନଗୁଡ଼ିକର ସୁରକ୍ଷା ସଂକ୍ରାନ୍ତ ମାନସଙ୍କ ପ୍ରଶ୍ନର ଉତ୍ତରରେ କେନ୍ଦ୍ର ସଂସ୍କୃତି ମନ୍ତ୍ରୀ ଗଜେନ୍ଦ୍ର ସିଂହ ଶେଖାୱାତ କହିଛନ୍ତି ଯେ କେନ୍ଦ୍ର ସରକାରଙ୍କ ସଂସ୍କୃତି ମନ୍ତ୍ରଣାଳୟ ତରଫରୁ ଆର୍କୋଲୋଜିକାଲ ସର୍ଭେ ଅଫ୍‌ ଇଣ୍ଡିଆ(ଏଏସ୍‌ଆଇ) ମାଧ୍ୟମରେ ଓଡ଼ିଶାର ଐତିହ୍ୟ ସ୍ମାରକୀ ଗୁଡ଼ିକର ସଂରକ୍ଷିତ କରାଯାଉଛି। ଏହାର ସୁରକ୍ଷା ପାଇଁ ମନ୍ତ୍ରଣାଳୟ ୨୦୨୨-୨୩ରେ ୧୩. ୧୮ କୋଟି ଟଙ୍କା ପ୍ରଦାନ କରିଥିବାବେଳେ ୨୦୨୪-୨୫ ଆର୍ଥିକ ବର୍ଷରେ ୧୨.୨୯ କୋଟି ଟଙ୍କା ପ୍ରଦାନ କରାଯାଇଛି। ଓଡ଼ିଶାରେ ମନ୍ତ୍ରଣାଳୟ ଅଧୀନରେ ୮୧ଟି ଐତିହାସିକ ସ୍ମାରକୀ ଏବଂ ଐତିହ୍ୟ ସ୍ଥାନ ରହିଛି। ଏହି ସ୍ଥାନରେ ଜବରଦଖଲ ଓ କ୍ଷତି ରୋକିବା ପାଇଁ ମନ୍ତ୍ରଣାଳୟ ପକ୍ଷରୁ ଜାତୀୟ ସଂରକ୍ଷଣ ନୀତି ଅନୁସାରେ ଏଏସ୍‌ଆଇ ଦ୍ୱାରା ପଦକ୍ଷେପ ଗ୍ରହଣ କରାଯାଉଛି। ସଂରକ୍ଷିତ ସ୍ମାରକୀ ଏବଂ କ୍ଷେତ୍ରଗୁଡ଼ିକରେ ଜଗିବା ପାଇଁ ମଲ୍ଟି ଟାସ୍କିଂ ଷ୍ଟାଫ୍‌ ନିୟୋଜିତ କରାଯାଇଛି। ଏଥିସହ ସ୍ମାରକୀଗୁଡ଼ିକରେ ବ୍ୟକ୍ତିଗତ ସୁରକ୍ଷା କର୍ମୀ ନିୟୋଜିତ ହୋଇଛନ୍ତି। ଏହାବ୍ୟତୀତ ଜବରଦଖଲ ଏବଂ କ୍ଷତି ରୋକିବା ପାଇଁ ସାମୟିକ ଯାଞ୍ଚ ମଧ୍ୟ କରାଯାଉଛି ବୋଲି ମନ୍ତ୍ରୀ ସୂଚନା ଦେଇଛନ୍ତି । ମାତ୍ର କେଉଁ ପରିସ୍ଥିତିରେ ରାଜ୍ୟକୁ ଏ ସଂକ୍ରାନ୍ତ ଅନୁଦାନ ହ୍ରାସ କରାଯାଇଛି, ସେ ସମ୍ପର୍କରେ ମନ୍ତ୍ରୀ ନିରୁତ୍ତର ରହିଛନ୍ତି ।