ବଲିଉଡର ଲୋକପ୍ରିୟ କମେଡିଆନ୍ ତଥା ଅଭିନେତା ରାଜପାଲ ଯାଦବ ଏବେ ଆଇନଗତ ସମସ୍ୟାରେ ଛନ୍ଦି ହୋଇପଡ଼ିଛନ୍ତି। ଏକ ପୁରୁଣା ଚେକ୍ ବାଉନ୍ସ ମାମଲାରେ ସେ ବୁଧବାର ଦିନ ସୁପ୍ରିମକୋର୍ଟରେ ହାଜର ହୋଇଛନ୍ତି। କୋର୍ଟ ତାଙ୍କୁ ତୁରନ୍ତ ୧.୧୫ କୋଟି ଟଙ୍କା ଜମା କରିବାକୁ ନିର୍ଦ୍ଦେଶ ଦେଇଛନ୍ତି। ଏହା ସହିତ ଅବଶିଷ୍ଟ ୮୫ ଲକ୍ଷ ଟଙ୍କା ଆସନ୍ତା ଅକ୍ଟୋବର ୧୩ ତାରିଖ ସୁଦ୍ଧା ଜମା କରିବାକୁ ସମୟସୀମା ଧାର୍ଯ୍ୟ କରାଯାଇଛି।

'ମୁଁ ନିଜେ ଏକ ଡ୍ରାମା ପାଲଟି ଯାଇଛି'

ଶୁଣାଣି ସମୟରେ ଅଭିନେତା ରାଜପାଲ ଯାଦବ ଅତ୍ୟନ୍ତ ଭାବପ୍ରବଣ ହୋଇପଡ଼ିଥିଲେ। ସେ କୋର୍ଟରେ କହିଥିଲେ ଯେ, "ମୁଁ ନିଜେ ଏକ ଡ୍ରାମା ପାଲଟି ଯାଇଛି"। ନିଜର ଆର୍ଥିକ ଦୁରାବସ୍ଥା ବିଷୟରେ ବର୍ଣ୍ଣନା କରି ସେ କହିଥିଲେ ଯେ ତାଙ୍କ ଦ୍ୱାରା ନିର୍ମିତ ୨୦୧୨ ମସିହାର ଫିଲ୍ମ 'ଅତା ପତା ଲାପତା' ଯୋଗୁଁ ତାଙ୍କୁ ବହୁତ କ୍ଷତି ସହିବାକୁ ପଡ଼ିଥିଲା। ଗତ ୧୩ ବର୍ଷ ମଧ୍ୟରେ ତାଙ୍କୁ ପ୍ରାୟ ୨୦୦ ରୁ ୨୫୦ କୋଟି ଟଙ୍କାର କ୍ଷତି ସହିବାକୁ ପଡ଼ିଛି ବୋଲି ସେ ଦାବି କରିଛନ୍ତି। ଏହି ଚଳଚ୍ଚିତ୍ର ନିର୍ମାଣ ପାଇଁ ସେ ଏକ ବେସରକାରୀ ସଂସ୍ଥାରୁ ଋଣ ଆଣିଥିଲେ ଏବଂ ଏହାର ପରିଶୋଧ ନକରିପାରିବାରୁ ତାଙ୍କ ନାମରେ ଏକାଧିକ ଚେକ୍ ବାଉନ୍ସ ମାମଲା ରୁଜୁ ହୋଇଥିଲା।

ପ୍ରଧାନ ବିଚାରପତିଙ୍କ ପ୍ରତିକ୍ରିୟା ଓ ପରାମର୍ଶ

ଖଣ୍ଡପୀଠର ବିଚାରପତିମାନେ ତାଙ୍କ ଆଚରଣ ଉପରେ ଅସନ୍ତୋଷ ବ୍ୟକ୍ତ କରିଥିଲେ। ପ୍ରଧାନ ବିଚାରପତି ସୂର୍ଯ୍ୟ କାନ୍ତ ଥଟ୍ଟା କରି କହିଥିଲେ ଯେ, "ଆପଣଙ୍କ ଫିଲ୍ମ ଭଳି ଆପଣଙ୍କ ଟଙ୍କା ମଧ୍ୟ ଅତା ପତା ଲାପତା ହୋଇଯାଇଛି"। ତେବେ କୋର୍ଟ ତାଙ୍କୁ ଏକ ଭଲ ଚଳଚ୍ଚିତ୍ର ନିର୍ମାଣ କରି ପୁଣିଥରେ ଲୋକଙ୍କ ମନୋରଞ୍ଜନ କରିବାକୁ ଏବଂ ନିଜର ହଜିଯାଇଥିବା ସମ୍ମାନ ଫେରାଇ ଆଣିବାକୁ ପରାମର୍ଶ ଦେଇଛନ୍ତି।

ପୈତୃକ ସମ୍ପତ୍ତି ବିକ୍ରି କରିବେ ରାଜପାଲ

କୋର୍ଟଙ୍କୁ ରାଜପାଲ ଯାଦବଙ୍କ ଓକିଲ ଜଣାଇଥିଲେ ଯେ ଅଭିନେତା ତାଙ୍କର ପୈତୃକ ସମ୍ପତ୍ତି ବିକ୍ରି କରି ବକେୟା ରାଶି ପୈଠ କରିବାକୁ ପ୍ରସ୍ତୁତ ଅଛନ୍ତି। କୋର୍ଟରେ ସେ ୧.୧୫ କୋଟି ଟଙ୍କାର ଡିମାଣ୍ଡ ଡ୍ରାଫ୍ଟ (DD) ଦାଖଲ କରିଥିଲେ। ସମ୍ପତ୍ତି କିଣିବାକୁ ଯାଉଥିବା ବ୍ୟକ୍ତି ମଧ୍ୟ କୋର୍ଟରେ ଉପସ୍ଥିତ ଥିଲେ ଏବଂ ଅବଶିଷ୍ଟ ୮୫ ଲକ୍ଷ ଟଙ୍କା ସେ ଅକ୍ଟୋବର ୧୩ ସୁଦ୍ଧା ଜମା କରିବେ ବୋଲି ପ୍ରତିଶ୍ରୁତି ଦେଇଛନ୍ତି।

ଯଦି ଏହି ସମୟସୀମା ମଧ୍ୟରେ ସମ୍ପୂର୍ଣ୍ଣ ୨ କୋଟି ଟଙ୍କା ଜମା ନହୁଏ, ତେବେ ତାଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କୋର୍ଟ ଚେତାବନୀ ଦେଇଛନ୍ତି। ପୂର୍ବରୁ ଦିଲ୍ଲୀ ହାଇକୋର୍ଟ ଏହି ମାମଲାରେ ତାଙ୍କୁ ଦୋଷୀ ସାବ୍ୟସ୍ତ କରି ଜେଲ୍ ଦଣ୍ଡାଦେଶ ଶୁଣାଇଥିଲେ ବିଚାରପତି ମତ ରଖିଛନ୍ତି।