ମୁମ୍ବାଇ: ଅନିରୁଦ୍ଧଙ୍କ ଜୀବନସାଥୀ ହେଲେ କାବ୍ୟା ମାରନ । ଗ୍ରୀସରେ ଅନୁଷ୍ଠିତ ଏକ ସ୍ୱତନ୍ତ୍ର ବିବାହ ଉତ୍ସବରେ ବିଶିଷ୍ଟ ସଙ୍ଗୀତ ନିର୍ଦ୍ଦେଶକ ଅନିରୁଦ୍ଧ ରବିଚନ୍ଦର ଏବଂ ସନ୍ ରାଇଜର୍ସ ହାଇଦ୍ରାବାଦର ସହ-ମାଲିକାଣୀ ତଥା ସନ୍ ଗ୍ରୁପର କାର୍ଯ୍ୟନିର୍ବାହୀ ନିର୍ଦ୍ଦେଶିକା କାବ୍ୟା ମାରାନ୍ ବିବାହ ବନ୍ଧନରେ ଆବଦ୍ଧ ହୋଇଛନ୍ତି। ନଭେମ୍ବର ୧୧, ୨୦୨୬ରେ ଆୟୋଜିତ ଏହି ହାଇ-ପ୍ରୋଫାଇଲ୍ ବିବାହର ସବୁଠାରୁ ଆକର୍ଷଣୀୟ ମୁହୂର୍ତ୍ତ ଥିଲା ସୁପରଷ୍ଟାର ରଜନୀକାନ୍ତଙ୍କ ନୃତ୍ୟ। ରଜନୀକାନ୍ତ ତାଙ୍କର ଲୋକପ୍ରିୟ ଗୀତ ‘ମନସିଲାୟୋ’ର ତାଳରେ ନବଦମ୍ପତିଙ୍କ ସହ ଝୁମୁଥିବାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି।
ପୋଷ୍ଟ-ୱେଡିଂ ପାର୍ଟିର ଏକ ଭିଡିଓରେ ଦେଖିବାକୁ ମିଳିଛି ଯେ, ରଜନୀକାନ୍ତ ନବବିବାହିତ ଅନିରୁଦ୍ଧ ଏବଂ କାବ୍ୟାଙ୍କ ସହ ତାଙ୍କର ୨୦୨୪ର ଚଳଚ୍ଚିତ୍ର ‘ଭେଟ୍ଟାଇୟାନ୍’ର ଚାର୍ଟବଷ୍ଟର ଗୀତ ‘ମନସିଲାୟୋ’ରେ ଅତ୍ୟନ୍ତ ଉତ୍ସାହର ସହ ନୃତ୍ୟ କରୁଛନ୍ତି। ଏହି ଗୀତର ସଙ୍ଗୀତ ଅନିରୁଦ୍ଧ ହିଁ ପ୍ରସ୍ତୁତ କରିଥିଲେ। ରଜନୀକାନ୍ତ ଏହି କାର୍ଯ୍ୟକ୍ରମରେ ଯୋଗ ଦେବା ପାଇଁ ପତ୍ନୀ ଲତା ଏବଂ ଝିଅ ଐଶ୍ୱର୍ଯ୍ୟାଙ୍କ ସହ ଗ୍ରୀସ୍ ଯାତ୍ରା କରିଥିଲେ। ବିବାହ ପରେ ଅନିରୁଦ୍ଧ ଓ କାବ୍ୟାଙ୍କର ସୁନ୍ଦର ପୋଷାକରେ ସଜ୍ଜିତ ଏକାଧିକ ଫଟୋ ମଧ୍ୟ ସାମ୍ନାକୁ ଆସିଛି।
ଗତ ନଭେମ୍ବର ୧୦ ତାରିଖରେ ପାରମ୍ପରିକ ତାମିଲ ରୀତିନୀତି ଅନୁଯାୟୀ ନିର୍ବନ୍ଧ ବା ‘ନିଶ୍ଚୟଥାର୍ଥମ’ ଅନୁଷ୍ଠିତ ହୋଇଥିଲା। ଏହି ଉତ୍ସବରେ ଡ଼ିଏମକେ ମୁଖ୍ୟ ଏମ.କେ ଷ୍ଟାଲିନ୍ ଙ୍କ ସମେତ ଅନେକ ବିଶିଷ୍ଟ ବ୍ୟକ୍ତି ଉପସ୍ଥିତ ଥିଲେ। ବିବାହ ସମୟରେ ଅନିରୁଦ୍ଧ ଏକ କ୍ରିମ୍ ରଙ୍ଗର ଏମ୍ବ୍ରୋଡୋରୀ ଜ୍ୟାକେଟ୍ ପିନ୍ଧିଥିବା ବେଳେ କାବ୍ୟା ମାରାନ୍ ଏକ ଆକର୍ଷଣୀୟ ବ୍ରାଉନ୍ ରଙ୍ଗର ପୋଷାକରେ ନଜର ଆସିଥିଲେ।
ଗ୍ରୀସରେ ବିବାହ ସମ୍ପନ୍ନ ହେବା ପରେ, ଆସନ୍ତା ନଭେମ୍ବର ୨୧, ୨୦୨୬ରେ ଚେନ୍ନାଇରେ ଏକ ଭବ୍ୟ ରିସେପ୍ସନର ଆୟୋଜନ କରାଯାଇଛି। ଏହି ଉତ୍ସବ ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, କଂଗ୍ରେସ ନେତ୍ରୀ ସୋନିଆ ଗାନ୍ଧୀ ଏବଂ ତାମିଲନାଡୁର ନବନିର୍ବାଚିତ ମୁଖ୍ୟମନ୍ତ୍ରୀ ସି. ଜୋସେଫ ବିଜୟଙ୍କ ସମେତ ଦେଶର ପ୍ରମୁଖ ରାଜନେତା, ଶିଳ୍ପପତି ଏବଂ କ୍ରିକେଟ୍ ତାରକାମାନଙ୍କୁ ନିମନ୍ତ୍ରଣ କରାଯାଇଛି। ଅନିରୁଦ୍ଧ ଓ କାବ୍ୟାଙ୍କ ଏହି ବିବାହ ଦକ୍ଷିଣ ଭାରତର ଦୁଇଟି ଶକ୍ତିଶାଳୀ ପରିବାରକୁ ଏକାଠି କରିଛି।