ବ୍ରହ୍ମପୁରର ଏକ କାର୍ ସୋରୁମ୍‌ରେ ଭୟାବହ ଅଗ୍ନିକାଣ୍ଡ, ଲକ୍ଷାଧିକ ଟଙ୍କାର ସାମଗ୍ରୀ ନଷ୍ଟ

ବ୍ରହ୍ମପୁର: ନିଆଁ ଲାଗି ଜଳିଗଲା କାର୍ ସୋରୁମ୍‌ । ସମସ୍ତ କାର୍ ପୋଡ଼ି ପାଉଁଶ । ଶନିବାର ଭୋର ସମୟରେ ବ୍ରହ୍ମପୁର ଉପକଣ୍ଠ ହଳଦିଆପଦର ବସ୍ ଟର୍ମିନାଲ୍ ନିକଟରେ ଥିବା ଏକ କାର୍ ସୋରୁମ୍‌ରେ ଭୟାବହ ଅଗ୍ନିକାଣ୍ଡ ଘଟିଛି। ସୋ’ରୁମ୍ ରେ ଥିବା ସମସ୍ତ କାର୍ ପୋଡ଼ି ପାଉଁଶ ହୋଇଯାଇଥିବା ସୂଚନା ମିଳିଛି  । ନିଆଁକୁ ଆୟତ୍ତ କରିବା ପାଇଁ ୧୦ ରୁ ଅଧିକ ଅଗ୍ନିଶମ ଗାଡ଼ି ନିୟୋଜିତ କରାଯାଇଥିଲା। 

ସକାଳ ପ୍ରାୟ ୬ଟା ସମୟରେ ଏହି ଅଗ୍ନିକାଣ୍ଡ ସମ୍ପର୍କରେ ଖବର ମିଳିଥିଲା। ତୁରନ୍ତ ବ୍ରହ୍ମପୁର ସମେତ ପାର୍ଶ୍ବବର୍ତ୍ତୀ ଅଞ୍ଚଳ ଯଥା ଚିକିଟି, ପାତ୍ରପୁର, ଗଞ୍ଜାମ, ଛତ୍ରପୁର ଏବଂ ରମ୍ଭା ରୁ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚିଥିଲେ। ସୋରୁମ୍‌ର କବାଟ ବନ୍ଦ ଥିବାରୁ ଅଗ୍ନିଶମ କର୍ମଚାରୀଙ୍କୁ ଭିତରକୁ ପ୍ରବେଶ କରିବାରେ ବହୁ ଅସୁବିଧା ହୋଇଥିଲା। ଫଳରେ ସେମାନେ କବାଟ କାଟି ଭିତରକୁ ପଶିବା ସହ ନିଆଁ ଲିଭା କାର୍ଯ୍ୟ ଆରମ୍ଭ କରିଥିଲେ। ସୁରକ୍ଷିତ ଦୂରତାରୁ ନିଆଁକୁ ମୁକାବିଲା କରିବା ପାଇଁ ରୋବୋଟିକ୍ ମନିଟର୍ ର ମଧ୍ୟ ବ୍ୟବହାର କରାଯାଇଥିଲା।

ନିଆଁ ଦ୍ରୁତ ଗତିରେ ବ୍ୟାପିଯିବା ଫଳରେ ସୋରୁମ୍‌ ମଧ୍ୟରେ ଥିବା ଏକାଧିକ ଗାଡ଼ି, ଯନ୍ତ୍ରାଂଶ ଏବଂ ଅନ୍ୟାନ୍ୟ ସାମଗ୍ରୀ ପୋଡ଼ି ପାଉଁଶ ହୋଇଯାଇଛି। ରିପୋର୍ଟ ଅନୁଯାୟୀ, ଲକ୍ଷାଧିକ ଟଙ୍କାର ସାମଗ୍ରୀ ନଷ୍ଟ ହୋଇଛି। ସୌଭାଗ୍ୟବଶତଃ ଏହି ଘଟଣାରେ କୌଣସି ପ୍ରାଣହାନି ଘଟିନଥିବା ସୂଚନା ମିଳିଛି। ଅଗ୍ନିକାଣ୍ଡର ପ୍ରକୃତ କାରଣ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ତେବେ ସର୍ଟ ସର୍କିଟ୍ ଯୋଗୁଁ ନିଆଁ ଲାଗିଥିବା ସନ୍ଦେହ କରାଯାଉଛି।