ଅହମ୍ମଦାବାଦ : IPLର ୧୮ତମ ସିଜିନ୍ର ଶେଷ ତଥା ଫାଇନାଲ ମ୍ୟାଚ୍ ଅହମ୍ମଦାବାଦର ନରେନ୍ଦ୍ର ମୋଦୀ ଷ୍ଟାଡିୟମରେ ରୟାଲ୍ ଚ୍ୟାଲେଞ୍ଜର୍ସ ବାଙ୍ଗାଲୋର (RCB) ଏବଂ ପଞ୍ଜାବ କିଙ୍ଗ୍ସ ମଧ୍ୟରେ ଖେଳାଯାଉଛି। ତେବେ ଏହାରି ମଧ୍ୟରେ ଚଳିତ ଆଇପିଏଲର କିଏ ଅରେଞ୍ଜ କ୍ୟାପ୍ ଓ ପର୍ପଲ କ୍ୟାପ୍ ବିଜେତା ହେବ ତାହାକୁ ନେଇ ଚାଲିଥିବା କଳ୍ପନା ଜଳ୍ପନା ଏକ ପ୍ରକାର ଶେଷ ହୋଇଯାଇଛି। ଚଳିତ ଆଇପିଏଲରେ ଗୁଜୁରାଟ ଟାଇଟାନ୍ସ ଦଳ IPL ଫାଇନାଲରେ ପହଞ୍ଚିପାରିନାହିଁ। କିନ୍ତୁ ଏହାର ଓପନର ସାଇ ସୁଦର୍ଶନ ଅରେଞ୍ଜ କ୍ୟାପ୍ ଓ ବୋଲର ପ୍ରସିଦ୍ଧ କ୍ରିଷ୍ଣା ପର୍ପଲ କ୍ୟାପ୍ ପାଇବା ନିଶ୍ଚିତ ହୋଇଯାଇଛି।
ସାଇ ସୁଦର୍ଶନ ପ୍ରଦର୍ଶନରେ ପ୍ରଭାବିତ କରିଛନ୍ତି
ସାଇ ସୁଦର୍ଶନ ଏହି ସିଜିନରେ ତାଙ୍କ ବ୍ୟାଟିଂରେ ସମସ୍ତଙ୍କୁ ପ୍ରଭାବିତ କରିଛନ୍ତି। ସେ ୧୫ ମ୍ୟାଚ୍ରେ ୧୫୬.୧୭ ଷ୍ଟ୍ରାଇକ୍ ରେଟରେ ୭୫୯ ରନ୍ କରିଥିଲେ, ଯେଉଁଥିରେ ଗୋଟିଏ ଶତକ ଏବଂ ଛଅଟି ଅର୍ଦ୍ଧଶତକ ଅନ୍ତର୍ଭୁକ୍ତ। ଶୁଭମନ ଗିଲଙ୍କ ସହ ମିଶି ସୁଦର୍ଶନ ଅନେକ ମ୍ୟାଚ୍ରେ ଗୁଜରାଟକୁ ଏକ ଦୃଢ଼ ଆରମ୍ଭ ଦେଇଥିଲେ। ତଥାପି, ଏଲିମିନେଟରରେ ମୁମ୍ବାଇ ଇଣ୍ଡିଆନ୍ସ ବିପକ୍ଷରେ ପରାଜୟ ସହିତ ଗୁଜରାଟର ଯାତ୍ରା ଶେଷ ହୋଇଥିଲା। ସାଇ ସୁଦର୍ଶନ ମଧ୍ୟ ଏଲିମିନେଟର ମ୍ୟାଚ୍ରେ ଭଲ ପ୍ରଦର୍ଶନ କରିଥିଲେ ଏବଂ ୮୦ ରନ୍ର ଇନିଂସ ଖେଳିଥିଲେ, କିନ୍ତୁ ତାଙ୍କ ଆଉଟ୍ ହେବା ପରେ ଦଳ ଲକ୍ଷ୍ୟ ହାସଲ କରିପାରି ନଥିଲା।
କୋହଲି ମଧ୍ୟ ଦୌଡ଼ରେ ଥିଲେ
ଆରସିବିର ବିରାଟ କୋହଲି ମଧ୍ୟ ଅରେଞ୍ଜ କ୍ୟାପ୍ ଦୌଡ଼ରେ ଥିଲେ। ଫାଇନାଲ୍ ପୂର୍ବରୁ କୋହଲିଙ୍କ ପାଖରେ ଅରେଞ୍ଜ କ୍ୟାପ୍ ପାଇବାର ସୁଯୋଗ ଥିଲା, କିନ୍ତୁ ଏହି ବ୍ୟବଧାନ ସୁଦର୍ଶନଙ୍କୁ ପଛରେ ପକାଇବା ପାଇଁ ବହୁତ ଅଧିକ ଥିଲା। କୋହଲି ଫାଇନାଲ ମ୍ୟାଚ୍ରେ ୪୩ ରନ୍ କରିଥିଲେ ଏବଂ ସେ ଏହି ଦୌଡ଼ରେ ପଛରେ ପଡ଼ିଯାଇଥିଲେ। କୋହଲି ୧୫ ଇନିଂସ୍ରେ ୬୫୭ ରନ୍ କରିଥିଲେ ଏବଂ ଏହି ସିଜିନ୍ରେ ସର୍ବାଧିକ ରନ୍ ସ୍କୋରର୍ ତାଲିକାରେ ତୃତୀୟ ସ୍ଥାନ ଅଧିକାର କରିଥିଲେ। ମୁମ୍ବାଇ ଇଣ୍ଡିଆନ୍ସର ସୂର୍ଯ୍ୟକୁମାର ଯାଦବ ୧୬ ମ୍ୟାଚ୍ରେ ୭୧୭ ରନ୍ ସହିତ ଅରେଞ୍ଜ କ୍ୟାପ୍ ଦୌଡ଼ରେ ଦ୍ୱିତୀୟ ସ୍ଥାନ ଅଧିକାର କରିଥିଲେ।
ସେପଟେ ଗୁଜରାଟ ଟାଇଟାନ୍ସର ଦ୍ରୁତ ବୋଲର ପ୍ରସିଦ୍ଧ କ୍ରିଷ୍ଣା ୨୫ ୱିକେଟ୍ ସହିତ ଶୀର୍ଷରେ ଅଛନ୍ତି। ଯାହା ଫଳରେ ସେ ପର୍ପଲ କ୍ୟାପ୍ ବିଜେତା ହୋଇଛନ୍ତି।