ବର୍ତ୍ତମାନ ସମୟରେ ଯୁବପିଢ଼ିଙ୍କ ମଧ୍ୟରେ ସ୍ମାର୍ଟଫୋନ୍ ଏବଂ ସୋସିଆଲ୍ ମିଡିଆର ବ୍ୟବହାର ବହୁଳ ମାତ୍ରାରେ ବୃଦ୍ଧି ପାଇବାରେ ଲାଗିଛି। ତେବେ ନିକଟରେ ହୋଇଥିବା ଏକ ସର୍ବବୃହତ୍ ସମୀକ୍ଷା (Largest Review) ଅନୁଯାୟୀ, ଅତ୍ୟଧିକ ସ୍କ୍ରିନ୍ ବ୍ୟବହାର ବା ସ୍କ୍ରିନ୍ ନିଶା ଯୁବପିଢ଼ିଙ୍କ ଖରାପ ମାନସିକ ସ୍ୱାସ୍ଥ୍ୟ ସହ ସିଧାସଳଖ ଜଡ଼ିତ ଅଟେ। ମେଡିକାଲ ଜର୍ଣ୍ଣାଲ୍ ‘ଦ ଲାନ୍ସେଟ୍’ (The Lancet) ର ଇ-କ୍ଲିନିକାଲ୍ମେଡିସିନ୍ ରେ ପ୍ରକାଶିତ ଏହି ରିପୋର୍ଟରେ ଦର୍ଶାଯାଇଛି ଯେ, ମୋବାଇଲ୍, ସୋସିଆଲ୍ ମିଡିଆ ଏବଂ ଗେମିଂର ଅତ୍ୟଧିକ ବ୍ୟବହାର ଯୁବକଯୁବତୀଙ୍କୁ ଅବସାଦ ଏବଂ ଉତ୍କଣ୍ଠା ଆଡ଼କୁ ଠେଲି ଦେଉଛି। ୨୫ ବର୍ଷରୁ କମ୍ ବୟସର ପ୍ରାୟ ୯ ନିୟୁତ (୯୦ ଲକ୍ଷ) ଲୋକଙ୍କୁ ନେଇ ହୋଇଥିବା ୧୨୧ଟି ପୁରୁଣା ସମୀକ୍ଷାର ତଥ୍ୟକୁ ଆଧାର କରି ଏହି ରିପୋର୍ଟ ପ୍ରସ୍ତୁତ କରାଯାଇଛି।
ଅଧ୍ୟୟନରୁ ମିଳିଲା ଚିନ୍ତାଜନକ ତଥ୍ୟ
ଏହି ଗବେଷଣାରୁ ଜଣାପଡ଼ିଛି ଯେ ସ୍କ୍ରିନ୍ ନିଶାରେ ଆକ୍ରାନ୍ତ ଥିବା ବ୍ୟକ୍ତିଙ୍କଠାରେ ମାନସିକ ସ୍ୱାସ୍ଥ୍ୟ ସମସ୍ୟା ଦେଖାଦେବାର ଆଶଙ୍କା ଦୁଇଗୁଣା ଅଧିକ ରହିଛି। ବିଶେଷ କରି ଝିଅମାନଙ୍କ କ୍ଷେତ୍ରରେ ସୋସିଆଲ୍ ମିଡିଆ ଏବଂ ଅବସାଦ ମଧ୍ୟରେ ଏକ ଦୃଢ଼ ସମ୍ପର୍କ ଦେଖିବାକୁ ମିଳିଛି। ରିପୋର୍ଟ ଅନୁସାରେ, ବିନା କୌଣସି ଉଦ୍ଦେଶ୍ୟରେ ସୋସିଆଲ୍ ମିଡିଆ ସ୍କ୍ରୋଲିଂ (Passive scrolling) କରିବା ଦ୍ୱାରା ଝିଅମାନଙ୍କ ମନୋବଳ କମିବା ସହ ନିଦ୍ରାହୀନତା ସମସ୍ୟା ବଢ଼ୁଛି। ଅନ୍ୟପକ୍ଷରେ, ଛୋଟ ପିଲାଙ୍କ ତୁଳନାରେ ୧୮ ରୁ ୨୪ ବର୍ଷ ବୟସର ଯୁବବର୍ଗଙ୍କ ମଧ୍ୟରେ ଖରାପ ମାନସିକ ସ୍ୱାସ୍ଥ୍ୟ ଏବଂ ସ୍କ୍ରିନ୍ ବ୍ୟବହାରର ସମ୍ପର୍କ ଅଧିକ ମାତ୍ରାରେ ଦେଖିବାକୁ ମିଳିଛି।
ସରକାରୀ ହସ୍ତକ୍ଷେପ ପାଇଁ ବିଶେଷଜ୍ଞଙ୍କ ଆହ୍ୱାନ
ସ୍କ୍ରିନ୍ରେ ଅଧିକ ସମୟ ବିତାଇବା କେବଳ ନିଦ୍ରାହୀନତା ସୃଷ୍ଟି କରୁନାହିଁ, ବରଂ ଶାରୀରିକ ବିକାଶରେ ବାଧା ଏବଂ ନିଜକୁ କ୍ଷତି ପହଞ୍ଚାଇବା (Self-harm) ଭଳି ଗୁରୁତର ସମସ୍ୟା ସୃଷ୍ଟି କରୁଛି ବୋଲି ବିଶେଷଜ୍ଞମାନେ ଚେତାବନୀ ଦେଇଛନ୍ତି। ଏହି ସମସ୍ୟାକୁ ଦୃଷ୍ଟିରେ ରଖି ଡିଜିଟାଲ୍ ସିଷ୍ଟମ୍ଗୁଡ଼ିକର ସଠିକ୍ ପରିଚାଳନା ଦିଗରେ ଦୃଷ୍ଟି ଦେବାକୁ ବିଶ୍ୱସ୍ତରୀୟ ଗବେଷକମାନେ ସରକାର ଏବଂ ନୀତି ନିର୍ଦ୍ଧାରକମାନଙ୍କୁ ଆହ୍ୱାନ ଦେଇଛନ୍ତି। ପିଲା ଏବଂ ଯୁବପିଢ଼ିଙ୍କ ଅନ୍ଲାଇନ୍ ସୁରକ୍ଷା ତଥା ସ୍ୱାସ୍ଥ୍ୟକୁ ବିଶ୍ୱସ୍ତରୀୟ ନୀତିରେ ପ୍ରାଥମିକତା ଦିଆଯିବା ଉଚିତ୍ ବୋଲି ଏହି ରିପୋର୍ଟରେ ସ୍ପଷ୍ଟ କରାଯାଇଛି।