ଷ୍ଟକହୋମ୍: ସ୍ବିଡେନ ସରକାର ନାଗରିକଙ୍କୁ ଦେଶ ଛାଡ଼ିବା ପାଇଁ ପ୍ରସ୍ତାବ ଦେଇଛନ୍ତି। ଦେଶ ଛାଡ଼ିଲେ ଟଙ୍କା ସହିତ ଯିବା ଖର୍ଚ୍ଚ ପ୍ରଦାନ କରିବାକୁ ନିଷ୍ପତ୍ତି ନେଇଛନ୍ତି। ଏଥିପାଇଁ ବୟସ୍କଙ୍କୁ ୮୦ ହଜାର ଟଙ୍କା (ଦଶ ହଜାର ସ୍ବିଡେନ କ୍ରୋନ) ଏବଂ ଶିଶୁଙ୍କୁ ଥରକେ ୪୦ ହଜାର ଟଙ୍କା ପ୍ରଦାନ କରାଯିବ। ସ୍ବିଡେନ ଇମିଗ୍ରେସନ ମନ୍ତ୍ରୀ ମାରିୟା ମାଲ୍ମର ଷ୍ଟେନଗାର୍ଡ ଏହି ପ୍ରସ୍ତାବ ଉପସ୍ଥାପନ କରି ଦେଶର ସଂସ୍କୃତିକୁ ପସନ୍ଦ କରୁ ନ ଥିବା କିମ୍ବା ଏଠି ମିଳାମିଶା କରିପାରୁ ନ ଥିବା ଲୋକ ଦେଶ ଛାଡ଼ିପାରିବେ ବୋଲି କହିଛନ୍ତି।
ରିପୋର୍ଟ ଅନୁଯାୟୀ ସ୍ବିଡେନରେ ଏବେ ବି ଦେଶ ଛାଡ଼ିବାକୁ ଟଙ୍କା ଦିଆଯାଉଛି। ପୂର୍ବରୁ ପ୍ରବାସୀ ନାଗରିକଙ୍କ ପାଇଁ ଏହି ନିୟମ ଥିବାବେଳେ ଏବେ ମୂଳ ବାସିନ୍ଦାଙ୍କୁ ଏଥିରେ ସାମିଲ କରାଯାଇଛି। ତେବେ ଆଶ୍ଚର୍ଯ୍ୟର ବିଷୟ ଏହି କି ଯେ ଦେଶ ଛାଡୁଥିବା ଲୋକଙ୍କ ସଂଖ୍ୟା ବୃଦ୍ଧି ପାଉଥିବାବେଳେ ସରକାର ଏହି ପ୍ରସ୍ତାବ ପାରିତ କରାଇଛନ୍ତି।