ଭାରତରେ ଅବୈଧ ବାଂଲାଦେଶୀ ଅନୁପ୍ରବେଶକାରୀଙ୍କ ପ୍ରବେଶ କରାଇବା ଅଭିଯୋଗରେ ଗିରଫ ହୋଇଥିବା ଜଣେ ବ୍ୟକ୍ତିଙ୍କୁ ସୁପ୍ରିମକୋର୍ଟ ସର୍ତ୍ତମୂଳକ ଜାମିନ ପ୍ରଦାନ କରିଛନ୍ତି। ତଦନ୍ତ ବେଳେ ଅଭିଯୁକ୍ତଙ୍କର କୌଣସି ଆତଙ୍କବାଦୀ ସଙ୍ଗଠନ ସହ ସମ୍ପୃକ୍ତି ଥିବାର ପ୍ରମାଣ ମିଳିନାହିଁ ବୋଲି ଅଦାଲତ ସ୍ପଷ୍ଟ କରିଛନ୍ତି।
ଆତଙ୍କବାଦୀ ଲିଙ୍କର ନାହିଁ ପ୍ରମାଣ
ଏହି ମାମଲାର ଶୁଣାଣି କରି ଜଷ୍ଟିସ୍ ବାଗଚୀ କହିଛନ୍ତି ଯେ, ସୀମା ପାର୍ ହୋଇ ଆତଯାତ ହେବା ବେଆଇନ କାର୍ଯ୍ୟକଳାପ ଆଡ଼କୁ ଇଙ୍ଗିତ କରିପାରେ, କିନ୍ତୁ କେବଳ ଏହି କାରଣରୁ ଏହାକୁ କୌଣସି ଆତଙ୍କବାଦୀ ଗୋଷ୍ଠୀ ସହ ଜଡ଼ିତ ବୋଲି ଦାବି କରାଯାଇପାରିବ ନାହିଁ। ଅଭିଯୁକ୍ତ ଜଣକ ଗତ ୧୦ ବର୍ଷରୁ ଅଧିକ ସମୟ ଧରି ବେଙ୍ଗାଲୁରୁରେ ବସବାସ କରି ଆସୁଥିଲେ ଏବଂ ତାଙ୍କର କୌଣସି ଆତଙ୍କବାଦୀ ଲିଙ୍କ୍ ମିଳିନାହିଁ।
ମାନବ ଚାଲାଣ ନେଟୱାର୍କର ଥିଲା ଅଭିଯୋଗ
ଆବେଦନକାରୀ ନିଜେ ଜଣେ ବାଂଲାଦେଶୀ ନାଗରିକ ଏବଂ ସେ ବାଂଲାଦେଶ ତଥା ମିଆଁମାରରୁ ଭାରତକୁ ମାନବ ଚାଲାଣ କରୁଥିବା ଏକ ଅନ୍ତର୍ଜାତୀୟ ଗ୍ୟାଙ୍ଗର ସଦସ୍ୟ ବୋଲି ତାଙ୍କ ନାମରେ ଅଭିଯୋଗ ରହିଛି। ତାଙ୍କୁ ଗତ ୭ ନଭେମ୍ବର ୨୦୨୩ରେ ଗିରଫ କରାଯାଇଥିଲା ଏବଂ ସେବେଠାରୁ ସେ ଜେଲରେ ଥିଲେ। ଏହି ମାମଲାରେ ଅନ୍ୟ ଜଣେ ସହ-ଅଭିଯୁକ୍ତଙ୍କୁ ମଧ୍ୟ ମେ ୨୦୨୫ରେ ସୁପ୍ରିମକୋର୍ଟରୁ ଜାମିନ ମିଳିସାରିଛି।
କଡ଼ା ସର୍ତ୍ତ ସହ ମିଳିଲା ଜାମିନ
ପ୍ରଧାନ ବିଚାରପତି ଏହି ପ୍ରସଙ୍ଗରେ ମତ ରଖି କହିଛନ୍ତି ଯେ, ଅଭିଯୁକ୍ତଙ୍କ କାର୍ଯ୍ୟକଳାପ ଉପରେ କଟକଣା ଲଗାଯିବ, କିନ୍ତୁ ତାଙ୍କୁ ଜାମିନ ପ୍ରଦାନ କରାଯିବ। ଭାରତରେ ଆବେଦନକାରୀଙ୍କର କୌଣସି ସ୍ଥାୟୀ ବାସସ୍ଥାନ ନଥିବାରୁ ତାଙ୍କୁ କିଛି କଡ଼ା ସର୍ତ୍ତ ସହ ଜାମିନ ଦିଆଯାଇଛି।
ସର୍ତ୍ତ ଅନୁଯାୟୀ, ଆବେଦନକାରୀଙ୍କୁ ନିଜର ବର୍ତ୍ତମାନର ଠିକଣା ସ୍ଥାନୀୟ ଜାତୀୟ ତଦନ୍ତକାରୀ ସଂସ୍ଥା (ଏନଆଇଏ) ଅଫିସରେ ଜମା କରିବାକୁ ପଡ଼ିବ। ଏନଆଇଏ ଏହି ଠିକଣା ଯାଞ୍ଚ କରିବା ସହ ଘର ମାଲିକଙ୍କ ବୟାନ ରେକର୍ଡ କରିବ। ଏହା ସହିତ ପ୍ରତି ଶନିବାର ଅଭିଯୁକ୍ତଙ୍କୁ ଏନଆଇଏ କାର୍ଯ୍ୟାଳୟରେ ହାଜରା ପକାଇବାକୁ ପଡ଼ିବ। କେବଳ ବେଙ୍ଗାଲୁରୁରେ ଥିବା ଏନଆଇଏର ସର୍ବୋଚ୍ଚ ଅଧିକାରୀ ତାଙ୍କୁ ଏହି ହାଜରାରୁ ଛାଡ଼ ଦେଇପାରିବେ ବୋଲି ଅଦାଲତ ନିର୍ଦ୍ଦେଶ ଦେଇଛନ୍ତି।