ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ବାଣିଜ୍ୟ ପରାମର୍ଶଦାତା ପିଟର୍ ନାଭାରୋ ନିକଟରେ ଭାରତର ରୁଷ ତୈଳ କ୍ରୟକୁ ନେଇ ଏକ ବଡ଼ ବୟାନ ଦେଇଛନ୍ତି। ପୂର୍ବରୁ ଭାରତର ଆଭିମୁଖ୍ୟକୁ ସମାଲୋଚନା କରି ସେ ଭାରତୀୟଙ୍କ ଦ୍ୱାରା ଇଣ୍ଟରନେଟ୍ରେ ଟ୍ରୋଲିଂର ବା 'ଫାୟାରବମ୍ବ'ର ଶିକାର ହୋଇଥିଲେ ବୋଲି ସ୍ୱୀକାର କରିଛନ୍ତି। ତେବେ ଆମେରିକା-ଭାରତ ବାଣିଜ୍ୟ ଚୁକ୍ତି ଏବଂ ସମ୍ଭାବ୍ୟ ଟାରିଫ୍ ପ୍ରସଙ୍ଗରେ ସେ ସକାରାତ୍ମକ ପ୍ରତିକ୍ରିୟା ରଖି କହିଛନ୍ତି ଯେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ରାଷ୍ଟ୍ରପତି ଟ୍ରମ୍ପଙ୍କ ମଧ୍ୟରେ ଥିବା ସୁସମ୍ପର୍କ ଏହି ବାଣିଜ୍ୟିକ ତିକ୍ତତାର ସମାଧାନ କରିବ।
ଇଣ୍ଟରନେଟ୍ରେ ଟାର୍ଗେଟ୍ ହୋଇଥିଲେ ନାଭାରୋ
ଗଣମାଧ୍ୟମକୁ ସମ୍ବୋଧିତ କରିବା ବେଳେ ପିଟର୍ ନାଭାରୋ ତାଙ୍କର ଏକ ପୁରୁଣା ଅନୁଭୂତି ବର୍ଣ୍ଣନା କରିଛନ୍ତି। ସେ କହିଛନ୍ତି ଯେ ୟୁକ୍ରେନ୍-ରୁଷ ଯୁଦ୍ଧ ସମୟରେ ଫାଇନାନ୍ସିଆଲ୍ ଟାଇମ୍ସରେ ସେ ଏକ ପ୍ରବନ୍ଧ ଲେଖିଥିଲେ, ଯେଉଁଥିରେ ସେ ଦର୍ଶାଇଥିଲେ ଯେ ଯୁଦ୍ଧ ପୂର୍ବରୁ ଭାରତ ରୁଷଠାରୁ ବିଶେଷ ତୈଳ କିଣୁନଥିଲା। କିନ୍ତୁ ପରବର୍ତ୍ତୀ ସମୟରେ ଶସ୍ତା ଦରରେ ତୈଳ କିଣି ରିଫାଇନ୍ କରିବା ସହ ତାହାକୁ ବିକ୍ରି କରି ରୁଷର 'ଯୁଦ୍ଧ ମେସିନ୍'କୁ ସାହାଯ୍ୟ କରୁଛି। ତାଙ୍କର ଏହି ମନ୍ତବ୍ୟ ପରେ ଭାରତୀୟ ଇଣ୍ଟରନେଟ୍ ୟୁଜରମାନେ ତାଙ୍କ ଉପରେ ଆକ୍ରମଣାତ୍ମକ ଟିପ୍ପଣୀ କରିଥିଲେ। ସେ ସମାଲୋଚକମାନଙ୍କୁ ଅନୁରୋଧ କରି କହିଛନ୍ତି ଯେ, ଏଭଳି ଛୋଟ ଏବଂ ନକାରାତ୍ମକ ଆକ୍ରମଣରୁ ନିବୃତ ରୁହନ୍ତୁ, କାରଣ ଏହାଦ୍ୱାରା ସମସ୍ୟାର ସମାଧାନ ହୁଏ ନାହିଁ।
ମୋଦୀ ଏବଂ ଟ୍ରମ୍ପ୍ଙ୍କ ସମ୍ପର୍କ ଉପରେ ଆସ୍ଥା
ରୁଷଠାରୁ ତୈଳ କିଣୁଥିବା ଦେଶଗୁଡ଼ିକ (ବିଶେଷକରି ଭାରତ ଏବଂ ଚୀନ୍) ଉପରେ ୧୦୦ ପ୍ରତିଶତ ଟାରିଫ୍ ଲଗାଇବା ପାଇଁ ଆମେରିକାରେ ଲିଣ୍ଡସେ ଗ୍ରାହାମ୍ ବିଲ୍ ଆଗତ ହୋଇଛି। ଏହି ବିଷୟରେ ପଚରାଯିବାରୁ ନାଭାରୋ କହିଥିଲେ ଯେ, ଆପଣଙ୍କ ପ୍ରଧାନମନ୍ତ୍ରୀ ଏବଂ ଆମର ରାଷ୍ଟ୍ରପତିଙ୍କ ମଧ୍ୟରେ ବହୁତ ଭଲ ସମ୍ପର୍କ ରହିଛି। ସେମାନେ ନିଜ ନିଜ ଭିତରେ ଏହି ସମସ୍ୟାର ସମାଧାନ କରିନେବେ। ଏହା ମଧ୍ୟରେ ପଶିବା ମୋର କାମ ନୁହେଁ ବୋଲି ସେ ସ୍ପଷ୍ଟ କରିଛନ୍ତି।
ଅତୀତର ବିବାଦୀୟ ବୟାନ
ଉଲ୍ଲେଖଯୋଗ୍ୟ ଯେ, ଗତ କିଛି ଦିନ ଧରି ନାଭାରୋ ଭାରତର ବାଣିଜ୍ୟ ନୀତିକୁ ନେଇ କଡ଼ା ସମାଲୋଚନା କରିଆସୁଛନ୍ତି। ସେ ଭାରତକୁ 'ମହାରାଜା ଅଫ୍ ଟାରିଫ୍' ବୋଲି ଆଖ୍ୟା ଦେବା ସହିତ ନୂଆଦିଲ୍ଲୀ କ୍ରେମଲିନ୍ (ରୁଷ) ପାଇଁ ଏକ 'ଲଣ୍ଡ୍ରୋମାଟ୍' ବା ଟଙ୍କା ଧୋଇବା ମେସିନ୍ ଭଳି କାମ କରୁଛି ବୋଲି ଅଭିଯୋଗ କରିଥିଲେ। ଏପରିକି ଦେଶର ବ୍ରାହ୍ମଣମାନେ ଲାଭ ଉଠାଉଛନ୍ତି ବୋଲି କହି ସେ ବ୍ୟାପକ ବିବାଦ ସୃଷ୍ଟି କରିଥିଲେ। ତେବେ ବର୍ତ୍ତମାନ ଆମେରିକା ଏବଂ ଭାରତ ମଧ୍ୟରେ ବାଣିଜ୍ୟ ଚୁକ୍ତି ପାଇଁ ଆଲୋଚନା ଆଗେଇବାକୁ ଥିବା ବେଳେ, ଟାରିଫ୍ ଏବଂ ରୁଷ ତୈଳ ବିବାଦର ସମାଧାନ ପାଇଁ ସେ ମୋଦୀ ଏବଂ ଟ୍ରମ୍ପଙ୍କ ଉପରେ ଭରସା ପ୍ରକଟ କରିଛନ୍ତି।