ନୂଆଦିଲ୍ଲୀ: ଆଗକୁ ଆଉ ଫାସ୍‌ଟ୍ୟାଗ ଜରିଆରେ ହେବନି ଟୋଲ୍‌ ସଂଗ୍ରହ। ଆସନ୍ତା ଫେବୃଆରୀରୁ ସିଧାସଳଖ ଭାବେ ଜିପିଏସ୍‌ ଟେକ୍ନୋଲୋଜି ଜରିଆରେ ଟୋଲ ଆଦାୟ କରାଯିବ। କାରଣ ଦେଶରେ ଖୁବ ଶୀଘ୍ର ଟୋଲ ଆଦାୟ ପଦ୍ଧତି ବଦଳିବାକୁ ଯାଉଛି। ୩ ବର୍ଷ ପୂର୍ବେ ଦେଶରେ ଫାସ୍‌ଟ୍ୟାଗ ଜରିଆରେ ଆରମ୍ଭ କରାଯାଇଥିବା ଟୋଲ୍‌ ସଂଗ୍ରହ ପ୍ରକ୍ରିୟାରେ ବଦଳିବା ପରେ ଏଣିକି ସିଧାସଳଖ ଭାବେ ଜିପିଏସ୍‌ ଆଧାରରେ ଟୋଲ୍‌ ଆଦାୟ କରାଯିବ। ଜିପିଏସ୍ ଆଧାରିତ ଟୋଲ୍ ସଂଗ୍ରହ ବ୍ୟବସ୍ଥା ପରୀକ୍ଷାମୂଳକ ଭାବେ ଆସନ୍ତା ମାସରୁ ଦେଶର ପ୍ରାୟ ୧୦ଟି ଜାତୀୟ ରାଜପଥରେ ଆରମ୍ଭ ହେବାକୁ ଯାଉଛି। ନୂତନ ବ୍ୟବସ୍ଥାରେ ଟୋଲ୍‌ ଆଦାୟ ରୁଟ ଆଧାରରେ କରାଯିବ। ଏଥିପାଇଁ ଜାତୀୟ ରାଜପଥର ଜିଓଫେନ୍ସିଂ କରାଯିବ ଯାହା ଗ୍ଲୋବାଲ୍ ପୋଜିସନ୍ ସିଷ୍ଟମ୍ (ଜିପିଏସ୍) କିମ୍ବା ରେଡିଓ ଫ୍ରିକ୍ୱେନ୍ସି ଆଇଡେଣ୍ଟିଫିକେସନ୍ (ଆର୍‌ଏଫ୍‌ଆଇଡି) ମାଧ୍ୟମରେ କାର୍ଯ୍ୟକାରୀ ହେବ।