ନୂଆଦିଲ୍ଲୀ: ଗ୍ରେଟର ନୋଏଡାର ରବୁପୁରା ଥାନା ଅନ୍ତର୍ଗତ ନଗଲା ଶ୍ରୀପଦମ ଗାଁରେ ଶନିବାର ଏକ ଅଭାବନୀୟ ଘଟଣା ଘଟିଛି। ଏହି ଗାଁରେ ଗୋଟିଏ ପରିବାରର ସ୍ୱାମୀ, ସ୍ତ୍ରୀ ଏବଂ ସେମାନଙ୍କର ୩ ପିଲାଙ୍କର ସନ୍ଦେହଜନକ ଅବସ୍ଥାରେ ମୃତ୍ୟୁ ଘଟିଛି। ଏହି ଘଟଣା ସାମ୍ନାକୁ ଆସିବା ପରେ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି। ସୂଚନା ଅନୁସାରେ, ପରିବାରର ସମସ୍ତ ସଦସ୍ୟ ଶେଷ ଥର ପାଇଁ ମ୍ୟାଗି ଖାଇଥିଲେ। ଏହାପରେ ସମସ୍ତଙ୍କର ମୃତ୍ୟୁ ହୋଇଥିବାରୁ ଖାଦ୍ୟ ବିଷକ୍ରିୟାର ସନ୍ଦେହ ପ୍ରକାଶ ପାଇଛି। ତେବେ ମ୍ୟାଗି ଖାଇବା ଓ ମୃତ୍ୟୁ ମଧ୍ୟରେ ପ୍ରକୃତ ସମ୍ପର୍କ ରହିଛି କି ନାହିଁ, ତାହା ଏଯାଏଁ ସ୍ପଷ୍ଟ ହୋଇନାହିଁ।
ମୃତକମାନଙ୍କୁ ମହେଶ (୩୭), ତାଙ୍କ ପତ୍ନୀ ଲଲିତା (୩୫) ଏବଂ ସେମାନଙ୍କର ତିନି ପିଲା ଲଡୁ (୧୧), ମିଷ୍ଟି (୭) ଏବଂ ସାକ୍ଷାତ (୩) ବୋଲି ଚିହ୍ନଟ କରାଯାଇଛି। ଗୌତମ ବୁଦ୍ଧ ନଗର ପୋଲିସ ମିଡିଆ ସେଲ୍ ଅନୁଯାୟୀ, ଶନିବାର ସକାଳେ ପୋଲିସକୁ ଏହି ମୃତ୍ୟୁ ଖବର ମିଳିଥିଲା। ଘଟଣାସ୍ଥଳରେ ଲୋକଙ୍କ ଭିଡ଼ ଜମିଥିବା ନେଇ ସ୍ଥାନୀୟ ଲୋକେ ପୋଲିସକୁ ସୂଚନା ଦେଇଥିଲେ।
ଖବର ପାଇବା ମାତ୍ରେ ବରିଷ୍ଠ ପୋଲିସ ଅଧିକାରୀ, ସ୍ଥାନୀୟ ପୋଲିସ, ଆମ୍ବୁଲାନ୍ସ ଏବଂ ଖାଦ୍ୟ ସୁରକ୍ଷା ବିଭାଗର ଟିମ୍ ଘଟଣାସ୍ଥଳରେ ପହଞ୍ଚିଥିଲେ। ଏହା ସହିତ ଫରେନ୍ସିକ୍ ବିଶେଷଜ୍ଞ ଏବଂ ଫିଲ୍ଡ ୟୁନିଟ୍ ଘଟଣାସ୍ଥଳର ଯାଞ୍ଚ କରିବା ସହ ବୈଜ୍ଞାନିକ ପ୍ରମାଣ ସଂଗ୍ରହ ପ୍ରକ୍ରିୟା ଆରମ୍ଭ କରିଛନ୍ତି।
ପ୍ରାଥମିକ ତଦନ୍ତରୁ ଜଣାପଡିଛି ଯେ, ପରିବାର ଲୋକେ ଗତକାଲି ରାତିରେ ନୁଡୁଲ୍ସ ଖାଇଥିଲେ। ପଡୋଶୀ ଏବଂ ମହେଶଙ୍କ ମା'ଙ୍କ ବୟାନକୁ ଭିତ୍ତି କରି ପୋଲିସ ଏହାକୁ ଏକ ଫୁଡ୍ ପଏଜନିଂ (ଖାଦ୍ୟ ବିଷାକ୍ତ) ଜନିତ ମୃତ୍ୟୁ ବୋଲି ସନ୍ଦେହ କରୁଛି। ତେବେ ମୃତ୍ୟୁର ପ୍ରକୃତ କାରଣ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ହିଁ ମୃତ୍ୟୁର ସଠିକ୍ କାରଣ ଜଣାପଡିବ ବୋଲି ପୋଲିସ କହିଛି।
ପୋଲିସ ସମସ୍ତ ମୃତଦେହକୁ ଜବତ କରି ପୋଷ୍ଟମର୍ଟମ ପାଇଁ ପଠାଇଛି। ଅଟୋପ୍ସି ରିପୋର୍ଟ ଏବଂ ଅନ୍ୟାନ୍ୟ ବୈଜ୍ଞାନିକ ଅନୁସନ୍ଧାନ ରିପୋର୍ଟ ଆସିବା ପରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ବିଭାଗ ପକ୍ଷରୁ ସୂଚନା ଦିଆଯାଇଛି। ସୂଚନାଯୋଗ୍ୟ, ପୂର୍ବରୁ ମଧ୍ୟ ଦିଲ୍ଲୀ ଏବଂ ଏହାର ଆଖପାଖ ଅଞ୍ଚଳରେ ଖାଦ୍ୟ ବିଷାକ୍ତ ହୋଇ ଅନେକ ଲୋକ ଅସୁସ୍ଥ ହେବା ଭଳି ଘଟଣା ସାମ୍ନାକୁ ଆସିଛି।