ନୂଆଦିଲ୍ଲୀ: ଦିଲ୍ଲୀ ବିଶ୍ୱବିଦ୍ୟାଳୟ ପରିସରରେ ୟୁଜିସି ସମର୍ଥନରେ ଚାଲିଥିବା ଏକ ପ୍ରତିବାଦ ସମୟରେ ଜଣେ ମହିଳା ସାମ୍ବାଦିକଙ୍କୁ ଭୟଙ୍କର ଆକ୍ରମଣ କରାଯାଇଥିବା ଅଭିଯୋଗ ହୋଇଛି। ପୀଡ଼ିତା ସାମ୍ବାଦିକ ରୁଚି ତିୱାରୀଙ୍କ କହିବା ଅନୁଯାୟୀ, ତାଙ୍କୁ ଜାତି ପଚାରିବା ପରେ ପ୍ରାୟ ୫୦୦ ଲୋକଙ୍କ ଏକ ଭିଡ଼ ତାଙ୍କୁ ଘେରି ଯାଇଥିଲେ ଏବଂ ମରଣାନ୍ତକ ଆକ୍ରମଣ କରିଥିଲେ। ଏହି ଘଟଣାର ଭିଡିଓ ଏବେ ସୋସିଆଲ ମିଡିଆରେ ବେଶ୍ ଭାଇରାଲ ହେବାରେ ଲାଗିଛି।
ଜାତି ପଚାରିଲେ, ତା’ପରେ ଆକ୍ରମଣ କଲେ
ରୁଚି ତିୱାରୀ ଗଣମାଧ୍ୟମକୁ ଜଣାଇଛନ୍ତି ଯେ, ସେ ସେଠାରେ ପ୍ରତିବାଦର ରିପୋର୍ଟିଂ କରିବାକୁ ଯାଇଥିଲେ। ସେଠାରେ ଉପସ୍ଥିତ ଥିବା କିଛି ଲୋକ ତାଙ୍କର ପୁରା ନାମ ଏବଂ ଜାତି ପଚାରିଥିଲେ। ଯେତେବେଳେ ସେ ନିଜର ପରିଚୟ ଦେଇଥିଲେ, ହଠାତ୍ କିଛି ଲୋକ ଇସାରା କରିବା ପରେ ଏକ ବିରାଟ ଭିଡ଼ ତାଙ୍କୁ ଆକ୍ରମଣ କରିଥିଲେ। ଏହା ଏକ ଯୋଜନାବଦ୍ଧ ଆକ୍ରମଣ ଥିଲା ବୋଲି ସେ ଦାବି କରିଛନ୍ତି।
ମହିଳାଙ୍କ ପକ୍ଷରୁ ମିଳିଲା ଦୁଷ୍କର୍ମ ଧମକ
ସାମ୍ବାଦିକା ଜଣକ ଆହୁରି ମଧ୍ୟ ଅଭିଯୋଗ କରିଛନ୍ତି ଯେ, ସେ ବ୍ରାହ୍ମଣ ହୋଇଥିବାରୁ ସେଠାରେ ଥିବା କିଛି ଯୁବତୀ ତାଙ୍କ କାନରେ ଦୁଷ୍କର୍ମ କରିବାକୁ ଧମକ ଦେଇଥିଲେ। ପୁରୁଷମାନେ ତାଙ୍କୁ ଶିକ୍ଷା ଦେବାକୁ କହୁଥିବା ବେଳେ ଯୁବତୀମାନେ ତାଙ୍କ ହାତ ଓ ବେକକୁ ଜାବୁଡ଼ି ଧରିଥିଲେ। ଏହା ଏକ ପ୍ରକାର ମବ୍ ଲିଞ୍ଚିଂ ବୋଲି ସେ କହିଛନ୍ତି। ସେଠାରେ ଉପସ୍ଥିତ ଥିବା କିଛି ଲ’ ଫ୍ୟାକଲ୍ଟି ଏବଂ ମହିଳା ପୋଲିସଙ୍କ ସହାୟତାରେ ସେ କୌଣସି ମତେ ନିଜ ଜୀବନ ବଞ୍ଚାଇ ବାହାରକୁ ଆସିଥିଲେ।
ଏମାନେ ଛାତ୍ର ନୁହନ୍ତି, ଗୁଣ୍ଡା: ପ୍ରତ୍ୟକ୍ଷଦର୍ଶୀ
ଏହି ଘଟଣାର ଜଣେ ପ୍ରତ୍ୟକ୍ଷଦର୍ଶୀ ତଥା ଛାତ୍ର ଆକାଶ ପାଠକ କହିଛନ୍ତି ଯେ, ଯେଉଁମାନେ ଏପରି କାଣ୍ଡ ଘଟାଇଛନ୍ତି ସେମାନଙ୍କୁ ଛାତ୍ର କହିବା ଭୁଲ ହେବ। ସେମାନେ ଜାତି ଆଧାରରେ ଗାଳିଗୁଲଜ କରିବା ସହ ବ୍ରାହ୍ମଣବାଦ ବିରୋଧରେ ସ୍ଲୋଗାନ ଦେଉଥିଲେ। ପୋଲିସ ଏହି ମାମଲାରେ ଏଫ୍ଆଇଆର୍ ରୁଜୁ କରିଥିଲେ ମଧ୍ୟ ଏପର୍ଯ୍ୟନ୍ତ କୌଣସି ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ନଥିବା ସେ ଅଭିଯୋଗ କରିଛନ୍ତି। ରୁଚି ତିୱାରୀ ଏବେ ବିଚାର ପାଇଁ ଆଇନ ଉପରେ ଭରସା ରଖିଛନ୍ତି।