କୋଇମ୍ବାଟୁର୍: ତାମିଲନାଡୁର କୋଏମ୍ବାଟୁର ଡିଆଇଜି ବିଜୟକୁମାର ନିଜକୁ ଗୁଳିମାରି ଆତ୍ମହତ୍ୟା କରିଛନ୍ତି । ଆଜି ସକାଳ ପ୍ରାୟ ୬.୧୫ ସମୟରେ ରେସ୍କୋର୍ସ ନିକଟରେ ଥିବା ରେଡ୍ ଫିଲଡ୍ସ୍ସ୍ଥିତ ସରକାରୀ ବାସଭବନରେ ‘ଆଇପିଏସ୍’ ବିଜୟକୁମାର ନିଜକୁ ଗୁଳିମାରି ହୋଇ ପ୍ରାଣ ହରାଇଛନ୍ତି। ତାଙ୍କ ବାସଭବନରେ ଡିୟୁଟି କରୁଥିବା ଜଣେ ବନ୍ଧୁକଧାରୀ ସୁରକ୍ଷା କର୍ମୀଙ୍କ ପାଖରୁ ସେ ଉକ୍ତ ପିସ୍ତଲ୍ଟି ମାଗି ଆଣିଥିଲେ।
ସେ ଗତ କିଛିଦିନ ହେବ ଟେନସନରେ ଥିଲେ ବୋଲି ତାଙ୍କ ସହକର୍ମୀ କହିଛନ୍ତି । ଫଳରେ ଏଭଳି ପଦକ୍ଷେପ ନେଇଛନ୍ତି । ଘଟଣା ବିଷୟରେ ଜଣାପଡିବା ପରେ ବରିଷ୍ଠ ଅଧିକାରୀମାନେ ଘଟଣାସ୍ଥଳରେ ପହଞ୍ଚିଛନ୍ତି । ଏହି ମାମଲାର ଯାଞ୍ଚ ଚାଲିଛି । ତେବେ ବିଜୟ କୁମାରଙ୍କ ନିକଟସ୍ଥ ଅଧିକାରୀ କହିଛନ୍ତି, ସେ କିଛିଦିନ ହେଲା ଦୁଃଶ୍ଚିନ୍ତାରେ ରହୁଥିଲେ । ଠିକ୍ ଭାବେ ଶୋଇପାରୁନଥିଲେ । ତେବେ ଡିଆଇଜି କ’ଣ ପାଇଁ ଏଭଳି ପଦକ୍ଷେପ ନେଲେ ତାହା କେହି ଜାଣିନାହାନ୍ତି । ଡିଆଇଜିଙ୍କ ମୃତଦେହକୁ ବ୍ୟବଚ୍ଛେଦ ପାଇଁ କୋଏମ୍ବାଟୁର ମେଡିକାଲ କଲେଜ ହସପିଟାଲକୁ ପଠାଯାଇଛି ।
ପୁଲିସ ଦେଇଥିବା ସୂଚନା ଅନୁସାରେ, କୋଏମ୍ବାଟୁର ଡିଆଇଜି ବିଜୟ କୁମାର ଶୁକ୍ରବାର ଦିନ ସକାଳେ ମର୍ଣ୍ଣିଂ ଓ୍ଵାକ୍ ପାଇଁ ଯାଇଥିଲେ । ତା’ ପରେ କ୍ୟାମ୍ପ ଅଫିସକୁ ଫେରିଥିଲେ । ସେ ନିଜ ସୁରକ୍ଷା ଅଧିକାରୀଙ୍କ ଠାରୁ ପିସ୍ତଲ ମାଗିଥିଲେ ଏବଂ ଅଫିସ ବାହାରକୁ ଚାଲିଗଲେ । କିଛି ସମୟ ପରେ ଡିଆଇଜି ନିଜକୁ ସୁଟ୍ କରିଥିଲେ । ଗୁଳି ଶବ୍ଦ ଶୁଣି ସେଠାରେ ଉପସ୍ଥିତ ଥିବା ପୋଲିସ ଅଧିକାରୀ ପହଞ୍ଚିବାକୁ ବେଳକୁ ଡିଆଇଜି ଲହୁଲୁହାଣ ହୋଇ ତଳେ ପଡିଥିଲେ । ସେତବେଳେକୁ ତାଙ୍କର ମୃତ୍ୟୁ ହୋଇସାରିଥିଲା ।