ନୂଆଦିଲ୍ଲୀ: ଆସାମର ଗୌହାଟୀ ନିକଟସ୍ଥ ଦିଗାରୁ ଅଞ୍ଚଳରେ ଏକ ବଡ଼ ଧରଣର ରେଳ ଦୁର୍ଘଟଣା ଘଟିଛି। ବୁଧବାର ସକାଳେ କୋଲକାତା-ସାଇରାଙ୍ଗ ଏକ୍ସପ୍ରେସ (ଟ୍ରେନ୍ ନମ୍ବର ୧୩୧୨୫) ର ଇଞ୍ଜିନ ସମେତ ୫ଟି ଯାତ୍ରୀବାହୀ ବଗି ଧାରଣାରୁ ଚ୍ୟୁତ ହୋଇଛି। ଦିଗାରୁ ରେଳ ଷ୍ଟେସନରେ ପ୍ରବେଶ କରିବା ସମୟରେ ଏହି ଦୁର୍ଘଟଣା ଘଟିଥିବା ସୂଚନା ମିଳିଛି।
ତେବେ ସୌଭାଗ୍ୟବଶତଃ ଏହି ଦୁର୍ଘଟଣାରେ କୌଣସି ଯାତ୍ରୀ ମୃତାହତ ହୋଇନାହାଁନ୍ତି। ଉତ୍ତର-ପୂର୍ବ ସୀମାନ୍ତ ରେଳପଥ (NFR) ପକ୍ଷରୁ ମିଳିଥିବା ସୂଚନା ଅନୁଯାୟୀ, ସମସ୍ତ ଯାତ୍ରୀ ସୁରକ୍ଷିତ ଅଛନ୍ତି। ସକାଳ ପ୍ରାୟ ୬ଟା ୫୪ ମିନିଟରେ ଟ୍ରେନଟି ମୁଖ୍ୟ ଲାଇନରୁ ଅନ୍ୟ ଏକ ଟ୍ରେନକୁ ରାସ୍ତା ଛାଡ଼ିବା ପାଇଁ ଲୁପ୍ ଲାଇନକୁ ଯାଉଥିବା ବେଳେ ଏହି ଅଘଟଣ ଘଟିଥିଲା। ପ୍ରାଥମିକ ତଦନ୍ତରୁ ଜଣାପଡିଛି ଯେ, ଷ୍ଟେସନରେ ପ୍ରବେଶ କରିବା ସମୟରେ ଲୋକୋ ପାଇଲଟ୍ ଟ୍ରେନର ବେଗ ନିୟନ୍ତ୍ରଣ କରିପାରିନଥିଲେ।
ଦୁର୍ଘଟଣା ପରେ NFR ର ଜରୁରୀକାଳୀନ ଟିମ୍ ତୁରନ୍ତ ଘଟଣାସ୍ଥଳରେ ପହଞ୍ଚିଥିଲେ। ଜେନେରାଲ ମ୍ୟାନେଜର ଏବଂ ମୁଖ୍ୟ ଜନସମ୍ପର୍କ ଅଧିକାରୀ (CPRO) କପିଞ୍ଜଲ କିଶୋର ଶର୍ମାଙ୍କ ସମେତ ବରିଷ୍ଠ ଅଧିକାରୀମାନେ ଉଦ୍ଧାର କାର୍ଯ୍ୟର ତଦାରଖ କରିଛନ୍ତି। CPRO ସୂଚନା ଦେଇଛନ୍ତି ଯେ, ସମସ୍ତ ଯାତ୍ରୀ ସୁରକ୍ଷିତ ଅଛନ୍ତି ଏବଂ ସେମାନଙ୍କୁ ସେମାନଙ୍କ ଗନ୍ତବ୍ୟ ସ୍ଥଳକୁ ପଠାଇବା ପାଇଁ ତୁରନ୍ତ ବିକଳ୍ପ ପରିବହନ ବ୍ୟବସ୍ଥା କରାଯାଇଛି।
ଦୁର୍ଘଟଣାଟି ଜନବସତି ନିକଟରେ ଘଟିଥିବାରୁ ସ୍ଥାନୀୟ ଲୋକଙ୍କ ମଧ୍ୟରେ ଆତଙ୍କ ଖେଳିଯାଇଥିଲା। ଜଣେ ସ୍ଥାନୀୟ ବାସିନ୍ଦା କହିଛନ୍ତି ଯେ, ଟ୍ରେନର ଇଞ୍ଜିନ ଏବଂ ୬ଟି ବଗି ଧାରଣାରୁ ଚ୍ୟୁତ ହୋଇ ଘରଗୁଡ଼ିକର ଅତି ନିକଟରେ ରହିଯାଇଥିଲା। ଏହା ଏକ ବଡ଼ ଚମତ୍କାର ଯେ କୌଣସି ଧନଜୀବନ ହାନି ଘଟିନାହିଁ। କିଛି ଲୋକ ଟ୍ରେନର ବ୍ରେକ୍ ଫେଲ୍ ହୋଇଥିବା ନେଇ ଆଶଙ୍କା ପ୍ରକଟ କରିଛନ୍ତି ଏବଂ ରେଳବାଇର ସୁରକ୍ଷା ବ୍ୟବସ୍ଥା ଉପରେ ପ୍ରଶ୍ନ ଉଠାଇଛନ୍ତି।
ରେଳ କର୍ତ୍ତୃପକ୍ଷ ଏହି ଘଟଣାର ଏକ ଉଚ୍ଚସ୍ତରୀୟ ତଦନ୍ତ ପାଇଁ ନିର୍ଦ୍ଦେଶ ଦେଇଛନ୍ତି। ସିଗନାଲ୍ ଲଗ୍, ସ୍ପିଡ୍ ରେକର୍ଡ ଏବଂ ବ୍ରେକିଂ ଡାଟା ଯାଞ୍ଚ କରାଯିବ ଯାହାଦ୍ୱାରା ଦୁର୍ଘଟଣାର ପ୍ରକୃତ କାରଣ ଜଣାପଡିବ। ବର୍ତ୍ତମାନ ଟ୍ରାକ୍ ମରାମତି କାର୍ଯ୍ୟ ଜାରି ରହିଛି ଏବଂ ଏହି ରୁଟରେ ରେଳ ଚଳାଚଳ ସ୍ୱାଭାବିକ କରିବାକୁ ପ୍ରୟାସ କରାଯାଉଛି।