ନୂଆଦିଲ୍ଲୀ: ଦୁନିଆର ସବୁଠୁ ବାଙ୍ଗରା ମଣିଷ ଭାବରେ ଗିନିଜ୍ ଓ୍ବାର୍ଲ୍ଡ ରେକର୍ଡରେ ସ୍ଥାନ ପାଇଛନ୍ତି ଆଫସିନ୍ ଇସମିଲ୍। ୨୦ ବର୍ଷୀୟ ଆଫଶୀନ ଇସମିଲ୍ଙ୍କ ଉଚ୍ଚତା ୬୫.୨୪ ସେମି (୨ ଫୁଟ୍ ୧.୬୮ ଇଞ୍ଚ)। ଇରାନ ଆଜରବାଇଜାନର ଏକ ଅପହଞ୍ଚ ଗାଁରେ ଆଫଶୀନଙ୍କ ଜନ୍ମ।
ତାଙ୍କ ପୂର୍ବରୁ ଦୁନିଆର ସବୁଠୁ ବାଙ୍ଗରା ମଣିଷ ଭାବରେ ଏଡଓ୍ବାର୍ଡ ନିନୋ ହର୍ଣ୍ଣାଣ୍ଡିଜ୍ ରହିଥିଲେ। ୧୯୮୬ ମେ ୧୦ ତାରିଖରେ କଲମ୍ବିଆରେ ଜନ୍ମ ଗ୍ରହଣ କରିଥିବା ଏଡଓ୍ବର୍ଡଙ୍କ ଉଚ୍ଚତା ୭୨.୧ ସେମି (୨ ଫୁଟ୍ ୪.୩୮ ଇଞ୍ଚ) ରହିଥିଲା। ତାଙ୍କୁ ୨୦୨୦ ଫେବୃଆରୀ ୨୯ ରେ ଘୋଷଣା କରାଯାଇଥିଲା।
ଆଫଶୀନଙ୍କୁ ତିନି ବର୍ଷର ଶିଶୁର କପଡ଼ା ଫିଟ୍ ହୋଇଥାଏ। ଅବଶ୍ୟ ଏହାର ଡିଜାଇନ୍ ଭିନ୍ନ ରହିଥାଏ। ଖେଳି ନପାରିଲେ ବି ଆଫଶୀନ ଫୁଟ୍ବଲ୍ ଦେଖିବାକୁ ଭଲ ପାଆନ୍ତି। ଏହା ସହ ଆଫଶୀନଙ୍କୁ ଗୀତ ଏବଂ ଡାନ୍ସ ଦେଖିବାକୁ ଭଲ ପାଆନ୍ତି। ତାଙ୍କର ଓଜନ ୧୪.୩ ପାଉଣ୍ତ ଯାହାକି ଏକ ସାଧାରଣ ବିଲେଇ ସହ ସମାନ । ସେ କହିଛନ୍ତି ପରିବାର ଲୋକଙ୍କ ସାହାଯ୍ୟ କରିବାକୁ ତାଙ୍କ ସ୍ବପ୍ନ ରହିଛି। ଏହି ପରିଚୟ ତାଙ୍କୁ ତାଙ୍କ ସ୍ବପ୍ନ ପୂରଣ କରିବାରେ ସହାୟକ ହୋଇପାରେ ବୋଲି ସେ କହିଛନ୍ତି।