ନୂଆଦିଲ୍ଲୀ: ଭାରତରେ ପ୍ରତି ୨ ମିନିଟରେ ଶହେ ଶିଶୁ ଜନ୍ମ ହେଉଛନ୍ତି। ଏଥିରେ ଉତ୍ତରପ୍ରଦେଶ (ୟୁପି) ଏବଂ ବିହାରର କେବଳ ୩୪ ଶିଶୁ ସାମିଲ ଅଛନ୍ତି। ସାମ୍ପଲ ରେଜିଷ୍ଟ୍ରେସନ ସିଷ୍ଟମର ୨୦୨୦ ତଥ୍ୟ ଅନୁଯାୟୀ ପ୍ରତି ୨ ମିନିଟରେ ୟୁପିରେ କେବଳ ୨୨ ଶିଶୁ ଜନ୍ମ ହେଉଛନ୍ତି। ଏହା ପଛରେ ବିହାର (୧୨) ରହିଛି। ସେହିପରି ମଧ୍ୟପ୍ରଦେଶରେ ୮ ଜଣ, ରାଜସ୍ଥାନ ଏବଂ ମହାରାଷ୍ଟ୍ରରେ ୭ ଜଣ ଲେଖାଏଁ, ଗୁଜରାଟ ଏବଂ ପଶ୍ଚିମବଙ୍ଗରେ ୫ ଲେଖାଏଁ, ଆସାମ, ତେଲଙ୍ଗାନା, ଆନ୍ଧ୍ରପ୍ରଦେଶ, ଝଡଖଣ୍ଡ, ଓଡ଼ିଶାରେ ୩ ଜଣ ଲେଖାଏଁ, ହରିୟାଣା, ପଞ୍ଜାବ, ଛତିଶଗଡ, କେରଳରେ ୨ ଲେଖାଏଁ ଏବଂ ଦିଲ୍ଲୀରେ ପ୍ରତି ୨ମିନିଟରେ ଜଣେ ଶିଶୁ ଜନ୍ମ ହେଉଛନ୍ତି।
ତେବେ ଦେଶରେ ପ୍ରତି ୨ ମିନିଟରେ ଶହେ ଶିଶୁ ଜନ୍ମ ନେଉଥିବା ବେଳେ ଭାରତରେ କିନ୍ତୁ ପ୍ରଜନନ ହାର ୨%କୁ ଖସିଛି। ଗତମାସରେ ଜାତୀୟ ପରିବାର ସ୍ବାସ୍ଥ୍ୟ ସର୍ଭେ (ଏନ୍ଏଫ୍ଏଚ୍ଏସ୍)ର ସଦ୍ୟ ରିପୋର୍ଟରେ ଏ ସଂକ୍ରାନ୍ତ ତଥ୍ୟ ଉପସ୍ଥାପନ କରାଯାଇଛି। ଦେଶରେ ଶିଶୁ ଜନ୍ମ ହାର ୨.୨ ପ୍ରତିଶତରୁ କମି ୨%କୁ ଖସିଆସିଛି। ସବୁ ଧର୍ମ କ୍ଷେତ୍ରରେ ପ୍ରଜନନ ହାର କରୁଥବା ଦେଖିବାକୁ ମିଳିଛି। କନ୍ୟା ସନ୍ତାନ ଜନ୍ମକୁ ନେଇ ଲୋକଙ୍କ ମାନସିକତାରେ ମଧ୍ୟ ବଡ଼ ପରିବର୍ତ୍ତନ ଆସିଛି । ପୁଅ-ଝିଅ ମଧ୍ୟରେ କିଛି ଫରକ ନଦେଖି ଅଧିକାଂଶ ମହିଳା ପୁତ୍ର ସନ୍ତାନ ଜନ୍ମ ଦେବାର ମୋହ ତ୍ୟାଗ କରୁଛନ୍ତି। ଦେଶରେ ଦୁଇ ଝିଅଙ୍କୁ ଜନ୍ମ ଦେଇଥିବା ୬୫ ପ୍ରତିଶତ ମହିଳା ଏଭଳି ଅଛନ୍ତି ଯେଉଁମାନେ ପୁଅଙ୍କୁ ନେଇ କୌଣସି ଅଭିଳାଷ ରଖିନଥିବା କହିଛନ୍ତି।
ଦେଶରେ ଉଚ୍ଚ ପ୍ରଜନନ ହାର ଥିବା ମୁସ୍ଲିମ ସଂପ୍ରଦାୟରେ ମଧ୍ୟ ପ୍ରଜନନ ହାର ଦ୍ରୁତ ଗତିରେ କମିଛି। ୨୦୧୫-୧୬ ସର୍ଭେ ତୁଳନାରେ ୨୦୧୯-୨୧ ସର୍ଭେରେ ମୁସ୍ଲିମ ସଂପ୍ରଦାୟରେ ପ୍ରଜନନ ହାର ଅନ୍ୟ ଧର୍ମ ଅପେକ୍ଷା ଦ୍ରୁତ ହ୍ରାସ ହେଉଥିବା ସାମ୍ନାକୁ ଆସିଛି। ଚଳିତ ସର୍ଭେ ରିପୋର୍ଟ ମୁସ୍ଲିମ୍ ସଂପ୍ରଦାୟର ପ୍ରଜନନ ହାର ୪.୪ ପ୍ରତିଶତରୁ ୨.୩୬କୁ ଖସି ଆସିଛି। ତେବେ ସର୍ଭେର ପ୍ରତ୍ୟେକ ପର୍ଯ୍ୟାୟରେ ମୁସ୍ଲିମଙ୍କ କ୍ଷେତ୍ରରେ ପ୍ରଜନନ ହାର ଦ୍ରୁତ ଗତିରେ କମିଥିଲେ ମଧ୍ୟ ଅନ୍ୟ ଧର୍ମ ତୁଳନାରେ ଏହା ଅଧିକ ରହିଛି। ଏନ୍ଏଫ୍ଏଚ୍ଏସ୍ ଦ୍ବାରା ଆଜି ପର୍ଯ୍ୟନ୍ତ ହୋଇଥିବା ୫ଟି ସର୍ଭେରେ ମୁସ୍ଲିମ ପ୍ରଜନନ ହାରରେ ୪୬.୫ ପ୍ରତିଶତ ହ୍ରାସ ଦେଖିବାକୁ ମିଳିଛି। ହିନ୍ଦୁଙ୍କ କ୍ଷେତ୍ରରେ ଏହା ୪୧.୨ ପ୍ରତିଶତ ରହିଛି। ଉତ୍ତରପ୍ରଦେଶରେ ହିନ୍ଦୁମାନଙ୍କ ପ୍ରଜନନ ହାର ୨.୨୯ ପ୍ରତିଶତ ରହିଥିବା ବେଳେ ତାମିଲନାଡ଼ୁରେ ଏହା ୧.୭୫ ରହିଛି । ୟୁପିରେ ମୁସ୍ଲିମଙ୍କ ପ୍ରଜନନ ହାର ୨.୬୬ ରହିଥିବା ବେଳେ ତାମିଲନାଡ଼ୁରେ ୧.୯୩ ରହିଛି।