ଭୁବନେଶ୍ୱର: ଭୁବନେଶ୍ୱର ଠାରେ ୧୩ତମ ବ୍ରିକ୍ସ ଶିକ୍ଷା ମନ୍ତ୍ରୀଙ୍କ ବୈଠକ। ଆଜି ଏହି ବୈଠକରେ କେନ୍ଦ୍ର ଶିକ୍ଷା ମନ୍ତ୍ରୀ ପ୍ରହ୍ଲାଦ ଯୋଶୀ ଉଦ୍ଘାଟନୀ ଭାଷଣ ଦେଇ ଶିକ୍ଷା କ୍ଷେତ୍ରରେ ବ୍ୟାପକ ପରିବର୍ତ୍ତନ ତଥା ସମାନତା ଆଣିବା ପାଇଁ ସାମୂହିକ ପ୍ରୟାସ ଉପରେ ଆଲୋକପାତ କରିଛନ୍ତି।
ଭାରତର ବ୍ରିକ୍ସ ୨୦୨୬ ଅଧ୍ୟକ୍ଷତା ଥିମ୍ 'ବିଲ୍ଡିଂ ରେସିଲିଏନ୍ସ ଆଣ୍ଡ ଇନୋଭେସନ୍ ଫର୍ କୋଅପରେସନ୍ ଆଣ୍ଡ ସଷ୍ଟେନେବିଲିଟି' ବିଷୟରେ ଉଲ୍ଲେଖ କରି ଶ୍ରୀ ଯୋଶୀ ବ୍ରିକ୍ସ ଦେଶଗୁଡ଼ିକ ମଧ୍ୟରେ ଶିକ୍ଷା, ଗବେଷଣା ଏବଂ ନବସୃଜନକୁ ମଜବୁତ କରିବାକୁ ଆହ୍ୱାନ ଦେଇଛନ୍ତି। ସେ କହିଛନ୍ତି ଯେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଭାରତର ବିଶାଳ ଶିକ୍ଷା ବ୍ୟବସ୍ଥାର ଦାୟିତ୍ୱ ନେବା ତାଙ୍କ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ବୈଷୟିକ ଜ୍ଞାନକୌଶଳ ଯେତେ ପରିବର୍ତ୍ତନ ହେଲେ ମଧ୍ୟ ଏବଂ ନୂତନ ପେସା ସୃଷ୍ଟି ହେଲେ ସୁଦ୍ଧା ଶିକ୍ଷା ବ୍ୟବସ୍ଥାର କେନ୍ଦ୍ରବିନ୍ଦୁରେ ସର୍ବଦା ମଣିଷ ରହିବା ଉଚିତ୍। ଶିକ୍ଷାକ୍ଷେତ୍ରରେ 'ମାନବିକତା ପ୍ରଥମ' ('Humanity First') ଆଭିମୁଖ୍ୟକୁ ଗୁରୁତ୍ୱ ଦେଇ ଜଣେ ଶିଖିବାକୁ ଚାହୁଁଥିବା ଛାତ୍ର, ଯୁବ ମନକୁ ଗଢୁଥିବା ଶିକ୍ଷକ ଏବଂ ଜ୍ଞାନ ଆହରଣ କରୁଥିବା ଗବେଷକଙ୍କ ଆବଶ୍ୟକତାକୁ ପ୍ରାଧାନ୍ୟ ଦେବା ଜରୁରୀ ବୋଲି ସେ ମତବ୍ୟକ୍ତ କରିଛନ୍ତି।
ଏହି ଉଚ୍ଚସ୍ତରୀୟ ସମ୍ମିଳନୀରେ ବ୍ରାଜିଲ, ରୁଷିଆ, ଚୀନ୍, ଦକ୍ଷିଣ ଆଫ୍ରିକା, ଇଣ୍ଡୋନେସିଆ, ଇରାନ, ଇଥିଓପିଆ ଏବଂ ୟୁଏอี ଆଦି ବ୍ରିକ୍ସ ସଦସ୍ୟ ରାଷ୍ଟ୍ରଗୁଡ଼ିକର ବରିଷ୍ଠ ଅଧିକାରୀ ତଥା ପ୍ରତିନିଧିମାନେ ଅଂଶଗ୍ରହଣ କରିଥିଲେ। ବିଦେଶାଗତ ପ୍ରତିନିଧିମାନଙ୍କୁ ସ୍ୱାଗତ କରି କେନ୍ଦ୍ରମନ୍ତ୍ରୀ କହିଥିଲେ ଯେ, ଭାରତର ପ୍ରାଚୀନ ପରମ୍ପରା 'ଅତିଥି ଦେବୋ ଭବ:' ଅନୁଯାୟୀ ଆମେ ଅତିଥିମାନଙ୍କୁ ସର୍ବୋଚ୍ଚ ସମ୍ମାନ ଦେଇଥାଉ। ବିଭିନ୍ନ ଦେଶ ତଥା ସମୟ ସୀମା ଅତିକ୍ରମ କରି ଦୂରଦୂରାନ୍ତରୁ ଆସିଥିବା ସମସ୍ତ ପ୍ରତିନିଧିଙ୍କୁ ସେ ବ୍ୟକ୍ତିଗତ ଭାବେ କୃତଜ୍ଞତା ଜଣାଇଥିଲେ। ସେମାନଙ୍କର ଉପସ୍ଥିତି ବ୍ରିକ୍ସ ଏଜେଣ୍ଡା ଅଧୀନରେ ଆଗାମୀ ଦିନରେ ଶିକ୍ଷା କ୍ଷେତ୍ରରେ ସହଯୋଗକୁ ଆହୁରି ସୁଦୃଢ଼ କରିବ ବୋଲି ଶ୍ରୀ ଯୋଶୀ ଆଶାବ୍ୟକ୍ତ କରିଛନ୍ତି।