ଭେଡେନ: ବରଗଡ଼ ଜିଲ୍ଲା ଭେଡେନ ବ୍ଲକ ଅନ୍ତର୍ଗତ ସୁନାଲରମ୍ଭା ପଞ୍ଚାୟତସ୍ଥିତ ବାଘପାଲି ଗ୍ରାମର ବୀର ଯବାନ ନୀଳାଚଳ ପଟେଲ(୪୫) ସହିଦ ହୋଇଛନ୍ତି। ସେ ମଣିପୁରରେ ଆସାମ ରାଇଫଲ୍‌‌ରେ ୨୦୦୦ ମସିହାରୁ କାର୍ଯ୍ୟରତ ଥିଲେ। ତାଙ୍କ ମୃତ୍ୟୁର ପ୍ରକୃତ କାରଣ ଜଣାପଡ଼ି ନ ଥିବା ବେଳେ ଶୁକ୍ରବାର ରାତିରେ ଆସାମର ଦୀନାପୁରରେ ଅନ୍ୟ ଯବାନଙ୍କ ସହ ରାତ୍ରିକାଳୀନ ଡ୍ୟୁଟିରେ ଥିବାବେଳେ ଏକ ସଡ଼କ ଦୁର୍ଘଟଣାରେ ଆହତ ହୋଇ ସହିଦ ହୋଇଥିବା କୁହାଯାଉଛି। ଶନିବାର ତାଙ୍କ ସହିଦ ହେବା ଖବର ଜଣାପଡ଼ିଲା ପରେ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି। ସହିଦ ଯବାନ ନୀଳାଚଳଙ୍କ ପାର୍ଥିବ ଶରୀର ଆସନ୍ତା ସୋମବାର ନିଜ ଗ୍ରାମ ବାଘପାଲିରେ ପହଞ୍ଚିବ ବୋଲି ତାଙ୍କ ବଡ଼ଭାଇ ନୀଳାମ୍ୱର କହିଛନ୍ତି। ସହିଦ ନୀଳାଚଳ ସ୍ୱର୍ଗତ ଆଦି ପଟେଲ ଓ ମା’ ଗୁରୁବାରୀ ପଟେଲଙ୍କ ଦ୍ୱିତୀୟ ପୁତ୍ର ଥିଲେ। ତାଙ୍କ ବିୟୋଗରେ ବିଧାୟିକା ସ୍ନେହାଙ୍ଗିନୀ ଛୁରିଆ ଗଭୀର ଶୋକ ପ୍ରକାଶ କରିଛନ୍ତି।