ଭୁବନେଶ୍ୱର: କୁହୁଡ଼ିର ଧଳା ଚାଦରରେ ଢାଙ୍କି ହେଲା ରାଜଧାନୀ ଭୁବନେଶ୍ୱର । ଶନିବାର ସକାଳେ ଭୁବନେଶ୍ୱରରେ ଚଳିତ ଶୀତ ଋତୁର ପ୍ରଥମ ଘନ କୁହୁଡ଼ି ଦେଖିବାକୁ ମିଳିଛି। ସହରର ଅନେକ ସ୍ଥାନରେ ଦୃଶ୍ୟମାନ ଦୂରତା ମାତ୍ର ୧୫୦ ମିଟରକୁ ହ୍ରାସ ପାଇବା ଫଳରେ ସାଧାରଣ ଜୀବନଯାତ୍ରା ଏବଂ ଯାତାୟାତ ପ୍ରଭାବିତ ହୋଇଛି।
କୁହୁଡ଼ିର ମୋଟା ଆସ୍ତରଣ ଯୋଗୁଁ ରାସ୍ତାଘାଟରେ ଗାଡ଼ି ଚଳାଚଳ ବାଧାପ୍ରାପ୍ତ ହୋଇଥିଲା। ବିଶେଷ କରି ଜାତୀୟ ରାଜପଥ ଓ ପ୍ରମୁଖ ଛକଗୁଡ଼ିକରେ ଗାଡ଼ି ଚାଳକମାନେ ଅନେକ ସମସ୍ୟାର ସମ୍ମୁଖୀନ ହୋଇଥିଲେ। ଦୃଶ୍ୟମାନ ଦୂରତା କମ୍ ଥିବାରୁ ଦୁର୍ଘଟଣା ଏଡ଼ାଇବା ପାଇଁ ଗାଡ଼ିଗୁଡ଼ିକ ବହୁତ ଧିମା ଗତିରେ ଚାଲୁଥିବା ଦେଖିବାକୁ ମିଳିଥିଲା। ଅଧିକାଂଶ ଚାଳକ ନିଜ ଗାଡ଼ିର ହେଡ୍ଲାଇଟ୍ ବ୍ୟବହାର କରି ଯାତ୍ରା କରୁଥିବାର ଦୃଶ୍ୟ ଦେଖିବାକୁ ମିଳିଥିଲା।
ସାମୁଦ୍ରିକ ବାତ୍ୟା 'ଅର୍ଣ୍ଣବ'ର ପ୍ରଭାବ ଶେଷ ହେବା ପରେ ପାଣିପାଗରେ ଏହି ପରିବର୍ତ୍ତନ ଦେଖାଦେଇଛି। ବାତ୍ୟା ଅତିକ୍ରମ କରିବା ପରେ ରାତିର ତାପମାତ୍ରା ହ୍ରାସ ପାଇବା ସହ ଥଣ୍ଡାର ପ୍ରକୋପ ସାମାନ୍ୟ ବୃଦ୍ଧି ପାଇଛି। ଏହାକୁ ଚଳିତ ବର୍ଷ ଶୀତ ଋତୁର ପ୍ରକୃତ ଆଗମନ ବୋଲି ସ୍ଥାନୀୟ ବାସିନ୍ଦା ଅନୁଭବ କରୁଛନ୍ତି। କୁହୁଡ଼ି ଯୋଗୁଁ ସକାଳ ସମୟରେ ବାହାରକୁ ବାହାରିବା କଷ୍ଟକର ହୋଇପଡିଥିଲା।
ପାଣିପାଗ ବିଶେଷଜ୍ଞ ଏବଂ କର୍ତ୍ତୃପକ୍ଷ ଗାଡ଼ି ଚାଳକମାନଙ୍କୁ ସତର୍କତାର ସହ ଗାଡ଼ି ଚଲାଇବାକୁ ପରାମର୍ଶ ଦେଇଛନ୍ତି। ଘନ କୁହୁଡ଼ି ସମୟରେ ହେଡ୍ଲାଇଟ୍ ଏବଂ ଫଗ୍ ଲାଇଟ୍ ବ୍ୟବହାର କରିବା ସହ ଅନ୍ୟ ଗାଡ଼ିଠାରୁ ନିରାପଦ ଦୂରତା ବଜାୟ ରଖିବାକୁ କୁହାଯାଇଛି। ଶୀତୁଆ ପରିବେଶ ସହିତ କୁହୁଡ଼ିର ପ୍ରକୋପ ଆଗାମୀ ଦିନରେ ଅଧିକ ବଢ଼ିପାରେ ବୋଲି ଅନୁମାନ କରାଯାଉଛି।