ଭୁବନେଶ୍ବର: କରୋନା ପୁଣି କାୟା ମେଲାଉଛି। ରାଜ୍ଯରେ ପୁଣି ଥରେ କରୋନା ସଂକ୍ରମଣ ବୃଦ୍ଧି ଘଟିଛି। ରାଜ୍ଯସରକାର ମଧ୍ଯ କରୋନା ଗାଇଡଲାଇନକୁ କଡ଼ାକଡ଼ି ମାନିବାକୁ ନିର୍ଦ୍ଦେଶ ଦେଇଛନ୍ତି। ଯେଉଁଠାରେ ଗଇଡଲାଇନର ଉଲଙ୍ଘନ ହେବାର ନଜିର ଆସୁଛି ବିଏମସି ପକ୍ଷରୁ ଦୃଢ କାର୍ଯ୍ଯାନୁଷ୍ଠାନ ଗ୍ରହଣ କରାଯାଉଛି। ଆଜି କୋଭିଡ ନିୟମ ଉଲ୍ଲଂଘନ କରିଥିବାରୁ ସିଲିକନ କଲେଜକୁ ସିଲ କରିଛି ବିଏମସି। ସେହିପରି ରାଜ୍ୟ ଯୋଗାଣ ନିଗମ କାର୍ଯ୍ଯାଳୟରୁ ଏକାଧିକ କରୋନା ସଂକ୍ରମିତ ଟିହ୍ନଟ ହେବା ପରେ ଅଫିସକୁ ୪୮ ଘଣ୍ଟା ଲାଗି ସିଲ୍ କରି ଦିଆଯାଇଛି।
ସୂଚନା ଅନୁଯାୟୀ, ସିଲିକନ୍ କଲେଜ୍ କୋଭିଡ୍ ନିୟମ ଉଲ୍ଲଂଘନ କରିଥିବାରୁ ପୂର୍ବରୁ କାରଣ ଦର୍ଶାଅ ନୋଟିସ ଜାରି ହୋଇଥିଲା । ତେବେ ଏହି କାରଣ ଦର୍ଶାଅ ନୋଟିସର କୌଣସି ସନ୍ତୋଷ ଜନକ ଉତ୍ତର ନମିଳିବାରୁ ଆଜି କଲେଜକୁ ସିଳ୍ କରିଛି ଭୁବନେଶ୍ବର ମହାନଗର ନିଗମ। କଲେଜରେ ଗୋଟିଏ ବେଞ୍ଚରେ ବସୁଥିଲେ ୫ରୁ୬ ଜଣ ଛାତ୍ରଛାତ୍ରୀ । ଏଥିପାଇଁ ଆଜି ସକାଳୁ ସିଲିକନ କର୍ତ୍ତୃପକ୍ଷଙ୍କୁ କାରଣ ଦର୍ଶାଅ ନୋଟିସ ଦେଇଥିଲା ବିଏମସି । ଆଉ ଆଜି ସଂଧ୍ୟାରେ ସିଲିକନ କଲେଜକୁ ସିଲ୍ କରାଯାଇଥିବା ନେଇ ସ୍ପଷ୍ଟ କରିଛନ୍ତି ଜେଡିସି ପୁରନ୍ଦନ ନନ୍ଦ ।
ସେହିପରି, ରାଜ୍ୟ ଯୋଗାଣ ନିଗମ କାର୍ଯ୍ଯାଳୟରୁ ୬ ଜଣ କୋଭିଡ୍ ସଂକ୍ରମିତ ଚିହ୍ନଟ ହେବା ପରେ ଅଫିସକୁ ସିଲ୍ କରି ଦିଆଯାଇଛି । ଏଥିସହ ଅଫିସର ସମସ୍ତ କର୍ମଚାରୀଙ୍କ କୋଭିଡ୍ ଟେଷ୍ଟ ସହ ଅଫିସ୍ ପରିସରକୁ ସାନିଟାଇଜ୍ କରିବା ଲାଗି ବିଏମସି ନିର୍ଦ୍ଦେଶ ଦେଇଛି ।