ବାଲିଅନ୍ତା : ବାଲିଅନ୍ତା ଥାନା ଅନ୍ତର୍ଗତ ଭିଙ୍ଗାରପୁର ଗ୍ରାମର ନବ କିଶୋର ଦାସ (ସନିଆ)ଙ୍କର ଏକ ଚାଷ ଜମିକୁ ନିକଟସ୍ଥ ଗଡ଼ଭିଙ୍ଗାରପୁର ଗ୍ରାମର ଧରଣୀଧର ଜେନା ପୂର୍ବରୁ ଭାଗଚାଷ କରୁଥିଲେ। କିନ୍ତୁ ନିଜ ଜମି ନିଜେ ଚାଷ କରିବା ପାଇଁ ଧରଣୀଧରଙ୍କୁ ବିଲ ଚାଷ କରିବାକୁ ମନା କରିଥିଲେ ନବକିଶୋର। ଆଜି ନବକିଶୋର ନିଜ ବିଲ ହଳ କରୁଥିବା ବେଳେ ଗଡ଼ଭିଙ୍ଗାରପୁର ଗ୍ରାମର ଧରଣୀଧର ଜେନା ଏବଂ ତାଙ୍କର ଦୁଇ ପୁଅ ଜିତେନ୍ଦ୍ର ଜେନା(ଜିତୁ), ଗୁଡ଼ୁ ଓ ତାଙ୍କର ବଡ଼ ବାପାଙ୍କ ପୁଅ ଫକୁ ଜେନା ମିଶି ନବକିଶୋରଙ୍କୁ ଚାଷ ବିଲରେ ଗୋଇଠା, ତଣ୍ଟିଆ ମାରି ଚାଲିଯାଇଥିଲେ। ନବକିଶୋର ଏନେଇ ପ୍ରଥମେ ବାଲିଅନ୍ତା ଥାନାରେ ଲିଖିତ ଅଭିଯୋଗ କରିଥିଲେ। ବାଲିଅନ୍ତା ପୁଲିସ ଗଡ଼ଭିଙ୍ଗାରପୁର ଯାଇ ଆକ୍ରମଣକାରୀଙ୍କୁ ଖୋଜାଖୋଜି କରିଥିଲେ ମଧ୍ୟ କାହାରିକୁ ନ ପାଇଁ ଫେରି ଆସିଥିଲେ।

କିନ୍ତୁ ପୁଲିସ ଗଲାପରେ ଜିତେନ୍ଦ୍ର, ତା’ର ସାନଭାଇ ପଂକୁଜେନl ଏବଂ ତାଙ୍କର ଦାଦାପୁଅ ଗୁଡୁ ସଂଘବଦ୍ଧ ଭାବେ ଭୁଜାଲି, ଖଣ୍ଡା ଆଦି ମାରଣାସ୍ତ୍ର ଧରି ନିକଟସ୍ଥ ଭିଙ୍ଗାରପୁର ଗ୍ରାମ ଭିତରେ ଦିନ ଦ୍ଵିପ୍ରହରରେ ନବକିଶୋରଙ୍କ ଘରେ ପଶି ତାଙ୍କ ମୁଣ୍ଡ ଏବଂ ହାତକୁ ହାଣିବା ସହିତ କିଛି ସମୟ ଧରି ଆତଙ୍କରାଜ ସୃଷ୍ଟି କରିଥିଲେ। ଏହାଦେଖୀ ଗ୍ରାମର ଅନ୍ୟମାନେ ଭୟରେ ତାଟି କବାଟ ପକାଇ ଦେଇଥିଲେ। ଏନେଇ ନବକିଶୋର ବଲିଅନ୍ତା ଥାନାରେ ଲିଖୀତ ଅଭିଯୋଗ କରିଛନ୍ତି। ବାଲିଅନ୍ତା ପୁଲିସ ଅଭିଯୋଗ ଆଧାରରେ କେସ ନଂ. ୨୩୧/୨୦୨୧ରେ ମାମଲା ରୁଜୁକରିଛି।