ବାଲେଶ୍ୱର: ବାଲେଶ୍ବରରୁ ପୁଣି ଏକ ଲଜ୍ଜାଜନକ ଘଟଣା ସାମ୍ନାକୁ ଆସିଛି। ବାଲେଶ୍ବର ଫକୀରମୋହନ ବିଶ୍ବବିଦ୍ୟାଳୟର ଜଣେ ପ୍ରଫେସର୍ଙ୍କ ପତ୍ନୀଙ୍କୁ ଦୁଷ୍କର୍ମ ଉଦ୍ୟମ ହୋଇଛି। ଏସଂପର୍କରେ ରେମୁଣା ଥାନାରେ ଅଭିଯୋଗ ହେବା ପରେ ପୁଲିସ୍ ଜଣେ ଯୁବକକୁ ଗିରଫ କରିଛି। ସେ ହେଲା, ନୀଳଗିରି ଥାନା ଅନ୍ତର୍ଗତ ମର୍ଦ୍ଦରାଜପୁର ଅଞ୍ଚଳର ହରିହର ପାତ୍ର ଓରଫ୍ ଶଙ୍କର।
ସୂଚନାଯୋଗ୍ୟ, ବିଶ୍ୱବିଦ୍ୟାଳୟ ପରିସରରେ ଶଙ୍କର ଜଣେ ଶ୍ରମିକ ଭାବେ କାର୍ଯ୍ୟରତ। ପ୍ରଫେସର୍ଙ୍କ ପତ୍ନୀ ଉପରେ ତା’ର ଖରାପ ନଜର ରହିଥିଲା। ବିଶ୍ବବିଦ୍ୟାଳୟ ପରିସରରେ କାମ କରିବା ବେଳେ ସେ ମହିଳା ଓ ତାଙ୍କ ପରିବାର ଉପରେ ନଜର ରଖିଥିଲା। ଗତକାଲି ସଂଧ୍ୟାରେ ପ୍ରଫେସର୍ଙ୍କ ଘରେ ତାଙ୍କ ପତ୍ନୀ ଏକୁଟିଆ ଥିବା ସୁଯୋଗ ନେଇ ଶଙ୍କର ତାଙ୍କ ଘରେ ପଶି ଦୁଷ୍କର୍ମ ଉଦ୍ୟମ କରିଥିଲା। କିନ୍ତୁ ମହିଳାଜଣଙ୍କ ତାକୁ ବାଧା ଦେବା ସହ ଚିତ୍କାର କରିବାରୁ ସେ ସେଠାରୁ ପଳାଇଥିଲା। ପରେ ମହିଳାଜଣଙ୍କ ନିଜ ସ୍ବାମୀଙ୍କୁ ସବୁ ଘଟଣା ଜଣାଇବା ପରେ ଏନେଇ ରେମୁଣା ଥାନାରେ ଏତଲା ହୋଇଥିଲା।
ରାଜ୍ୟରେ ନାରୀ ନିର୍ଯାତନା, ଦୁଷ୍କର୍ମ, ଗଣଦୁଷ୍କର୍ମ ଭଳି ଘଟଣା ବଢ଼ି ଚାଲିଥିବା ବେଳେ ଫକୀରମୋହନ ବିଶ୍ବବିଦ୍ୟାଳୟ ପରି ଏକ ନାମକରା ଶିକ୍ଷାନୁଷ୍ଠାନ ପରିସରରେ ପ୍ରଫେସର୍ଙ୍କ ପତ୍ନୀଙ୍କୁ ଦୁଷ୍କର୍ମ ଉଦ୍ୟମ କରାଯିବା ରାଜ୍ୟବ୍ୟାପୀ ତୀବ୍ର ଆଲୋଡ଼ନ ସୃଷ୍ଟି କରିଛି।