୩୦ ବର୍ଷ ବୟସରେ ପାଦ ଦେବା ମାତ୍ରେ ଆପଣଙ୍କୁ ନିଜ ଫିଟନେସ୍ ରୁଟିନ୍ରେ କିଛି ପରିବର୍ତ୍ତନ ଆଣିବାକୁ ପଡ଼ିବ। ୨୦ ବର୍ଷ ବୟସରେ ଲୋକେ ପ୍ରାୟତଃ ଅଧିକ ଇଣ୍ଟେନସିଟି ଏବଂ ଶୀଘ୍ର ଫଳାଫଳ ପାଇବା ପାଇଁ ୱାର୍କଆଉଟ୍ କରିଥାନ୍ତି। କିନ୍ତୁ ୩୦ ଦଶକରେ ଶରୀରର ଆବଶ୍ୟକତା ବଦଳିଯାଏ। ଏହି ସମୟରେ ନିଦ, ମାନସିକ ଚାପ, ରିକୋଭରି ଏବଂ ପୋଷଣ ଉପରେ ଅଧିକ ଧ୍ୟାନ ଦେବା ଜରୁରୀ ହୋଇପଡ଼େ।
୩୦ ବର୍ଷ ବୟସରେ କାହିଁକି ବଦଳିବା ଦରକାର ଫିଟନେସ୍ ଲକ୍ଷ୍ୟ?
ଏକ୍ସପର୍ଟଙ୍କ ଅନୁଯାୟୀ, ୩୦ ବର୍ଷ ବୟସରେ କେବଳ କଠିନ ପରିଶ୍ରମ କରିବା ଲକ୍ଷ୍ୟ ହେବା ଉଚିତ୍ ନୁହେଁ, ବରଂ କେତେ ସଠିକ୍ ଭାବରେ ଟ୍ରେନିଂ ନେଉଛନ୍ତି ଏବଂ ଶରୀର କିପରି ରିକୋଭର କରୁଛି ତାହା ଗୁରୁତ୍ୱପୂର୍ଣ୍ଣ। ଯଦି ପ୍ରତିଦିନ ୱାର୍କଆଉଟ୍ କରିବା ପରେ ଆପଣ ସମ୍ପୂର୍ଣ୍ଣ କ୍ଲାନ୍ତ ହୋଇଯାଉଛନ୍ତି, ତେବେ ଏହା ଆପଣଙ୍କୁ ଦୀର୍ଘଦିନ ପର୍ଯ୍ୟନ୍ତ ଫିଟ୍ ରଖିପାରିବ ନାହିଁ ଏବଂ ୱାର୍କଆଉଟ୍ ପ୍ରତି ଆଗ୍ରହ କମିଯିବ। ତେଣୁ ନିଜ ଶରୀରର କ୍ଷମତା ଅନୁଯାୟୀ ଏକ ସ୍ଥାୟୀ ରୁଟିନ୍ ଆପଣାଇବା ଆବଶ୍ୟକ।
ଷ୍ଟ୍ରେନ୍ଥ ଟ୍ରେନିଂ ଉପରେ ଦିଅନ୍ତୁ ଗୁରୁତ୍ୱ
ଅନେକ ଲୋକ କେବଳ କାର୍ଡିଓ (Cardio), ଦୌଡ଼ିବା କିମ୍ବା ସାଇକ୍ଲିଂ କରି କ୍ୟାଲୋରୀ ବର୍ଣ୍ଣ କରିବାକୁ ଚେଷ୍ଟା କରନ୍ତି। କିନ୍ତୁ କେବଳ କାର୍ଡିଓ ଉପରେ ନିର୍ଭର କରିବା ଦ୍ୱାରା ଶରୀରକୁ ସମ୍ପୂର୍ଣ୍ଣ ଫାଇଦା ମିଳେ ନାହିଁ। ବୟସ ବଢ଼ିବା ସହିତ ମାଂସପେଶୀ ଏବଂ ହାଡ଼କୁ ମଜବୁତ ରଖିବା ପାଇଁ ଷ୍ଟ୍ରେନ୍ଥ ଟ୍ରେନିଂ (Strength training) ନିହାତି ଜରୁରୀ ବୋଲି ଦୀପ୍ତି କହିଛନ୍ତି। ଓଜନ ଉଠାଇବା ଦ୍ୱାରା ଶରୀରର ମାଂସପେଶୀ ସୁସ୍ଥ ରହେ ଏବଂ ଦୈନନ୍ଦିନ କାର୍ଯ୍ୟ ପାଇଁ ଶକ୍ତି ମିଳିଥାଏ।
ଉପଯୁକ୍ତ ପୋଷଣ ଏବଂ ରିକୋଭରି
୩୦ ବର୍ଷ ବୟସରେ ଶରୀରର ଆକାରରେ ପରିବର୍ତ୍ତନ ଆସିଥାଏ। ତେଣୁ କମ୍ ଖାଇବା କିମ୍ବା ଅଧିକ କାର୍ଡିଓ କରିବା ପରିବର୍ତ୍ତେ ଏକ ସନ୍ତୁଳିତ ଡାଏଟ୍ ଉପରେ ଧ୍ୟାନ ଦିଅନ୍ତୁ। ଆପଣଙ୍କ ଖାଦ୍ୟରେ ପର୍ଯ୍ୟାପ୍ତ ପରିମାଣର ପ୍ରୋଟିନ୍ ସାମିଲ କରନ୍ତୁ ଏବଂ ନିଜକୁ ହାଇଡ୍ରେଟେଡ୍ ରଖନ୍ତୁ। ଏହା ସହିତ ପର୍ଯ୍ୟାପ୍ତ ନିଦ ଏବଂ ଶରୀରକୁ ବିଶ୍ରାମ ଦେବା ଦ୍ୱାରା ଆପଣଙ୍କ ଫିଟନେସ୍ ଯାତ୍ରା ସୁଦୃଢ଼ ହୋଇପାରିବ ବୋଲି ବିଶେଷଜ୍ଞ ପରାମର୍ଶ ଦେଇଛନ୍ତି।