ବଲିଉଡ ଏବଂ ଟେଲିଭିଜନର ଲୋକପ୍ରିୟ ଅଭିନେତ୍ରୀ ମୌନୀ ରାୟ (Mouni Roy) ଏବଂ ତାଙ୍କ ବ୍ୟବସାୟୀ ସ୍ୱାମୀ ସୂରଜ ନାମ୍ବିଆର (Suraj Nambiar) ଙ୍କ ବିବାହ ବିଚ୍ଛେଦକୁ ନେଇ ଏବେ ସୋସିଆଲ ମିଡିଆରେ ଚର୍ଚ୍ଚା ଜୋର ଧରିଛି। ଦୀର୍ଘ ଦିନର ପ୍ରେମ ସମ୍ପର୍କ ପରେ ଉଭୟ ଜାନୁଆରୀ ୨୭, ୨୦୨୨ ରେ ଗୋଆରେ ଉଭୟ ମାଲାୟାଲି ଏବଂ ବଙ୍ଗାଳୀ ରୀତିନୀତିରେ ବିବାହ ବନ୍ଧନରେ ଆବଦ୍ଧ ହୋଇଥିଲେ। କିନ୍ତୁ ବିବାହର ମାତ୍ର ୪ ବର୍ଷ ପରେ ଉଭୟଙ୍କ ସମ୍ପର୍କରେ ଫାଟ ସୃଷ୍ଟି ହୋଇଥିବା ଶୁଣିବାକୁ ମିଳୁଛି। ରିପୋର୍ଟ ଅନୁଯାୟୀ, ଉଭୟ ଗତ କିଛି ସପ୍ତାହ ହେବ ଅଲଗା ରହୁଛନ୍ତି ଏବଂ ସେମାନଙ୍କର ଛାଡ଼ପତ୍ର ହୋଇସାରିଛି ବୋଲି ଅନେକ ଗଣମାଧ୍ୟମ ଦାବି କରୁଛନ୍ତି।
ସ୍ୱାମୀଙ୍କ ଉପରେ ଠକେଇ ଏବଂ ଅର୍ଥ ହେରଫେର ଅଭିଯୋଗ
ଏବିପି ନ୍ୟୁଜ୍ର ସୋ 'ସାସ୍ ବୋହୂ ଔର ସାଜିସ୍'ର ଏକ ରିପୋର୍ଟ ଅନୁଯାୟୀ, ସୂରଜ ନାମ୍ବିଆର ଲୋକପ୍ରିୟତା ହାସଲ କରିବା ପାଇଁ ମୌନୀଙ୍କୁ ବ୍ୟବହାର କରିଥିଲେ। କେବଳ ସେତିକି ନୁହେଁ, ସେ ମୌନୀ ରାୟ ଙ୍କୁ ଧୋକା ଦେଇଥିବା ଏବଂ ନିଜର ବ୍ୟକ୍ତିଗତ ଫାଇଦା ପାଇଁ ଅଭିନେତ୍ରୀଙ୍କ ଅର୍ଥର ଅପବ୍ୟବହାର କରିଥିବା ନେଇ ସାଂଘାତିକ ଅଭିଯୋଗ ହୋଇଛି। ଏହି କାରଣରୁ ହିଁ ମୌନୀ ନିଜ ସ୍ୱାମୀଙ୍କଠାରୁ ଅଲଗା ହେବା ପାଇଁ ନିଷ୍ପତ୍ତି ନେଇଛନ୍ତି ବୋଲି କୁହାଯାଉଛି।
ସୋସିଆଲ ମିଡିଆରୁ ସୂରଜଙ୍କ ଆକାଉଣ୍ଟ ଡିଲିଟ୍
ଏହି ଗୁଜବ ଆହୁରି ତୀବ୍ର ହୋଇଥିଲା, ଯେତେବେଳେ ପ୍ରଶଂସକମାନେ ଲକ୍ଷ୍ୟ କରିଥିଲେ ଯେ ମୌନୀ ଏବଂ ସୂରଜ ଇନଷ୍ଟାଗ୍ରାମରେ ପରସ୍ପରକୁ ଆନ୍ଫଲୋ (Unfollow) କରିଦେଇଛନ୍ତି। କେବଳ ସେତିକି ନୁହେଁ, ମୌନୀଙ୍କ ଘନିଷ୍ଠ ବାନ୍ଧବୀ ତଥା ଅଭିନେତ୍ରୀ ଦିଶା ପାଟନୀ (Disha Patani) ମଧ୍ୟ ସୂରଜଙ୍କୁ ଇନଷ୍ଟାଗ୍ରାମରେ ଆନ୍ଫଲୋ କରିଦେଇଛନ୍ତି। ଏହି ସବୁ ବିବାଦ ଏବଂ ଚର୍ଚ୍ଚା ମଧ୍ୟରେ ସୂରଜ ନାମ୍ବିଆର ନିଜର ଇନଷ୍ଟାଗ୍ରାମ ଆକାଉଣ୍ଟକୁ ସମ୍ପୂର୍ଣ୍ଣ ରୂପେ ଡିଲିଟ୍ ବା ଡିଆକ୍ଟିଭେଟ୍ କରିଦେଇଛନ୍ତି।
କୌଣସି ଆନୁଷ୍ଠାନିକ ଘୋଷଣା ହୋଇନାହିଁ
ଯଦିଓ ଇଣ୍ଟରନେଟରେ ଏହି ଦମ୍ପତିଙ୍କ ଛାଡ଼ପତ୍ର ଖବର ଭାଇରାଲ ହେବାରେ ଲାଗିଛି, ତଥାପି ମୌନୀ ରାୟ କିମ୍ବା ତାଙ୍କ ସ୍ୱାମୀ ସୂରଜ ନାମ୍ବିଆର ଙ୍କ ପକ୍ଷରୁ ଏଯାଏଁ କୌଣସି ବିଧିବଦ୍ଧ ସୂଚନା ବା ପ୍ରତିକ୍ରିୟା ଦିଆଯାଇନାହିଁ। ଶେଷ ଥର ପାଇଁ ଉଭୟଙ୍କୁ ଜାନୁଆରୀ ୨୦୨୬ ରେ ଏକ ବିବାହ ଉତ୍ସବରେ ଦିଶା ପାଟନୀଙ୍କ ସହ ଏକାଠି ଦେଖିବାକୁ ମିଳିଥିଲା, ଯେଉଁଠାରେ ଉଭୟଙ୍କ ମଧ୍ୟରେ ଥିବା ଦୂରତା ସ୍ପଷ୍ଟ ବାରି ହୋଇପଡ଼ିଥିଲା। ଏବେ ପ୍ରଶଂସକମାନେ ଅଭିନେତ୍ରୀଙ୍କ ଆନୁଷ୍ଠାନିକ ବୟାନକୁ ଅପେକ୍ଷା କରିଛନ୍ତି।