ସୁନା ଦରରେ ବଡ଼ ଧରଣର ହ୍ରାସ: ୧.୮୦ ଲକ୍ଷରୁ ଖସି ୧.୨୫ ଲକ୍ଷ ତଳକୁ ଆସିଲା ୧୦ ଗ୍ରାମର ମୂଲ୍ୟ

୨୦୨୬ ବର୍ଷ ଆରମ୍ଭରେ ସୁନା ଦର ଆକାଶଛୁଆଁ ହୋଇଥିବା ବେଳେ ଏବେ ବଜାରରେ ଏକ ବଡ଼ ଧରଣର ହ୍ରାସ ଦେଖିବାକୁ ମିଳିଛି। ୧୦ ଗ୍ରାମ ପ୍ରତି ସୁନା ଦର ୧ ଲକ୍ଷ ୮୦ ହଜାର ଟଙ୍କାରୁ ଖସି ଏବେ ୧ ଲକ୍ଷ ୨୫ ହଜାର ଟଙ୍କା ତଳକୁ ଚାଲିଆସିଛି, ଯାହା ଗ୍ରାହକ ଓ ନିବେଶକଙ୍କ ମଧ୍ୟରେ ଆଲୋଡ଼ନ ସୃଷ୍ଟି କରିଛି।

ଆମେରିକା ଫେଡେରାଲ ରିଜର୍ଭ ପକ୍ଷରୁ ସୁଧ ହାର ବୃଦ୍ଧି ହେବାର ଆଶଙ୍କା ଯୋଗୁଁ ଆନ୍ତର୍ଜାତୀୟ ବଜାର ସହିତ ଘରୋଇ ଏମସିଏକ୍ସ (MCX) ବଜାରରେ ମଧ୍ୟ ସୁନା ଦର ଲଗାତାର ଭାବେ ଖସୁଛି। କେବଳ ସୁନା ନୁହେଁ, ରୂପା ମୂଲ୍ୟରେ ମଧ୍ୟ ବୃହତ ହ୍ରାସ ପରିଲକ୍ଷିତ ହୋଇଛି, ଯାହା ଫଳରେ ସମ୍ପୂର୍ଣ୍ଣ ସରାଫା ବଜାରରେ ଏବେ ମାନ୍ଦାବସ୍ଥା ଦେଖାଦେଇଛି। ବିଶେଷଜ୍ଞଙ୍କ ମତରେ ଘରୋଇ ବଜାରରେ ଚାହିଦା କମିବା ମଧ୍ୟ ଦର ହ୍ରାସର ଅନ୍ୟତମ କାରଣ।

ବଜାର ବିଶେଷଜ୍ଞଙ୍କ ଅନୁସାରେ, ବର୍ତ୍ତମାନ ବଜାର 'ଓଭରସୋଲ୍ଡ' ସ୍ଥିତିରେ ରହିଛି। ଯଦି ସୁନା ତା’ର ଗୁରୁତ୍ୱପୂର୍ଣ୍ଣ ସପୋର୍ଟ ସ୍ତର ଭାଙ୍ଗେ, ତେବେ ଏହା ୧ ଲକ୍ଷ ଟଙ୍କା ପର୍ୟ୍ୟନ୍ତ ଖସିଯାଇପାରେ। ଅନ୍ୟପଟେ, ଏହି ସ୍ତରରୁ ଏକ ବାଉନ୍ସ ବ୍ୟାକ୍ ବା ଦର ବୃଦ୍ଧି ହେବାର ସମ୍ଭାବନାକୁ ମଧ୍ୟ ଏଡ଼ାଇ ଦିଆଯାଇ ନପାରେ। ନିବେଶକମାନେ ଏବେ ଅପେକ୍ଷା କର ଓ ଦେଖ ନୀତି ଆପଣେଇଛନ୍ତି।

ଦୀର୍ଘକାଳୀନ ନିବେଶକମାନଙ୍କ ପାଇଁ ଏହି ସମୟ ଏକ ଭଲ ସୁଯୋଗ ହୋଇପାରେ ବୋଲି କୁହାଯାଉଛି। ତେବେ ବଜାରରେ ଅନିଶ୍ଚିତତା ଲାଗି ରହିଥିବାରୁ କୌଣସି ବଡ଼ ନିବେଶ କରିବା ପୂର୍ବରୁ ବଜାର ସ୍ଥିତି ପରଖିବା ଓ ଆର୍ଥିକ ବିଶେଷଜ୍ଞଙ୍କ ପରାମର୍ଶ ନେବା ଜରୁରୀ ବୋଲି ସତର୍କ କରାଯାଇଛି।

About The Author: Suryakanta