ମୁମ୍ବଇ : ଭାରତୀୟ କ୍ରିକେଟ ଦଳର ଅନ୍ୟତମ ଖେଳାଳି ଶ୍ରେୟସଙ୍କ କାନ୍ଧରେ ଗୁରୁବାର ସଫଳ ଅସ୍ତ୍ରୋପଚାର କରାଯାଇଛି। ଏ ସମ୍ପର୍କରେ ନିଜେ ଆୟର ଏକ ଫଟୋ ସହ ଟ୍ୱିଟ୍ କରି ଜଣାଇଛନ୍ତି। ସେ ତାଙ୍କ ଶୁଭେଛୁ ଓ ସମର୍ଥକଙ୍କୁ ଏଭଳି ସମୟରେ ସମର୍ଥନ ଜଣାଇଥିବାରୁ ସେମାନଙ୍କୁ ଧନ୍ୟବାଦ ଦେଇଛନ୍ତି। ଏହି ୨୬ ବର୍ଷୀୟ ବ୍ୟାଟ୍ସମ୍ୟାନ୍ ପୁଣେରେ ମାର୍ଚ୍ଚ ୨୩ ତାରିଖ ଦିନ ଖେଳାଯାଇଥିବା ଇଂଲଣ୍ଡ ବିପକ୍ଷ ପ୍ରଥମ ଦିନିକିଆ ଖେଳୁଥିବାବେଳେ ଏକ ବଲ ଅଟକାଇବାକୁ ଯାଇ ଆଘାତ ପାଇଥିଲେ।
ଏଥିରେ ତାଙ୍କ କାନ୍ଧର ହାଡ ଭାଙ୍ଗିଯାଇଥିଲା। ଏହି ଆଘାତ ଯୋଗୁଁ ତାଙ୍କୁ ଇଂଲଣ୍ଡ ବିପକ୍ଷ ଦିନିକିଆ ସିରିଜ୍ର ଅବଶିଷ୍ଟ ମ୍ୟାଚ୍ ଓ ସମଗ୍ର ଆଇପିଏଲ୍ରୁ ବିଦା ହେବାକୁ ପଡ଼ିଥିଲା। ସେ ମଧ୍ୟ ଇଂଲିଶ କାଉଣ୍ଟି କ୍ରିକେଟ ଖେଳିବାକୁ ଲାଙ୍କାସାୟର ସହ ଚୁକ୍ତିବଦ୍ଧ ହୋଇଥିଲେ। କିନ୍ତୁ ସେ ଏକ ମାସ ବିଶ୍ରାମ ନେବାକୁ ଡାକ୍ତର ପରାମର୍ଶ ଦେଇଥିବାରୁ ଜୁଲାଇ ୨୩ରୁ ଆରମ୍ଭ ହେବାକୁ ଥିବା ଦିନିକିଆ ଟୁର୍ଣ୍ଣାମେଣ୍ଟରେ ଖେଳିବାକୁ ସମର୍ଥ ହେବେ ନାହିଁ। ଗତ ସିଜନରେ ତାଙ୍କ ନେତୃତ୍ୱରେ ଦିଲ୍ଲୀ କ୍ୟାପିଟାଲ୍ସ ଆଇପିଏଲ୍ ଫାଇନାଲରେ ପ୍ରବେଶ କରିଥିଲା। ଏଥର ତାଙ୍କ ଅନୁପସ୍ଥିତିରେ ଋଷଭ ପନ୍ତ୍ ଦିଲ୍ଲୀର ନେତୃତ୍ୱ ନେଉଛନ୍ତି